കൈനകരിയുടെ വീയപുരം ചുണ്ടൻ നെഹ്റു ട്രോഫിയിൽ ജലരാജാവായി; ആവേശം വാനോളമുയർത്തി വള്ളംകളി

ആലപ്പുഴ: (KVARTHA) എഴുപത്തിഒന്നാമത് നെഹ്റു ട്രോഫി വള്ളംകളിയിൽ പുന്നമടക്കായലിലെ ഓളപ്പരപ്പുകളെ കീറിമുറിച്ച് വിബിസി കൈനകരി തുഴഞ്ഞ വീയപുരം ചുണ്ടൻ ജലരാജാവായി. ആവേശകരമായ പോരാട്ടത്തിൽ ഫോട്ടോഫിനിഷിലാണ് വീയപുരം ചുണ്ടൻ കിരീടം നേടിയത്. കഴിഞ്ഞ തവണ മൈക്രോ സെക്കൻഡിൻ്റെ വ്യത്യാസത്തിൽ കൈവിട്ടുപോയ കിരീടമാണ് ഇത്തവണ വീയപുരം തിരിച്ചുപിടിച്ചത്.

വിവിധ വിഭാഗങ്ങളിലായി 21 ചുണ്ടൻ വള്ളങ്ങൾ ഉൾപ്പെടെ 71 വള്ളങ്ങളാണ് ഇത്തവണത്തെ മത്സരത്തിൽ പങ്കെടുത്തത്. മൂന്ന് ചുരുളൻ, അഞ്ച് ഇരുട്ടുകുത്തി എ, 18 ഇരുട്ടുകുത്തി ബി, 14 ഇരുട്ടുകുത്തി സി, അഞ്ച് വെപ്പ് എ, മൂന്ന് വെപ്പ് ബി, തെക്കനോടി തറ, തെക്കനോടി കെട്ട് എന്നിവയിൽ ഓരോ വള്ളങ്ങളുമാണ് മാറ്റുരച്ചത്.

ഫൈനൽ മത്സരത്തിൽ വീയപുരം ചുണ്ടൻ, നടുഭാഗം ചുണ്ടൻ, മേൽപ്പാടം ചുണ്ടൻ, നീരണം ചുണ്ടൻ എന്നിവയാണ് ഏറ്റുമുട്ടിയത്. നാലാം ഹീറ്റ്സിൽ ഒന്നാം സ്ഥാനത്തെത്തിയ നടുഭാഗം ചുണ്ടൻ ഫൈനലിൽ രണ്ടാമതെത്തി. മൂന്നാം ഹീറ്റ്സിൽ ഒന്നാമതെത്തിയ മേൽപ്പാടം ചുണ്ടൻ മൂന്നാം സ്ഥാനവും, അഞ്ചാം ഹീറ്റ്സിൽ ഒന്നാമതെത്തിയ നിരണം ബോട്ട് ക്ലബിന്റെ നിരണം ചുണ്ടൻ നാലാം സ്ഥാനവും നേടി. അതേസമയം, ഹീറ്റ്സിൽ മികച്ച പ്രകടനം നടത്തിയ പായിപ്പാടൻ, കാരിച്ചാൽ ചുണ്ടൻ വള്ളങ്ങൾ ഫൈനൽ കാണാതെ പുറത്തായി.

4.21.084 മിനിറ്റിൽ ഫിനിഷ് ചെയ്ത വീയപുരം ചുണ്ടൻ മിനിറ്റുകൾ വ്യത്യാസത്തിലാണ് വിജയികളായത്. നടുഭാഗം 4.21.782 മിനിറ്റിലും, മേൽപ്പാടം 4.21.933 മിനിറ്റിലും, നിരണം 4.22.035 മിനിറ്റിലുമാണ് ഫിനിഷിങ് പോയിൻ്റ് കടന്നത്. ഫലപ്രഖ്യാപനത്തെക്കുറിച്ചുള്ള പരാതികൾ ഒഴിവാക്കാൻ വെർച്വൽ ലൈനോടുകൂടിയ ഫിനിഷിംഗ് സംവിധാനമാണ് ഇത്തവണ ഒരുക്കിയിരുന്നത്.

അതേസമയം, ഫൈനലിലെത്തിയ നടുഭാഗം ചുണ്ടനിൽ ഇതര സംസ്ഥാന തുഴക്കാർ കൂടുതലാണെന്ന പരാതിയുമായി യുബിസിയും പിബിസിയും രംഗത്തെത്തി. ഇത് സംബന്ധിച്ച് ക്ലബ്ബുകൾ സംഘാടകർക്ക് പരാതി നൽകിയിട്ടുണ്ട്.

നെഹ്റു ട്രോഫി വള്ളംകളിയുടെ ഈ ആവേശകരമായ വിജയം നിങ്ങളുടെ കൂട്ടുകാരുമായി പങ്കുവെയ്ക്കൂ.

Article Summary: Veeyapuram Chundan wins the 71st Nehru Trophy Boat Race.

 #NehruTrophy, #BoatRace, #Alappuzha, #Kerala, #VeeyapuramChundan, #Sports