പുതിയ കെഎസ്ആർടിസി ബസുകൾക്ക് മോഹൻലാലിൻ്റെ വരവേൽപ്; 'ഇനി നിങ്ങളുടെ കൈകളിലാണ്, പൊന്നുപോലെ സൂക്ഷിക്കണം' എന്ന് ഗതാഗത മന്ത്രി
● കോളേജ് കാലത്തെ കെഎസ്ആർടിസി യാത്രാനുഭവങ്ങൾ താരം ഓർത്തെടുത്തു.
● ഗതാഗത മന്ത്രി കെ.ബി. ഗണേഷ് കുമാറിനെ മോഹൻലാൽ അഭിനന്ദിച്ചു.
● 'ഓർമ്മ എക്സ്പ്രസ്' എന്ന പരിപാടിയുടെ ഭാഗമായാണ് താരം ബസ് സന്ദർശിച്ചത്.
● സംവിധായകൻ പ്രിയദർശനും മണിയൻപിള്ള രാജുവും 'ഓർമ്മ എക്സ്പ്രസ്' യാത്രയിൽ പങ്കെടുത്തു.
തിരുവനന്തപുരം: (KVARTHA) വർഷങ്ങൾക്കുശേഷം കെഎസ്ആർടിസി ബസിൽ കയറിയും കോളേജ് കാലത്തെ ട്രാൻസ്പോർട്ട് ബസ് യാത്രയുടെ ഓർമകൾ പങ്കുവച്ചും നടൻ മോഹൻലാൽ. കെഎസ്ആർടിസിയുടെ ഏറ്റവും പുതിയ വോൾവോ ബസുകൾ നിരത്തിലിറക്കുന്നതിന് മുന്നോടിയായാണ് താരം ബസുകൾ കാണാൻ എത്തിയത്. കോർപറേഷന്റെ പുതിയ ബസുകളുടെ ഫ്ലാഗ് ഓഫ് ഇന്ന് വൈകുന്നേരം മുഖ്യമന്ത്രി പിണറായി വിജയൻ നിർവഹിക്കാനിരിക്കെയാണ് മോഹൻലാൽ ഈ ബസ്സുകൾ കാണാൻ എത്തിയത്. ആദ്യഘട്ടത്തിൽ കെഎസ്ആർടിസിയുടെ പുതിയ വോൾവോ ബസിൽ മോഹൻലാൽ യാത്ര ചെയ്യുമെന്ന് അറിയിച്ചിരുന്നെങ്കിലും സുരക്ഷാകാരണങ്ങളാൽ അത് മാറ്റി വെച്ചു.
ഓർമ്മകളിലേക്കുള്ള ഒരു യാത്ര
കെഎസ്ആർടിസിയുടെ റീബ്രാൻഡിങ്ങിൻ്റെ ഭാഗമായി ഓർമ്മകളിലേക്കുള്ള യാത്രകൾക്കായി 'ഓർമ എക്സ്പ്രസ്' എന്ന പേരിൽ ഒരു പരിപാടി അവതരിപ്പിച്ചിരുന്നു. ഇതിൻ്റെ ഭാഗമായാണ് പുതിയ ബസുകൾക്ക് മോഹൻലാൽ വരവേൽപ്പ് നൽകിയത്. 'ഓർമ എക്സ്പ്രസിൻ്റെ' ആദ്യ യാത്രയിൽ ബുധനാഴ്ച സംവിധായകൻ പ്രിയദർശൻ, നടനും നിർമ്മാതാവുമായ മണിയൻ പിള്ള രാജു, നടൻ നന്ദു, ഹരി പത്തനാപുരം എന്നിവരും ഗതാഗതമന്ത്രി ഗണേഷ് കുമാറിനോടൊപ്പം സഞ്ചരിച്ചിരുന്നു.
'കെഎസ്ആർടിസിയുടെ പുതിയ ബസുകൾ വരുമെന്ന് പറഞ്ഞു, വന്നു.. ഇന്നലെ ലാലേട്ടനെ കൂടി കൊണ്ടുവരണമെന്ന് നിങ്ങൾ ആവശ്യപ്പെട്ടു.. ഇന്ന് ലാലേട്ടനും...'- എന്നു പറഞ്ഞാണ് മന്ത്രി കെബി ഗണേഷ് കുമാർ ഫെയ്സ്ബുക്കിൽ കുറിപ്പ് പങ്കുവെച്ചത്. പുതിയ ബസുകൾ ഇനി നിങ്ങളുടെ കൈകളിലാണെന്നും പൊന്നുപോലെ വൃത്തിയായി സൂക്ഷിക്കണമെന്നും അദ്ദേഹം കുറിപ്പിൽ കൂട്ടിച്ചേർത്തു.
'പഴയ കോളേജ് കാലം ഓർമ്മ വന്നു'
പുതിയ ബസുകൾ സന്ദർശിച്ച മോഹൻലാൽ കെഎസ്ആർടിസിയുടെ ഗതാഗത സംവിധാനത്തെ അഭിനന്ദിച്ചു. 'പണ്ട് കെഎസ്ആർടിസിയിൽ ധാരാളം സഞ്ചരിച്ചിട്ടുണ്ട്. അന്ന് ഇത്തരം ബസുകളൊന്നും ഇല്ലായിരുന്നു. ഇപ്പോൾ ഗതാഗതം എന്നത് ഗംഭീരമായി മാറിയിരിക്കുകയാണ്. യാത്രക്കാർക്ക് കൂടുതൽ സൗകര്യപ്രദമായ ഒരു ഗതാഗത സംവിധാനം കൊണ്ടുവരാൻ ഗണേഷ് കുമാറിന് സാധിച്ചു എന്നാണ് ഞാൻ കരുതുന്നത്. എൻ്റെ സുഹൃത്തും കുടുംബ സുഹൃത്തും ആയതുകൊണ്ട് പറയുകയല്ല. അദ്ദേഹം കെഎസ്ആർടിസിക്ക് വേണ്ടി ഒരുപാട് നല്ല കാര്യങ്ങൾ ചെയ്യുന്നുണ്ട്,' മോഹൻലാൽ പറഞ്ഞു. ബസിൽ കയറിയപ്പോൾ പഴയ കോളേജ് കാലം ഓർമ്മ വന്നോ എന്ന ചോദ്യത്തിന്, 'ബസ് കാണുമ്പോൾത്തന്നെ ആ ഓർമ്മകൾ മനസ്സിലേക്ക് വരുമെന്നായിരുന്നു,' മോഹൻലാലിൻ്റെ മറുപടി.
പുതിയ ബസുകൾ കാണുന്നതിനായി മോഹൻലാൽ ആക്കുളത്തുനിന്ന് കുറച്ചുദൂരം യാത്ര ചെയ്യുമെന്ന് ആദ്യം അറിയിച്ചിരുന്നെങ്കിലും സുരക്ഷാ ക്രമീകരണങ്ങളുടെ ഭാഗമായി ആ യാത്ര മാറ്റിവെക്കുകയായിരുന്നു.
പുതിയ കെഎസ്ആർടിസി ബസുകളെക്കുറിച്ച് നിങ്ങളുടെ അഭിപ്രായം ഇവിടെ രേഖപ്പെടുത്തുക.
Article Summary: Mohanlal's visit to KSRTC's new buses goes viral.
#Mohanlal #KSRTC #Kerala #GaneshKumar #OrmaExpress #Transport
