തിരുവനന്തപുരം: (KVARTHA) കേരളത്തിലെ ന്യൂനപക്ഷ വിഭാഗങ്ങൾക്ക് ഇനി മുതൽ വാട്‌സ്ആപ്പിൽ പരാതി നൽകാം. സംസ്ഥാന ന്യൂനപക്ഷ കമ്മീഷനാണ് ഈ സൗകര്യം ഒരുക്കിയിരിക്കുന്നത്. ഈ പുതിയ സംവിധാനം കേരളപ്പിറവി ദിനത്തിൽ ഉദ്ഘാടനം ചെയ്തു. ഇനി മുതൽ ലോകത്തിന്റെ ഏത് കോണിൽ നിന്നും കേരളത്തിലെ ന്യൂനപക്ഷ വിഭാഗക്കാർക്ക് തങ്ങളുടെ പ്രശ്‌നങ്ങൾ കമ്മീഷനിൽ എത്തിക്കാം. കേരള ന്യൂനപക്ഷ ക്ഷേമ വകുപ്പ് ഡയറക്ടർ ഡോ. രേണുരാജ് ഐ.എ.എസ് വാട്ട്‌സ് ആപ്പിലൂടെ ആദ്യ പരാതി സ്വീകരിച്ചു. 

നമ്മുടെ രാജ്യം സ്വാതന്ത്ര്യം നേടിയ കാലം മുതൽ, എല്ലാ ജനവിഭാഗങ്ങൾക്കും തുല്യ അവകാശങ്ങളും നീതിയും ഉറപ്പാക്കാൻ നിയമങ്ങൾ ഉണ്ടായിട്ടുണ്ട്. കേരളത്തിലെ മുസ്‌ലിം, ക്രിസ്ത്യൻ, ബുദ്ധ, ജൈന, പാഴ്‌സി, സിഖ് സമൂഹങ്ങളിലെ ആളുകൾക്കുള്ള ഈ അവകാശങ്ങൾ സംരക്ഷിക്കുക എന്നത് ന്യൂനപക്ഷ കമ്മീഷന്റെ പ്രധാന ലക്ഷ്യമാണ്. ഈ ലക്ഷ്യത്തിൽ ഒരു വലിയ നാഴികക്കല്ലാണ് ഇന്ന് നാം നേടിയത്. കേരളപ്പിറവി ദിനത്തിൽ, ന്യൂനപക്ഷ കമ്മീഷൻ ആദ്യമായി വാട്‌സ്ആപ്പ് വഴി പരാതികൾ സ്വീകരിക്കാൻ തുടങ്ങിയിരിക്കുന്നു. 9746515133 എന്ന നമ്പറിൽ സന്ദേശം അയച്ചുകൊണ്ട് ആർക്കും തങ്ങളുടെ പ്രശ്‌നങ്ങൾ നേരിട്ട് കമ്മീഷനിൽ അറിയിക്കാം എന്നത് സന്തോഷകരമായ വാർത്തയാണ്. ഇത് ന്യൂനപക്ഷ വിഭാഗങ്ങളിലെ ആളുകൾക്ക് വലിയൊരു ആശ്വാസമായിരിക്കും എന്ന് പ്രതീക്ഷിക്കുന്നതായും ഡോ. രേണുരാജ് ഐ.എ.എസ് പറഞ്ഞു.

കമ്മീഷൻ ചെയർമാൻ അഡ്വ. എ.എ റഷീദ് അദ്ധ്യക്ഷത വഹിച്ചു. കമ്മീഷന്റെ പ്രവർത്തനങ്ങൾ ജനങ്ങളെ കൂടുതൽ അടുത്ത് കൊണ്ടുവരുന്നതിന്റെ ഭാഗമായി വാട്‌സ്ആപ്പ് വഴി പരാതി നൽകുന്ന സംവിധാനം ആരംഭിച്ചിരിക്കുകയാണെന്ന് അദ്ദേഹം അറിയിച്ചു. ഇത് സംസ്ഥാനത്തെ ന്യൂനപക്ഷ വിഭാഗത്തിലെ 46 ശതമാനം ആളുകൾക്ക് സാമ്പത്തിക ബാധ്യതയില്ലാതെ തങ്ങളുടെ പ്രശ്‌നങ്ങൾ നേരിട്ട് കമ്മീഷനിൽ എത്തിക്കാൻ സഹായിക്കും. ലഭിക്കുന്ന പരാതികൾ വിശദമായി പരിശോധിച്ച് ആവശ്യമായ തെളിവുകൾ ശേഖരിച്ച ശേഷം ഉത്തരവുകൾ പുറപ്പെടുവിക്കുകയും അതിനെത്തുടർന്നുള്ള നടപടികൾ നിരീക്ഷിക്കുകയും ചെയ്യും.

കമ്മീഷൻ അംഗങ്ങളായ എ. സൈഫുദ്ദീൻ ഹാജി, പി. റോസ, മെമ്പർ സെക്രട്ടറി നിസാർ എച്ച്, രജിസ്ട്രാർ ഗീത എസ് എന്നിവർ സംസാരിച്ചു. വിവിധ ന്യൂനപക്ഷ സംഘടനാ നേതാക്കൾ സംബന്ധിച്ചു.

#KeralaMinorityCommission #WhatsAppComplaints #KeralaPiravi #DigitalServices #MinorityRights #CommunityWelfare