'ഭർത്താവിനെ കൂട്ടി സ്റ്റേഷനിലേക്ക് വരൂ'; എ കെ ആൻ്റണിയുടെ ഭാര്യയോട് മ്യൂസിയം പോലീസ്, ഒടുവിൽ കമ്മീഷണറുടെ ഇടപെടൽ
ADVERTISEMENT
● വീട്ടിലെ അറ്റകുറ്റപ്പണിക്കായി പണം മുൻകൂർ വാങ്ങി മുങ്ങിയ ആൾക്കെതിരെയാണ് എലിസബത്ത് പരാതി നൽകിയത്
● മ്യൂസിയം എസ്ഐക്ക് ഇമെയിൽ മുഖേനയാണ് എലിസബത്ത് പരാതി സമർപ്പിച്ചത്
● വിവരം തിരുവനന്തപുരം സിറ്റി പൊലീസ് കമ്മീഷണർ അരുൺ ബി കൃഷ്ണയുടെ ശ്രദ്ധയിലെത്തിയതോടെ ഇടപെടലുണ്ടായി
● ആളറിയാതെ നിർദേശം നൽകിയതിൽ നേരിൽകണ്ട് ക്ഷമ ചോദിക്കാൻ കമ്മീഷണർ പൊലീസിനോട് നിർദേശിച്ചു
തിരുവനന്തപുരം: (KVARTHA) മുന് മുഖ്യമന്ത്രി എകെ ആന്റണിയുടെ ഭാര്യ എലിസബത്ത് അയച്ച പരാതിയില് ആളറിയാതെ 'ഭർത്താവിനെ കൂട്ടി സ്റ്റേഷനിലേക്ക് വരൂ' എന്ന് നിര്ദേശിച്ച് മ്യൂസിയം പൊലീസ്. ഇമെയിലായി എത്തിയ പരാതി പരിശോധിച്ച ഉദ്യോഗസ്ഥരന് എലിസബത്തിനെ ഫോണില് വിളിച്ച് ഭര്ത്താവിനൊപ്പം സ്റ്റേഷനില് എത്താന് ആവശ്യപ്പെടുകയായിരുന്നു.
പോലീസ് സ്റ്റേഷനിൽ സ്ത്രീകൾ പരാതി നൽകിയാൽ ഭർത്താവിനെയോ അച്ഛനെയോ സഹോദരനെയോ കൂട്ടി സ്റ്റേഷനിലേക്ക് വരാൻ നിർദേശം നൽകുന്നത് പതിവാണ്. എന്നാല് മുന് കേന്ദ്ര പ്രതിരോധ വകുപ്പ് മന്ത്രി കൂടിയായ എ കെ ആൻ്റണിയുടെ ഭാര്യ എലിസബത്തിനോടും മ്യൂസിയം പോലീസ് ഉദ്യോഗസ്ഥൻ ഇതേ നിർദേശം ആവർത്തിച്ചത് ശ്രദ്ധേയമാവുകയായിരുന്നു.
ഇമെയിൽ പരാതിയും പോലീസിൻ്റെ അശ്രദ്ധയും
വീട്ടിലെ അറ്റകുറ്റപ്പണിക്കായി പണം മുൻകൂർ വാങ്ങിയ ആൾ, പണി ചെയ്യാതെ മുങ്ങിയെന്ന് ചൂണ്ടിക്കാട്ടിയാണ് എലിസബത്ത് ഇമെയിൽ മുഖേന മ്യൂസിയം എസ്ഐക്ക് പരാതി സമർപ്പിച്ചത്. പരാതിയിൽ എലിസബത്തിൻ്റെ വിലാസത്തിനൊപ്പം 'വൈഫ് ഓഫ് എ കെ ആൻ്റണി' എന്നും വ്യക്തമായി എഴുതിയിരുന്നു.
എന്നാൽ ഇത് ശ്രദ്ധിക്കാതിരുന്ന ഉദ്യോഗസ്ഥൻ പരാതിയിൽ നൽകിയിരുന്ന മൊബൈൽ നമ്പറിൽ എലിസബത്തിനെ വിളിച്ച ശേഷം ഭർത്താവിനെയും കൂട്ടി അടുത്ത ദിവസം പോലീസ് സ്റ്റേഷനിൽ എത്താൻ ആവശ്യപ്പെടുകയായിരുന്നു. സ്റ്റേഷനിൽ വന്നശേഷം പരാതിയിൽ വേണ്ട ഇടപെടൽ നടത്താം എന്നുമായിരുന്നു പോലീസുകാരൻ്റെ മറുപടി.
കമ്മീഷണറുടെ ഇടപെടലും ഒത്തുതീർപ്പും
പോലീസുകാരൻ്റെ ഈ നിർദേശം തിരുവനന്തപുരം സിറ്റി പോലീസ് കമ്മീഷണർ അരുൺ ബി കൃഷ്ണയുടെ ശ്രദ്ധയിൽ എത്തി. അദ്ദേഹം ഉടൻ തന്നെ വിഷയത്തിൽ ഇടപെടുകയും, എലിസബത്തിനെ നേരിൽകണ്ട് ആളറിയാതെ ഇത്തരമൊരു നിർദേശം നൽകിയതിൽ ക്ഷമ ചോദിക്കാൻ പോലീസിനോട് നിർദേശിക്കുകയും ചെയ്തു. എന്നാൽ ക്ഷമയുടെ ആവശ്യമൊന്നും ഇല്ലെന്ന് പറഞ്ഞ് എലിസബത്ത് വിഷയം അവിടെ അവസാനിപ്പിച്ചു.
തുടർന്ന് എ കെ ആൻ്റണിയുടെ വീട്ടിൽ പണി നടത്താം എന്ന് പറഞ്ഞ് പണം വാങ്ങിയ ആളെ പോലീസ് കണ്ടെത്തുകയും, എത്രയും വേഗം നിർമാണം പൂർത്തിയാക്കാനുള്ള നിർദേശം നൽകുകയും ചെയ്തു.
കൂടുതല് വാർത്തകളും വിശേഷങ്ങളും അറിയാന് ഞങ്ങളുടെ ഫേസ്ബുക്ക് പേജും വാട്സ് ആപ്പ് ചാനലും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് കമൻ്റായി രേഖപ്പെടുത്തുക.
Article Summary: Museum Police in Thiruvananthapuram mistakenly asked former CM and former Defence Minister AK Antony's wife, Elizabeth to bring her husband to the station over an email complaint.
#Kvartha #KeralaPolice #AKAntony #TrivandrumNews #MuseumPolice #ElizabethAntony #ViralNewsMalayalam #MalayalamNews #SobhaNews
