എന്‍ഡോസള്‍ഫാന്‍ ചര്‍ച: മുഖ്യമന്ത്രിയെ അപമാനിച്ചെന്ന് എം.എല്‍.എമാര്‍
Aug 25, 2012, 18:41 IST
സമരസമിതിയുടെ മുന്‍നിര നേതാക്കള്‍ ചര്‍ചയില്‍ നിന്നും മാറിനിന്ന് ചില സ്ത്രീകളെമാത്രം മുഖ്യമന്ത്രിയുമായുള്ള ചര്‍ചയ്ക്ക് അയക്കുകയായിരുന്നു. മുഖ്യമന്ത്രിക്കുപുറമെ മന്ത്രി എം.കെ. മുനീര്‍, എം.എല്‍.എ. മാരായ ഇ. ചന്ദ്രശേഖരന്‍, പി.ബി. അബ്ദുര്‍ റസാഖ്, എന്‍.എ. നെല്ലിക്കുന്ന് എന്നിവരാണ് ചര്‍ചയില്‍ സംബന്ധിച്ചത്. ഇവരുടെ ആവശ്യങ്ങളെല്ലാം മുഖ്യമന്ത്രി അനുഭാവപൂര്‍വമാണ് കേട്ടത്. നേരത്തെ തന്നെ ചര്‍ചയ്ക്കുള്ള സമയം നിശ്ചിയിച്ച് ഉറപ്പിച്ചിരുന്നു. തങ്ങള്‍ മുന്‍കൈയെടുത്താണ് മുഖ്യമന്ത്രിയുമായുള്ള ചര്‍ചയ്ക്ക് വേദിയൊരുക്കിയതെന്ന് എം.എല്‍.എമാര്‍ പറഞ്ഞു.
പെരുന്നാളിനും ഓണത്തിനും നമ്മുടെ സഹോദരിമാര്‍ നിരാഹാര സമരം നടത്തുന്നത് വേദനാജനകമായ കാര്യംതന്നെയാണ്. നേരത്തെ സാമൂഹ്യ ക്ഷേമ വകുപ്പ് മന്ത്രി സമരപന്തല്‍ സന്ദര്‍ശിച്ച് സമരക്കാരുമായി സംസാരിച്ചിരുന്നു. ഏത് സമയത്തും ചര്‍ചയ്ക്ക് തയ്യാറാണെന്ന് മന്ത്രി അറിയിക്കുകയും ചെയ്തിരുന്നു. 23ന് മുഖ്യമന്ത്രിയുമായുള്ള ചര്‍ചയ്ക്ക് സമയം നിശ്ചയിച്ചകാര്യം മൂന്ന് ദിവസം മുമ്പ് തന്നെ സമരസമിതി നേതാക്കളെ അറിയിച്ചിരുന്നു. ഇവര്‍ സമ്മതം പ്രകടിപ്പിക്കുകയും ചെയ്തിരുന്നു. ചര്‍ചയ്ക്ക് നാല് പുരുഷന്മാരേയും രണ്ട് സ്ത്രീകളേയും അയക്കാനാണ് അവരുടെ മിനുട്‌സില്‍ രേഖപ്പെടുത്തിയതെന്ന് എം.എല്‍.എമാര്‍ പറഞ്ഞു.
മുഖ്യമന്ത്രി ചര്‍ചയ്ക്ക് ക്ഷണിച്ച് മണിക്കൂറുകളോളം ഇവരെ കാത്തുനിര്‍ത്തിയെന്ന ആരോപണം ശരിയല്ല. 23ന് വൈകീട്ട് നിയമസഭയുടെ വാര്‍ഷികാഘോഷ പിരിപാടിയുടെ യോഗവും അതിനുശേഷം മന്ത്രിസഭായോഗവും കഴിഞ്ഞ് സമരസമി നേതാക്കളുമായുള്ള ചര്‍ച നടത്താമെന്നാണ് നിശ്ചയിച്ചിരുന്നത്. രാത്രി എട്ട് മണിക്കാണ് ചര്‍ചയ്ക്ക് മുഖ്യമന്ത്രിയുടെ ഓഫീസിലെത്താന്‍ ആവശ്യപ്പെട്ടിരുന്നത്.
പരശുറാം എക്‌സ്പ്രസിലാണ് കാസര്‍കോട് നിന്നും സമരസമിതി പ്രവര്‍ത്തകര്‍ തിരുവനന്തപുരത്തെത്തിയത്. ആറ് മണി കഴിഞ്ഞാണ് വണ്ടി തിരുവനന്തപുരത്തെത്തുക. ഇവര്‍ മുറിയില്‍ ചെന്ന് വിശ്രമിച്ച് മുഖ്യമന്ത്രിയെകാണാനെത്തിയത് എട്ട് മണിക്കാണ്. അല്‍പം കഴിഞ്ഞ് മുഖ്യമന്ത്രി ഇവരെ ചര്‍ചയക്ക് ക്ഷണിക്കുകയും ചെയ്തു. ഏതാനും സ്ത്രീകള്‍മാത്രമാണ് ചേമ്പറില്‍ എത്തിയത്. സമരത്തിന് മുന്‍പന്തിയിലുണ്ടായിരുന്നവര്‍ ഒളിച്ചോട്ടം നടത്തുകയാണ് ചെയ്തത്. സമരസമിതിയുടെ പ്രധാനനേതാവ് തിരുവനന്തപുരത്ത് ഉണ്ടായിരുന്നുവെങ്കിലും ചര്‍ചയ്ക്ക് വന്നില്ല. ഇതിനുപിന്നില്‍ ഏതോ ഹിഡന്‍ അജണ്ടയുണ്ടെന്ന് സംശയിക്കേണ്ടതുണ്ട്.
ചര്‍ചയ്‌ക്കെത്തിയ സ്ത്രീകളെ വളരെ സൗഹാര്‍ദ്ദപരമായാണ് മുഖ്യമന്ത്രി സ്വീകരിച്ചത്. 45 മിനുട്ടുനേരം ഇവരുമായി സംസാരിച്ചു. ഇവരുടെ പ്രധാന ആവശ്യം എന്‍ഡോസള്‍ഫാന്‍ ബാധിതരുടെ മുഴുവന്‍ കടങ്ങളും എഴുതിതള്ളണമെന്നായിരുന്നു. കടങ്ങള്‍ സംബന്ധിച്ച് പരിശോധന ആവശ്യമാണെന്നും എഴുതിതള്ളാന്‍ പറ്റുന്ന കടങ്ങളാണെന്ന് ബോധ്യപ്പെട്ടാല്‍ അത് ചെയ്യാമെന്നും മുഖ്യമന്ത്രി ഉറപ്പുനല്‍കിയിരുന്നു. കൂടുതല്‍ ചര്‍ചയ്ക്ക് മന്ത്രി എം.കെ. മുനീറിനെയും ജില്ലയുടെ ചുമതലയുള്ള കെ.പി. മോഹനനേയും എം.പി., എം.എല്‍.എമാര്‍, ജില്ലാ പഞ്ചായത്ത് പ്രസിഡന്റ് എന്നിവരുടെ സാന്നിദ്ധ്യത്തില്‍ കാസര്‍കോട്ടേക്ക് ചര്‍ചയ്ക്ക് അയക്കാമെന്നും മുഖ്യമന്ത്രി അറിയിച്ചിരുന്നു. എന്നാല്‍ കടങ്ങള്‍ എഴുതിതള്ളുന്ന കാര്യത്തില്‍ ഇപ്പോള്‍ തന്നെ മുഖ്യമന്ത്രി തീരുമാനം പ്രഖ്യാപിക്കണമെന്ന് ഇവര്‍ വാശിപിടിക്കുകയായിരുന്നു.
ഇതിനുശേഷം ഇവര്‍ മുഖ്യമന്ത്രിയുടെ ക്യാബിനില്‍ കുത്തിയിരിപ്പ് നടത്തുകയും ചെയ്തു. ഇവര്‍ മാധ്യമപ്രവര്‍ത്തകരോട് പറഞ്ഞത് മുഖ്യമന്ത്രി തങ്ങളെ ചര്‍ചയ്ക്ക് വിളിച്ച് അപമാനിച്ചു എന്നാണ്. യഥാര്‍ത്ഥത്തില്‍ ചര്‍ചയ്ക്ക് മുന്‍കൈഎടുത്ത മുഖ്യമന്ത്രിയെയാണ് ഇവര്‍ അപമാനിച്ചത്. തെറ്റിധാരണപരത്തുന്ന പ്രസ്താവനകളാണ് ഇവര്‍ മുഖ്യമന്ത്രിയെകുറിച്ച് നടത്തിയത്. ഇതെല്ലാം അദ്ദേഹത്തെ അപമാനിക്കലാണ്. എന്‍ഡോസള്‍ഫാന്‍ ഇരകളോട് മനുഷ്യത്വപരമായ സമീപനമാണ് മുഖ്യമന്ത്രിയുടെ ഭാഗത്തുനിന്നും ഉണ്ടായതെന്ന് എല്ലാവര്‍കും അറിയാവുന്ന കാര്യമാണ്. ദേശീയ മനുഷ്യാവകാശ കമ്മീഷന്‍ നിര്‍ദ്ദേശിച്ച മുഴുവന്‍ കാര്യങ്ങളും നടപ്പിലാക്കുമെന്ന് മുഖ്യമന്ത്രി വ്യക്തമാക്കുകയും ചെയ്തിട്ടുണ്ട്. എന്‍ഡോസള്‍ഫാന്‍ മൂലം മരിച്ച രോഗികളുടെ ആശ്രിതര്‍ക്ക് കഴിഞ്ഞ ഗവണ്‍മെന്റ് 50,000 രൂപയാണ് സഹായം നല്‍കിയിരുന്നത്. യു.ഡി.എഫ്. സര്‍കാര്‍ അധികാരം ഏറ്റഉടനെ ഇത് ഒരു ലക്ഷം രൂപയായി വര്‍ദ്ധിപ്പിച്ചു.
എന്‍ഡോസള്‍ഫാന്‍ മൂലം മരിച്ചവര്‍ക്കുള്ള സഹായം അഞ്ച് ലക്ഷം രൂപ നല്‍കാന്‍ ഗവണ്‍മെന്റ് തീരുമാനിച്ചിട്ടുണ്ട്. എന്‍ഡോസള്‍ഫാന്‍ രോഗികള്‍ക്ക് സഹായംനല്‍കുന്ന കാര്യത്തില്‍ ക്യാന്‍സര്‍ രോഗികളുടെയും മാനസിക വൈകല്യമുള്ളവരുടെയും കാര്യങ്ങള്‍ മനുഷ്യാവകാശ കമ്മീഷന്‍ വ്യക്തമാക്കാത്തതിനാല്‍ ഇവര്‍ക്കുകൂടി സഹായം ലഭിക്കാന്‍ ഗവണ്‍മെന്റ് ഓര്‍ഡര്‍ ഇറക്കാന്‍ യാതൊരു എതിര്‍പും ഇല്ലെന്ന് സര്‍കാര്‍ അറിയിച്ചിട്ടുണ്ട്. ലിസ്റ്റില്‍ ഉള്‍പെട്ട അര്‍ഹതയുള്ളവരെ ഒഴിവാക്കുന്നതിനെ ശക്തമായി എതിര്‍കും. എന്നാല്‍ അനര്‍ഹര്‍ ഉള്‍പെട്ടിട്ടുണ്ടെങ്കില്‍ അവരെ ഒഴിവാക്കേണ്ടതുണ്ടെന്നും എം.എല്‍.എമാര്‍ കൂട്ടിച്ചേര്‍ത്തു.
Keywords: Kasaragod, Kerala, Press meet, Oommen Chandy, Endosulfan, Meet, M.K.Muneer, N.A. Nellikunnu, P.B. Abdul Razak
ഇവിടെ വായനക്കാർക്ക് അഭിപ്രായങ്ങൾ
രേഖപ്പെടുത്താം. സ്വതന്ത്രമായ
ചിന്തയും അഭിപ്രായ പ്രകടനവും
പ്രോത്സാഹിപ്പിക്കുന്നു. എന്നാൽ
ഇവ കെവാർത്തയുടെ അഭിപ്രായങ്ങളായി
കണക്കാക്കരുത്. അധിക്ഷേപങ്ങളും
വിദ്വേഷ - അശ്ലീല പരാമർശങ്ങളും
പാടുള്ളതല്ല. ലംഘിക്കുന്നവർക്ക്
ശക്തമായ നിയമനടപടി നേരിടേണ്ടി
വന്നേക്കാം.
