പ്രകൃതിയുടെ കാമുകൻ, ചിന്തയുടെ ഉടമ: വീരേന്ദ്രകുമാർ ഓർമ്മയായിട്ട് അഞ്ച് വർഷം

ഭാമനാവത്ത്

(KVARTHA) കേന്ദ്രമന്ത്രി, കേരള മന്ത്രിസഭാംഗം, നിരവധി ധൈഷണിക ഗ്രന്ഥങ്ങളുടെ കർത്താവ്, സോഷ്യലിസ്റ്റ് നേതാവ്, ചിന്തകൻ, പ്രകൃതി സ്നേഹി, മാതൃഭൂമി മാനേജിങ് ഡയറക്ടർ എന്നീ നിലകളിൽ നിറഞ്ഞുനിന്ന എം.പി. വീരേന്ദ്രകുമാർ ഈ ലോകത്തോട് വിടപറഞ്ഞിട്ട് ഇന്ന് (മെയ് 28) അഞ്ച് വർഷം തികയുന്നു. 

രാഷ്ട്രീയക്കാർക്കിടയിലെ സാംസ്കാരിക നായകനും സാംസ്കാരിക നായകർക്കിടയിലെ തലമുത്ത രാഷ്ട്രീയക്കാരനുമായിരുന്ന അദ്ദേഹം പാർട്ടിയുടെ വലിപ്പത്തേക്കാൾ വ്യക്തിപരമായ സവിശേഷതകളാൽ കേരളത്തിൻ്റെ സാംസ്കാരിക രാഷ്ട്രീയ രംഗത്ത് തലയുയർത്തി നിന്നു.

നിയമസഭാംഗമായിരുന്ന പത്മപ്രഭ ഗൗഡരുടെയും മരുദേവി അവ്വയുടെയും മകനായി 1936 ജൂലൈ 22നാണ് വീരേന്ദ്രകുമാർ കൽപ്പറ്റയിൽ ജനിച്ചത്. 1987ൽ സംസ്ഥാന നിയമസഭാംഗമാവുകയും മന്ത്രിയാവുകയും ചെയ്തെങ്കിലും, പാർട്ടിക്കുള്ളിലെ അഭിപ്രായ വ്യത്യാസങ്ങളെ തുടർന്ന് 48 മണിക്കൂറിനകം അദ്ദേഹം മന്ത്രിസ്ഥാനം രാജിവെച്ചു. 

ഇതോടെ കേരളത്തിൽ ഏറ്റവും കുറഞ്ഞ കാലം മന്ത്രിയായ വ്യക്തി എന്ന റെക്കോർഡും അദ്ദേഹത്തിന് സ്വന്തമായി. പിന്നീട് കേന്ദ്ര ധനകാര്യ സഹമന്ത്രിയായും തൊഴിൽ വകുപ്പിൽ സ്വതന്ത്ര ചുമതലയുള്ള മന്ത്രിയായും അദ്ദേഹം പ്രവർത്തിച്ചു. കോഴിക്കോട് മണ്ഡലത്തെ പ്രതിനിധീകരിച്ച് ലോക്സഭാംഗവും രണ്ടുതവണ രാജ്യസഭാംഗവുമായിരുന്നു.

ഹൈമവതഭൂവിൽ, ബുദ്ധന്റെ ചിരി, ഗാട്ടും കാണാച്ചരടുകളും, രാമന്റെ ദുഃഖം, സമന്വയത്തിന്റെ വസന്തം എന്നിങ്ങനെ നിരവധി പഠനപരവും തത്വചിന്താപരവുമായ ഗ്രന്ഥങ്ങൾ അദ്ദേഹം രചിച്ചിട്ടുണ്ട്. നിരവധി പുരസ്കാരങ്ങളും അദ്ദേഹത്തിന് ലഭിച്ചിട്ടുണ്ട്. ഉറച്ച സോഷ്യലിസ്റ്റ് ചിന്താഗതിക്കാരനായിരുന്ന വീരേന്ദ്രകുമാറിന് സ്കൂൾ പഠനകാലത്ത് സോഷ്യലിസ്റ്റ് നേതാവ് ജയപ്രകാശ് നാരായണനാണ് പാർട്ടി അംഗത്വം നൽകിയത്. 

ഗാന്ധിജിയോടും ഗാന്ധിയൻ ആദർശങ്ങളോടും പൊതുവെ അകലം പാലിക്കുന്ന സോഷ്യലിസ്റ്റ് ചിന്താഗതിക്കാർക്കിടയിൽ ഗാന്ധിജിയെക്കുറിച്ച് ഏറെ എഴുതുകയും പ്രസംഗിക്കുകയും ചെയ്ത ഗാന്ധിയൻ സോഷ്യലിസ്റ്റായിരുന്നു വീരേന്ദ്രകുമാർ. ഗാന്ധിജിയുടെ ആത്മീയ വീക്ഷണം സോഷ്യലിസത്തിന്റെയും കമ്മ്യൂണിസത്തിന്റെയും ചുവപ്പ് കണ്ണടകളിലൂടെ നോക്കിക്കാണുന്നവർക്ക് അപരിചിതമായിരുന്നിട്ടും, ആ കണ്ണടകളില്ലാതെ ഗാന്ധിജിയെ ഉൾക്കൊള്ളാൻ അദ്ദേഹത്തിന് സാധിച്ചു.

ഗാന്ധിജിയെക്കുറിച്ച് മാത്രമല്ല, ബുദ്ധനെക്കുറിച്ചും കാലാവസ്ഥാ മാറ്റത്തെക്കുറിച്ചും സംസാരിക്കുമ്പോഴും അത് ഗാന്ധിയൻ ചിന്തകളുമായി ബന്ധിപ്പിക്കാൻ വീരേന്ദ്രകുമാറിന് എന്നും കഴിഞ്ഞിട്ടുണ്ട്. പ്രകൃതിയെക്കുറിച്ച് നിരവധി തവണ എഴുതിയ അദ്ദേഹം, അനാവശ്യമായ പ്രകൃതി ചൂഷണങ്ങൾ മൂലമാണ് ഇപ്പോഴത്തെ സംഘർഷങ്ങൾ ഉടലെടുക്കുന്നതെന്നും വാദിച്ചു. ഇവിടെയും ഗാന്ധിജിയും പ്രകൃതിയും തമ്മിലുള്ള ബന്ധത്തെ അദ്ദേഹം ഒരു ആയുധമായി ഉപയോഗിക്കുകയായിരുന്നു. 

പ്രകൃതിയെ എത്രമാത്രം വിശുദ്ധമായും പരിപാവനമായും കാണണമെന്നും വീരേന്ദ്രകുമാർ ആവർത്തിച്ച് എഴുതി. വയനാട്ടിലെ പുളിയാർ മലയിൽ പ്രകൃതിയുടെ മടിത്തട്ടിൽ ജനിച്ചു വളർന്ന അദ്ദേഹത്തിന് പ്രകൃതി തന്നെയായിരുന്നു എല്ലാം എന്ന് പറയുന്നതിന് മറ്റ് കാരണങ്ങൾ അന്വേഷിക്കേണ്ടതില്ല.

തൻ്റെ ഓരോ കൃതിയും വ്യത്യസ്ത തലങ്ങളിൽ ഉള്ളവയായിരുന്നെങ്കിലും, അദ്ദേഹത്തിന് ഏറ്റവും പ്രിയപ്പെട്ട സാഹിത്യ വിഭാഗം സഞ്ചാരസാഹിത്യം തന്നെയായിരുന്നു. ഹൈമവതഭൂവിൽ എന്ന കൃതിക്ക് കേന്ദ്ര സാഹിത്യ അക്കാദമി പുരസ്കാരം ലഭിച്ചപ്പോൾ, മലയാളത്തിൽ സഞ്ചാരസാഹിത്യത്തിന് ആദ്യമായി ലഭിക്കുന്ന അംഗീകാരമായിരുന്നു അത്.

മലയാള സാഹിത്യ സാംസ്കാരിക രാഷ്ട്രീയ ലോകത്ത് തൻ്റേതായ ശൈലിയിലൂടെ വ്യക്തിമുദ്ര പതിപ്പിച്ച എം.പി. വീരേന്ദ്രകുമാർ തൻ്റെ 88-ാം വയസ്സിൽ 2020-ൽ ഈ ലോകത്തോട് വിടപറഞ്ഞു.

എം.പി. വീരേന്ദ്രകുമാറിനെക്കുറിച്ചുള്ള ഈ ഓർമ്മക്കുറിപ്പ് നിങ്ങളുടെ അഭിപ്രായങ്ങൾ പങ്കുവെക്കുക.

Summary: M.P. Veerendra Kumar, a prominent Indian politician, writer, and environmentalist, passed away five years ago today. He was known for his socialist ideals, Gandhain principles, and contributions to Malayalam literature, especially travelogues.

#MPVeerendraKumar #KeralaPolitics #MalayalamLiterature #Environmentalist #SocialistLeader #Tribute