91 93 ആയി; 'എല്‍ഡിഎഫ് സര്‍ക്കാര്‍ അംഗബലം കൂട്ടുന്നത് തെരഞ്ഞെടുപ്പിലൂടെയാണ്, അല്ലാതെ ചാക്കിട്ട് പിടിച്ചല്ല'; മരണമാസ് ഡയലോഗുമായി എംഎം മണി

തിരുവനന്തപുരം: (www.kvartha.com 24.10.2019) ഉപതെരഞ്ഞെടുപ്പിലെ ഉജ്ജ്വല വിജയങ്ങളോടെ 91ല്‍ തുടങ്ങി 93ലേക്ക് എത്തിയിരിക്കുന്നു നിയമസഭയിലെ ഇടതുപക്ഷത്തിന്റെ അംഗസംഖ്യ. യുഡിഎഫ് കാലങ്ങളായി അരങ്ങ് വാണ മണ്ഡലങ്ങളാണ് എല്‍ഡിഎഫ് തൂത്തുവാരിയത്. പാലായ്ക്ക് ശേഷം വട്ടിയൂര്‍ക്കാവിലും കോന്നിയിലും ചെങ്കൊടി നാട്ടിയതോടെ ആഘോഷത്തിമിര്‍പ്പിലാണ് ഇടതുകേന്ദ്രങ്ങള്‍. ഉപതെരഞ്ഞെടുപ്പിലെ ഈ ഉജ്ജ്വല വിജയത്തിന്റെ അടിസ്ഥാനത്തില്‍ ബിജെപിയെ ട്രോളി രംഗത്ത് വന്നിരിക്കുകയാണ് വൈദ്യുത മന്ത്രി എംഎം മണി. ഫേസ്ബുക്കിലൂടെയാണ് അദ്ദേഹം പരിഹസ3സവുമായി രംഗത്തെത്തിയത്.

'എല്‍ഡിഎഫ് സര്‍ക്കാര്‍ അംഗബലം കൂട്ടുന്നത് തെരഞ്ഞെടുപ്പിലൂടെയാണ്, അല്ലാതെ ചാക്കിട്ട് പിടിച്ചല്ല'. കര്‍ണാടകയില്‍ ഭരണം ഉറപ്പിക്കാന്‍ കേന്ദ്രമന്ത്രി അമിത് ഷാ നടത്തിയ കുതിരക്കച്ചവടത്തെ ബന്ധപ്പെടുത്തിയാണ് മന്ത്രിയുടെ ട്രോള്‍. സംഭവം ഇപ്പോള്‍ സമൂഹമാധ്യമങ്ങളില്‍ തരംഗം സൃഷ്ടിക്കുകയാണ്.