മുത്തങ്ങ വെടിവയ്പ്പിൻ്റെയും ശിവഗിരിയിലെ പോലീസ് നടപടിയുടെയും പേരിൽ തനിക്കെതിരെ നടക്കുന്ന വിമർശനങ്ങൾക്ക് മറുപടിയുമായി മുൻ മുഖ്യമന്ത്രി എ കെ ആന്റണി

തിരുവനന്തപുരം: (KVARTHA) യു.ഡി.എഫ് കാലത്തെ പോലീസ് അതിക്രമങ്ങളെക്കുറിച്ച് മുഖ്യമന്ത്രി പിണറായി വിജയൻ നിയമസഭയിൽ നടത്തിയ വിമർശനങ്ങൾക്കു മറുപടിയുമായി മുതിർന്ന കോൺഗ്രസ് നേതാവും മുൻ മുഖ്യമന്ത്രിയുമായ എ കെ ആന്റണി രംഗത്തെത്തി. മുത്തങ്ങ വെടിവയ്പ്പിൻ്റെയും ശിവഗിരിയിലെ പോലീസ് നടപടിയുടെയും പേരിൽ തന്നെ മാത്രമാണ് പഴിക്കുന്നതെന്ന് അദ്ദേഹം കുറ്റപ്പെടുത്തി. ഈ സംഭവങ്ങളിലെ പോലീസ് നടപടികളിൽ തനിക്ക് അതിയായ ദുഃഖവും ഖേദവുമുണ്ടെന്നും അദ്ദേഹം വ്യക്തമാക്കി. ഇതിലെ സത്യം ജനം അറിയട്ടേയെന്ന് പറഞ്ഞ ആന്റണി, മുത്തങ്ങയിലെ സിബിഐ അന്വേഷണ റിപ്പോർട്ടും ശിവഗിരിയിലെ ജസ്റ്റിസ് ബാലകൃഷ്ണൻ നമ്പ്യാർ കമ്മീഷൻ റിപ്പോർട്ടും മാറാട് കലാപത്തിലെ റിപ്പോർട്ടും പുറത്തുവിടണമെന്ന് സർക്കാരിനോട് ആവശ്യപ്പെട്ടു.

1995-ൽ ശിവഗിരിയിലേക്ക് പോലീസിനെ അയച്ചത് ഹൈക്കോടതിയുടെ കർശന നിർദേശപ്രകാരമാണെന്നും അത് സർക്കാർ പെട്ടെന്ന് എടുത്ത തീരുമാനമായിരുന്നില്ലെന്നും ആന്റണി പറഞ്ഞു. തിരഞ്ഞെടുപ്പിൽ ജയിച്ച സന്യാസിമാർക്ക് അധികാരം കൈമാറാൻ തോറ്റ വിഭാഗം തയ്യാറാകാതിരുന്നതാണ് പ്രതിസന്ധിക്ക് കാരണമായത്. കോടതി ഉത്തരവുമായി രണ്ടു തവണ പ്രകാശാനന്ദ വിഭാഗം എത്തിയിട്ടും അധികാരക്കൈമാറ്റം നടന്നില്ല. തുടർന്ന് ഹൈക്കോടതി ജഡ്ജിയുടെ ഭാഗത്തുനിന്ന് എന്ത് പ്രത്യാഘാതം ഉണ്ടായാലും പോലീസ് അധികാരം ഉപയോഗിച്ച് അധികാരക്കൈമാറ്റം നടത്തണമെന്നും, ഇല്ലെങ്കിൽ കോടതിയലക്ഷ്യ നടപടിയുണ്ടാകുമെന്നും നിർദേശമുണ്ടായി. നിയമവിദഗ്ദ്ധരുമായി കൂടിയാലോചിച്ചപ്പോൾ ഉദ്യോഗസ്ഥർ ബലിയാടുകളാകുമെന്ന് തിരിച്ചറിഞ്ഞതോടെയാണ് പോലീസിനെ ഉപയോഗിക്കേണ്ടിവന്നതെന്നും, ഇത് തന്റെ ജീവിതത്തിൽ ഏറ്റവും ദുഃഖവും വേദനയും ഉണ്ടാക്കിയ സംഭവമാണെന്നും ആന്റണി കൂട്ടിച്ചേർത്തു.

അതേസമയം, മുത്തങ്ങ വെടിവയ്പ്പിൽ അതിയായ ഖേദമുണ്ടെന്ന് ആന്റണി വ്യക്തമാക്കി. ആദിവാസികൾക്ക് ഏറ്റവും കൂടുതൽ ഭൂമി നൽകിയത് തന്റെ ഭരണകാലത്താണെന്ന് ചൂണ്ടിക്കാട്ടിയ അദ്ദേഹം, എന്നിട്ടും 'ആദിവാസികളെ ചുട്ടുകരിച്ചെ'ന്ന പഴിയാണ് തനിക്ക് കേൾക്കേണ്ടി വന്നതെന്ന് പറഞ്ഞു. മുത്തങ്ങ വന്യജീവി സങ്കേതമാണെന്നും അവിടെ കയ്യേറ്റം അനുവദിക്കരുതെന്ന് കേന്ദ്ര പരിസ്ഥിതി മന്ത്രാലയം മൂന്നു തവണ കത്തയച്ച് താക്കീത് നൽകിയിരുന്നുവെന്നും അദ്ദേഹം വെളിപ്പെടുത്തി. അന്നത്തെ പോലീസ് നടപടിക്ക് ശേഷം ഏതെങ്കിലും സർക്കാർ അവിടെ വീണ്ടും ആദിവാസികളെ താമസിപ്പിക്കാനോ ഭൂമി നൽകാനോ ശ്രമിച്ചിട്ടുണ്ടോ എന്ന് അദ്ദേഹം ചോദിച്ചു. 'ഇതൊക്കെ വീണ്ടും ആവർത്തിക്കപ്പെടുന്നതുകൊണ്ടാണ് ഇപ്പോൾ പ്രതികരിക്കുന്നത്. ഞാൻ ഡൽഹിക്ക് പോയതോടെ സത്യം പറയാൻ ആരുമില്ലാതെയായി.' അദ്ദേഹം കൂട്ടിച്ചേർത്തു.

ഏകപക്ഷീയമായ ആക്രമണം നേരിട്ടപ്പോൾ പ്രതികരിക്കേണ്ടി വന്നുവെന്നും, ആളുകളുടെ ചോര കണ്ടാൽ തനിക്ക് സന്തോഷം വരില്ലെന്നും ആന്റണി പറഞ്ഞു. 'ജീവിതത്തിൽ ശരികളും തെറ്റുകളുമുണ്ട്. കണക്കെടുക്കേണ്ട സമയമാണ്.' അദ്ദേഹം വ്യക്തമാക്കി. കോൺഗ്രസ് ഇപ്പോൾ ഉയരങ്ങളിലേക്ക് പോവുകയാണെന്നും എല്ലാ പ്രതിപക്ഷ പാർട്ടികളുടെയും നേതാവ് രാഹുൽ ഗാന്ധിയാണെന്നും പറഞ്ഞുകൊണ്ടാണ് അദ്ദേഹം വാർത്താസമ്മേളനം അവസാനിപ്പിച്ചത്. 'താൻ മരിച്ചില്ലെങ്കിൽ അടുത്ത നിയമസഭാ തിരഞ്ഞെടുപ്പിന് ശേഷം ചില കാര്യങ്ങൾ തുറന്നുപറയും. തന്റെ രാഷ്ട്രീയ ജീവിതത്തിലുണ്ടായ ചില കാര്യങ്ങളാണ് പറയാൻ ഉദ്ദേശിക്കുന്നത്.' എന്നും അദ്ദേഹം കൂട്ടിച്ചേർത്തു.

മുൻ മുഖ്യമന്ത്രിയുടെ പ്രതികരണത്തിൽ നിങ്ങളുടെ അഭിപ്രായം എന്താണ്?

Article Summary: A.K. Antony expressed regret over police actions in Muthanga and Sivagiri, calling for the release of investigation reports to reveal the truth.

#AKAntony #Muthanga #Sivagiri #KeralaPolitics #Congress #PinarayiVijayan