നെടുമ്പാശ്ശേരി വിമാനത്താവള റെയിൽവേ സ്റ്റേഷൻ നിർമാണം ഉടൻ ആരംഭിക്കും; കേന്ദ്ര മന്ത്രി അശ്വിനി വൈഷ്ണവ് ജോർജ് കുര്യന് ഉറപ്പ് നൽകി

കൊച്ചി: (KVARTHA) നെടുമ്പാശ്ശേരി അന്താരാഷ്ട്ര വിമാനത്താവളത്തിന് സമീപം റെയിൽവേ സ്റ്റേഷൻ നിർമാണം ഉടൻ ആരംഭിക്കുന്നതിനുള്ള നടപടികൾ സ്വീകരിക്കുമെന്ന് കേന്ദ്ര റെയിൽവേ മന്ത്രി അശ്വിനി വൈഷ്ണവ്. കേന്ദ്ര മന്ത്രി ജോർജ് കുര്യനുമായി നടത്തിയ കൂടിക്കാഴ്ച്ചയിലാണ് ഈ നിർണ്ണായക കാര്യത്തിൽ ഉറപ്പു നൽകിയത്. വിമാനത്താവളത്തിലെത്തുന്ന യാത്രക്കാരുടെയും കേരളത്തിലെ പ്രവാസികളുടെയുമടക്കം ഒരുപാട് നാളായുള്ള സ്വപ്നമാണ് നെടുമ്പാശ്ശേരി എയർപോർട്ട് റെയിൽവേ സ്റ്റേഷൻ പദ്ധതി.

കഴിഞ്ഞ വർഷം വിൻഡോ-ട്രെയിലിങ് ഇൻസ്പെക്ഷൻ നടത്തിയപ്പോൾ റെയിൽവേ മന്ത്രി തന്നെയാണ് ഉദ്യോഗസ്ഥർക്ക് സ്റ്റേഷന്റെ സ്ഥാനവും മറ്റും കാണിച്ചുകൊടുത്തത്. ഈ ഇൻസ്‌പെക്ഷനിൽ കേന്ദ്രമന്ത്രി ജോർജ് കുര്യനും റെയിൽവേ മന്ത്രിക്ക് ഒപ്പം പങ്കെടുത്തിരുന്നു. ദീർഘകാലമായി കാത്തിരിക്കുന്ന ഈ പദ്ധതി ഉടൻ യാഥാർത്ഥ്യമാകുന്നതോടെ എയർപോർട്ട് യാത്രക്കാർക്ക് വലിയ ആശ്വാസമാകും.

മെമു ട്രെയിനുകൾക്ക് കൂടുതൽ കോച്ചുകൾ

സാധാരണ യാത്രക്കാരുടെ ക്ലേശം പരിഹരിക്കുന്നതിനായി മെമു ട്രെയിനുകൾക്ക് നവംബർ മുതൽ കോച്ചുകൾ വർധിപ്പിക്കുമെന്നും അശ്വിനി വൈഷ്ണവ് അറിയിച്ചു. തിരക്കേറിയ റൂട്ടുകളിൽ യാത്രാദുരിതം നേരിടുന്ന സാധാരണക്കാർക്ക് ഈ തീരുമാനം ഏറെ ഉപകാരപ്രദമാകും.

അതിനിടെ, യാത്രക്കാരുടെ സൗകര്യാർത്ഥം വിവിധ ട്രെയിനുകൾക്ക് സ്റ്റോപ്പ് അനുവദിക്കുന്ന കാര്യം അനുഭാവപൂർവം പരിഗണിക്കാമെന്ന് കേന്ദ്ര റെയിൽവേ മന്ത്രി ജോർജ് കുര്യന് ഉറപ്പ് നൽകിയിട്ടുണ്ട്.

പുതിയ സ്റ്റോപ്പുകൾ അനുവദിച്ച് റെയിൽവേ

പ്രധാനപ്പെട്ട രണ്ട് ട്രെയിനുകൾക്ക് പുതിയ സ്റ്റോപ്പുകൾ അനുവദിച്ചതായും കേന്ദ്ര മന്ത്രി ജോർജ് കുര്യൻ അറിയിച്ചു. തിരുവനന്തപുരം നോർത്ത് - എസ്എംവിടി ബംഗളൂരു ഹംസഫർ എക്സ്പ്രസിന് (16319/16320) കായംകുളം സ്റ്റേഷനിലും നിലമ്പൂർ - തിരുവനന്തപുരം നോർത്ത് രാജ്യരാണി എക്സ്പ്രസിന് (16350) കരുനാഗപ്പള്ളി സ്റ്റേഷനിലും സ്റ്റോപ്പ് അനുവദിച്ചതായാണ് അദ്ദേഹം അറിയിച്ചത്. ഈ സ്റ്റോപ്പുകൾ പ്രാദേശിക യാത്രക്കാർക്ക് കൂടുതൽ സൗകര്യപ്രദമാകും.

നെടുമ്പാശ്ശേരി എയർപോർട്ട് റെയിൽവേ സ്റ്റേഷൻ വരുന്നത് വിദേശയാത്രക്കാർക്ക് എത്രത്തോളം ഉപകാരപ്രദമാകും? അഭിപ്രായങ്ങൾ കുറിക്കുക.

Article Summary: Nedumbassery Airport Railway Station construction to begin soon; MEMU coaches to be increased from November.

#NedumbasseryAirport #RailwayStation #AshwiniVaishnaw #GeorgeKurian #MEMUTrain #KeralaRail