'അഴിമതിയും ധാർഷ്ട്യവും നിറഞ്ഞ 45 വർഷത്തെ ഇടതുഭരണത്തിൽ നിന്ന് മോചനം ഉണ്ടാകും, 2036ലെ ഒളിമ്പിക്സ് വേദി തിരുവനന്തപുരത്ത്'; വികസന വാഗ്ദാനങ്ങളുമായി എൻഡിഎ

തിരുവനന്തപുരം: (KVARTHA) ഒളിമ്പിക്‌സ് വേദി അടക്കം വമ്പൻ പ്രഖ്യാപനങ്ങളുമായി തിരുവനന്തപുരം നഗരസഭയിലേക്കുള്ള എൻഡിഎയുടെ പ്രകടനപത്രികയും വികസനരേഖയും പുറത്തിറക്കി. 2036ൽ ഇന്ത്യയിൽ നടക്കുന്ന ഒളിമ്പിക്‌സിന്റെ ഒരു വേദിയായി തിരുവനന്തപുരത്തെ സജ്ജമാക്കുമെന്നതാണ് പ്രധാന വാഗ്ദാനം. ഇതിനായി കേന്ദ്ര സർക്കാരിനോട് അഭ്യർത്ഥിക്കുമെന്നും പ്രകടനപത്രിക വ്യക്തമാക്കുന്നു. തിരുവനന്തപുരം കോർപ്പറേഷനിലെ ഭരണം എൻഡിഎയ്ക്ക് ലഭിച്ചാൽ, അധികാരമേറ്റ് 45 ദിവസത്തിനകം നഗരത്തിൻ്റെ സമഗ്ര വികസന രൂപരേഖ പ്രധാനമന്ത്രി നരേന്ദ്രമോദി നേരിട്ടെത്തി പ്രഖ്യാപിക്കുമെന്നും വികസനരേഖയിൽ പറയുന്നു.

ബിജെപി സംസ്ഥാന അധ്യക്ഷൻ രാജീവ് ചന്ദ്രശേഖർ നഗരത്തിലെ ഓട്ടോ തൊഴിലാളിയായ വിജയന് കൈമാറിയാണ് തിരുവനന്തപുരത്തിൻ്റെ വികസനരേഖയുടെ പ്രകാശന ഉദ്ഘാടനം നിർവഹിച്ചത്. 'വികസിത തിരുവനന്തപുരവും അഴിമതി രഹിത ഭരണവുമാണ് ബിജെപി വാഗ്ദാനം ചെയ്യുന്നത്. നമുക്ക് വേണം വികസിത തിരുവനന്തപുരം, മാറാത്തത് ഇനി മാറും' എന്നതാണ് എൻഡിഎ ഉയർത്തുന്ന പ്രധാന മുദ്രാവാക്യം.

ഇടതുഭരണത്തിനെതിരെ രൂക്ഷവിമർശനം

പ്രകടനപത്രിക പ്രകാശനം ചെയ്തുകൊണ്ട് സംസാരിച്ച രാജീവ് ചന്ദ്രശേഖർ, 45 വർഷത്തെ ഇടതുഭരണത്തിനെതിരെ രൂക്ഷ വിമർശനമാണ് ഉന്നയിച്ചത്. 'അഴിമതിയും ധാർഷ്ട്യവും നിറഞ്ഞ 45 വർഷത്തെ ഇടതുഭരണത്തിൽ നിന്ന് തിരുവനന്തപുരം നിവാസികൾക്ക് മോചനം ഉറപ്പാക്കും. 45 വർഷം തുടർച്ചയായി നഗരസഭ ഭരിച്ച സിപിഎം നഗരത്തിന് ഒന്നും നൽകിയിട്ടില്ല. ഒമ്പത് തവണ തിരഞ്ഞെടുക്കപ്പെട്ട സിപിഎം അത് അഴിമതി നടത്തി കൊള്ളയടിക്കാനുള്ള അവസരമാക്കി മാറ്റിയെന്നും' രാജീവ് ചന്ദ്രശേഖർ ആരോപിച്ചു. ജനാധിപത്യ സംവിധാനത്തിൽ സാധാരണ പൗരൻ്റെ പ്രശ്നങ്ങൾക്ക് പരിഹാരം കാണേണ്ടത് തദ്ദേശീയ സ്വയംഭരണ സ്ഥാപനങ്ങളാണെന്നും അദ്ദേഹം ചൂണ്ടിക്കാട്ടി.

പ്രധാന വാഗ്ദാനങ്ങളും സുതാര്യ ഭരണവും

2030 ഓടെ തിരുവനന്തപുരത്തെ രാജ്യത്തെ ഏറ്റവും മികച്ച മൂന്ന് നഗരങ്ങളിൽ ഒന്നാക്കി മാറ്റുമെന്നും എൻഡിഎ വാഗ്ദാനം ചെയ്യുന്നു. അധികാരത്തിൽ എത്തിയാൽ ഓഫീസുകൾ കയറിയിറങ്ങുന്ന ജനങ്ങളുടെ ദുരിതത്തിന് അറുതി വരുത്തും. ഡിജിറ്റൽ - എഐ സാങ്കേതികവിദ്യകളിലൂടെ തിരുവനന്തപുരം കോർപ്പറേഷനിൽ പൂർണ്ണമായും അഴിമതിരഹിതവും സുതാര്യവുമായ ഭരണം നടപ്പിലാക്കും. കോർപ്പറേഷൻ്റെ ഭരണനിർവ്വഹണം ഓൺലൈൻ, സി.എസ്.സി സംവിധാനങ്ങളിലൂടെ ജനങ്ങളുടെ വീട്ടുപടിക്കൽ എത്തിക്കുമെന്ന് എൻഡിഎ ഉറപ്പ് നൽകുന്നു.

• മോദി സർക്കാരിൻ്റെ ജനക്ഷേമ പദ്ധതികളും ആനുകൂല്യങ്ങളും പേരുമാറ്റാതെ, അട്ടിമറിക്കപ്പെടാതെ 100 ശതമാനവും അർഹരായവരുടെ കൈകളിലെത്തിക്കും.
• വാഗ്ദാനങ്ങൾ എത്രത്തോളം നടപ്പിലായി എന്നറിയാൻ, ഭരണനേട്ടങ്ങളുടെ വിലയിരുത്തലായി ഓരോ വർഷവും 'പ്രോഗ്രസ് റിപ്പോർട്ട്' പ്രസിദ്ധീകരിക്കും.
• വരവ്-ചെലവ് വിവരങ്ങളും പദ്ധതി നടത്തിപ്പും ജനങ്ങളെ ബോധ്യപ്പെടുത്താൻ എല്ലാ വർഷവും 'ബജറ്റ് റിപ്പോർട്ട് കാർഡ്' പുറത്തിറക്കും.

വികസന പദ്ധതികൾ

മെച്ചപ്പെട്ട ജീവിത സാഹചര്യങ്ങൾ ഒരുക്കുന്നതിനായി നിരവധി നിർദ്ദിഷ്ട പദ്ധതികളും പ്രകടനപത്രികയിലുണ്ട്. കേന്ദ്രസർക്കാർ സഹായത്തോടെ കോർപ്പറേഷനിൽ വീടില്ലാത്ത എല്ലാവർക്കും അഞ്ച് വർഷത്തിനുള്ളിൽ വീട് നിർമ്മിച്ച് നൽകുമെന്ന് വികസനരേഖ ഉറപ്പ് നൽകുന്നു.

• വെള്ളക്കെട്ട് ഒഴിവാക്കാൻ സൂറത്ത് മാതൃകയിൽ പദ്ധതികൾ രൂപീകരിച്ച് 101 വാർഡുകളിലും സമഗ്ര ഡ്രൈനേജ് സംവിധാനം നിർമ്മിക്കും.
• ഇൻഡോർ മാതൃകയിൽ മാലിന്യപ്രശ്നത്തിന് സമയബന്ധിതമായി പരിഹാരം കാണുന്ന സംവിധാനം തിരുവനന്തപുരത്ത് നടപ്പിലാക്കും.
• ഗംഗ ശുദ്ധീകരണ മിഷൻ്റെ മാതൃകയിൽ കരമനയാർ, കിള്ളിയാർ, ആമയിഴഞ്ചാൻ തോട്, പാർവതി പുത്തനാർ പോലുള്ള ജലാശയങ്ങൾ ശുദ്ധീകരിച്ച് സംരക്ഷിക്കും.
• റോഡ്, റെയിൽ, വ്യോമ ഗതാഗത കണക്ടിവിറ്റി ഉന്നത നിലവാരമുള്ളതാക്കും. കേന്ദ്രത്തിൻ്റെ സഹായത്തോടെ മെട്രോ റെയിൽവേ യാഥാർഥ്യമാക്കും.
• നഗരത്തിൽ ശോചനീയാവസ്ഥയിലുള്ള വീടുകളുടെ അറ്റക്കുറ്റപ്പണികൾ അധികാരത്തിലെത്തി 15 ദിവസത്തിനകം ആരംഭിക്കും.

ആരോഗ്യ-ടൂറിസം മേഖലകൾ:

ആരോഗ്യകേന്ദ്രങ്ങളെ സംയോജിപ്പിച്ച് തിരുവനന്തപുരത്തെ ആരോഗ്യസംരക്ഷണ നഗരമാക്കി മാറ്റും. എല്ലാ വാർഡുകളിലും മികച്ച സൗകര്യങ്ങളുള്ള കുടുംബാരോഗ്യ കേന്ദ്രങ്ങളും 24 മണിക്കൂറും ഡോക്ടറുടെ സേവനവും ഉറപ്പാക്കും. കുറഞ്ഞവിലയിൽ മരുന്നുകൾ ലഭ്യമാക്കാൻ കോർപ്പറേഷൻ്റെ നേതൃത്വത്തിൽ ജൻ ഔഷധി മെഡിക്കൽ സ്റ്റോറുകളുടെ ശൃംഖല നഗരത്തിൽ വ്യാപിപ്പിക്കും. 

ശ്രീ പത്മനാഭസ്വാമി ക്ഷേത്രം, ആറ്റുകാൽ ദേവീക്ഷേത്രം, ബീമാപ്പള്ളി, വെട്ടുകാട് പള്ളി എന്നിവിടങ്ങൾ കേന്ദ്രീകരിച്ച് തീർത്ഥാടന ടൂറിസം പദ്ധതിയും നടപ്പാക്കും. വിഴിഞ്ഞം തുറമുഖത്തെ ഗേറ്റ് വേ തുറമുഖമാക്കി മാറ്റുകയും സാധ്യതകളും ഗുണങ്ങളും ജനങ്ങളിലേക്ക് എത്തിക്കുകയും ചെയ്യും.

മറ്റു വാഗ്ദാനങ്ങളും പങ്കെടുത്ത പ്രമുഖരും

തെരുവുനായകളെ ഷെൽട്ടറിൽ പാർപ്പിച്ച് വെറ്ററിനറി ഡോക്ടർമാരുടെ സേവനം ഉപയോഗിച്ച് തെരുവുനായ ശല്യത്തിന് ശാശ്വത അന്ത്യം കുറിക്കും. വഴിയോര കച്ചവടക്കാരുടെയും മറ്റ് വ്യവസായികളുടേയും പൊതുജനങ്ങളുടെയും സഹകരണത്തോടെ സിറ്റി നൈറ്റ് ലൈഫ് യാഥാർത്ഥ്യമാക്കും. മേയറും ഡെപ്യൂട്ടിമേയറും കൗൺസിലർമാരും ഉദ്യോഗസ്ഥരും വാർഡുകളിലെത്തി പരാതികൾ നേരിട്ട് പരിഹരിക്കുമെന്നും വികസനരേഖ ഉറപ്പ് നൽകുന്നു.

ബിജെപി സംസ്ഥാന കാര്യാലയമായ കെ.ജി മാരാർ ഭവനില്‍ നടന്ന ചടങ്ങില്‍ ബിജെപി സംസ്ഥാന അധ്യക്ഷൻ രാജീവ് ചന്ദ്രശേഖറിന് പുറമെ, കെകെസി സംസ്ഥാന ചെയർമാൻ വിഷ്ണുപുരം ചന്ദ്രശേഖരൻ, ശിവസേന സംസ്ഥാന അധ്യക്ഷൻ പേരൂർക്കട ഹരികുമാർ, ബിജെപി സംസ്ഥാന ഉപാധ്യക്ഷന്മാരായ ഡോ അബ്ദുൾ സലാം, കെ സോമൻ, ബിജെപി സംസ്ഥാന ജനറല്‍ സെക്രട്ടറിമാരായ അഡ്വ എസ് സുരേഷ്, അനൂപ് ആൻ്റണി, സംസ്ഥാന സെക്രട്ടറി അഡ്വ വിവി രാജേഷ്, ബിജെപി തിരുവനന്തപുരം സിറ്റി ജില്ലാ അധ്യക്ഷൻ കരമന ജയൻ, ബിഡിജെഎസ് ജില്ലാ അധ്യക്ഷൻ പ്രേംരാജ് തുടങ്ങിയ പ്രമുഖരും പങ്കെടുത്തു.

എൻഡിഎയുടെ ഈ വാഗ്ദാനങ്ങളെക്കുറിച്ച് നിങ്ങളുടെ അഭിപ്രായം അറിയിക്കുക.

Article Summary: NDA promises 2036 Olympics, Top-3 city status, and transparent governance in the Thiruvananthapuram Corporation manifesto.

#KeralaPolitics #NDAManifesto #Thiruvananthapuram #Olympics2036 #RajeevChandrasekhar #Modi