ഉത്തര മലബാറിലെ വൈദ്യുതി പരാതികൾക്ക് വേഗത്തിൽ പരിഹാരം കാണണം; നിയോജകമണ്ഡലം തല കമ്മിറ്റികൾ സജീവമാക്കാൻ മന്ത്രി സണ്ണി ജോസഫിൻ്റെ നിർദേശം

കണ്ണൂർ: (KVARTHA) വൈദ്യുതി മുടക്കം, വോൾട്ടേജ് ക്ഷാമം, മഴക്കാലത്തെ മറ്റ് പ്രശ്നങ്ങൾ എന്നിവയുമായി ബന്ധപ്പെട്ട ജനങ്ങളുടെ പരാതികൾക്ക് വേഗത്തിൽ പരിഹാരം കാണാൻ എംഎൽഎമാരുടെ നേതൃത്വത്തിലുള്ള നിയോജകമണ്ഡലം തല കമ്മിറ്റികൾ സജീവമാക്കണമെന്ന് വൈദ്യുതി മന്ത്രി അഡ്വ. സണ്ണി ജോസഫ് നിർദേശിച്ചു. 

കണ്ണൂർ, കാസർകോട്, വയനാട് ജില്ലകൾ ഉൾപ്പെട്ട കെഎസ്ഇബിയുടെ ഉത്തര മലബാർ മേഖലാ പ്രവർത്തനങ്ങൾ അവലോകനം ചെയ്യുന്നതിനായി വിളിച്ചുചേർത്ത പ്രത്യേക യോഗത്തിൽ സംസാരിക്കുകയായിരുന്നു മന്ത്രി. ജനങ്ങൾ ഫോൺ വഴി ഉന്നയിക്കുന്ന പരാതികൾ പരിഹരിക്കുന്നതിൽ ഉദ്യോഗസ്ഥർ കൂടുതൽ ജാഗ്രത പുലർത്തണം. 

അറ്റകുറ്റപ്പണികൾ കാരണമോ പെട്ടെന്നുണ്ടായ മറ്റ് സംഭവങ്ങൾ മൂലമോ വൈദ്യുതി മുടങ്ങുകയാണെങ്കിൽ, അക്കാര്യം പ്രാദേശിക തലത്തിലുള്ള വാട്സാപ്പ് ഗ്രൂപ്പുകൾ, വെബ്സൈറ്റ്, വാർത്താ മാധ്യമങ്ങൾ എന്നിവ വഴി ഉപഭോക്താക്കളെ കൃത്യമായി അറിയിക്കണമെന്നും അദ്ദേഹം വ്യക്തമാക്കി.

മൂന്ന് ബെസ് പദ്ധതികൾ മാർച്ചോടെ പൂർത്തിയാകും

പകൽ സമയങ്ങളിൽ സൗരോർജ്ജം ബാറ്ററിയിൽ സംഭരിച്ച് രാത്രിയിലെ പീക്ക് സമയങ്ങളിൽ വിതരണം ചെയ്യുന്ന ബാറ്ററി എനർജി സ്റ്റോറേജ് സിസ്റ്റം (ബെസ്) ഉൾപ്പെടുന്ന മൂന്ന് പദ്ധതികൾ അടുത്ത മാർച്ചിന് മുൻപായി കമ്മീഷൻ ചെയ്യാൻ സാധിക്കുമെന്ന് വൈദ്യുതി വകുപ്പ് ഉദ്യോഗസ്ഥർ യോഗത്തിൽ അറിയിച്ചു. ഇതിൽ കേരളത്തിലെ ആദ്യത്തെ ബെസ് പദ്ധതി കാസർകോട് മൈലാട്ടിയിൽ ഈ ഡിസംബറിൽ കമ്മീഷൻ ചെയ്യും. 

രാത്രി നാല് മണിക്കൂർ നേരം വിതരണം ചെയ്യാനായി 125 മെഗാവാട്ട് വൈദ്യുതിയാണ് ഈ പദ്ധതിയിൽ നിന്നും ഉൽപ്പാദിപ്പിക്കുക. ഇതിന് പുറമെ കണ്ണൂരിലെ ശ്രീകണ്ഠാപുരം പദ്ധതിക്ക് 160 എം.ഡബ്ല്യു.എച്ച്. ശേഷിയും കാസർകോട്ടെ മുള്ളേരിയയിലുള്ള പദ്ധതിക്ക് 60 എം.ഡബ്ല്യു.എച്ച്. ശേഷിയുമാണുള്ളത്. 

സർക്കാർ സ്ഥലം വിട്ടുനൽകുകയും സ്വകാര്യ കമ്പനി സൗരോർജ്ജം സംഭരിച്ച് രാത്രിയിലെ നാല് മണിക്കൂർ നേരം വിതരണം ചെയ്യുകയും ചെയ്യുന്നതാണ് പദ്ധതി. ഇതുവഴി സർക്കാരിന് യൂണിറ്റിന് ഏഴ് രൂപയുടെ അടുത്ത് മാത്രമേ ചിലവ് വരുന്നുള്ളൂ.

ജനപ്രതിനിധികളുടെ ആവശ്യങ്ങൾ

യോഗത്തിൽ വിവിധ മണ്ഡലങ്ങളിലെ എംഎൽഎമാരും ജനപ്രതിനിധികളും തങ്ങളുടെ പ്രദേശത്തെ പ്രശ്നങ്ങൾ മന്ത്രിയുടെ ശ്രദ്ധയിൽപ്പെടുത്തി. കണ്ണൂർ നഗരത്തിൽ കെഎസ്ഇബി അധികൃതർ ലൈനിലേക്ക് ചാഞ്ഞ മരച്ചില്ലകൾ വെട്ടി റോഡിൽ ഉപേക്ഷിച്ചു പോകുന്ന സംഭവങ്ങളുണ്ടെന്ന് കണ്ണൂർ എംഎൽഎ ടി. ഒ. മോഹനൻ ചൂണ്ടിക്കാട്ടി. 

കോർപ്പറേഷൻ ഭൂമിയിൽ നൂറുകണക്കിന് കെഎസ്ഇബി പോസ്റ്റുകൾ അനാഥമായി കിടന്ന് സ്ഥലം മുടക്കുന്ന വിഷയം മേയർ അഡ്വ. പി. ഇന്ദിര ഉന്നയിച്ചു. കല്ല്യാശ്ശേരി മണ്ഡലത്തിലെ അഞ്ച് ഗ്രാമപഞ്ചായത്തുകളിൽ ഓവർലോഡ് കാരണം വൈദ്യുതി മുടങ്ങുന്ന സ്ഥിതിയുണ്ടെന്നും അവിടെ 33 കെ.വി. സബ്സ്റ്റേഷൻ അടിയന്തരമായി സ്ഥാപിക്കണമെന്നും എം. വിജിൻ എംഎൽഎ ആവശ്യപ്പെട്ടു. 

വൈദ്യുതി പോസ്റ്റുകൾ റോഡിലോ ഓവുചാലിലോ വീണ് അപകടങ്ങൾ ഉണ്ടാകുന്ന സാഹചര്യങ്ങളിൽ സാങ്കേതികതകൾ നോക്കാതെ വേഗത്തിൽ പരിഹാരം കാണേണ്ടതുണ്ടെന്ന് തളിപ്പറമ്പ് എംഎൽഎ ടി. കെ. ഗോവിന്ദൻ ചൂണ്ടിക്കാട്ടി. കൂടുതൽ ഉപഭോക്താക്കൾ സോളാർ സംവിധാനത്തിലേക്ക് മാറുമ്പോൾ ട്രാൻസ്ഫോമറുകൾക്ക് അത് താങ്ങാനുള്ള ശേഷിയില്ലെന്നും അതിനാൽ അവയുടെ ശേഷി വർധിപ്പിക്കണമെന്നും തലശ്ശേരി എംഎൽഎ കാരായി രാജൻ ഉന്നയിച്ചു.

പാറാട്, കല്ലിക്കണ്ടി ഭാഗങ്ങളിൽ നിർദേശിക്കപ്പെട്ട 110 കെ.വി. സബ്സ്റ്റേഷൻ വേഗത്തിൽ സ്ഥാപിക്കണമെന്ന് കൂത്തുപറമ്പ് എംഎൽഎ പി. കെ. പ്രവീൺ ആവശ്യപ്പെട്ടു. കോളയാട് ഗ്രാമപഞ്ചായത്തിലെ വനമേഖലയിലൂടെ കടന്നുപോകുന്ന വൈദ്യുതി ലൈനിലേക്ക് ചാഞ്ഞ മരം വെട്ടാൻ വനംവകുപ്പിൻ്റെ അനുമതി ആവശ്യമാണെന്നും ഇക്കാര്യത്തിൽ അടിയന്തര തീരുമാനം ഉണ്ടാകണമെന്നും മട്ടന്നൂർ എംഎൽഎ വി. എസ്. സനോജ് പറഞ്ഞു. 

കാസർകോട് ജില്ലയിൽ സബ്സ്റ്റേഷനുകൾ കുറവാണെന്നും ബോവിക്കാനത്ത് സെക്ഷൻ ഓഫീസ് സ്ഥാപിക്കണമെന്നും ഉദുമ എംഎൽഎ കെ. നീലകണ്ഠൻ ഉന്നയിച്ചു. വയനാട് ജില്ലയ്ക്ക് അടിയന്തരമായി വൈദ്യുതി ഭവൻ അനുവദിക്കണമെന്ന് സുൽത്താൻബത്തേരി എംഎൽഎ ഐ. സി. ബാലകൃഷ്ണൻ ആവശ്യപ്പെട്ടു.

മൂന്ന് ജില്ലകളിലേയും പ്രശ്നങ്ങളും വെല്ലുവിളികളും ഉദ്യോഗസ്ഥർ മന്ത്രിക്ക് മുൻപാകെ അവതരിപ്പിച്ചു. മഴക്കാലത്ത് രാത്രികളിൽ ഒരു അധിക ലൈൻമാൻ്റെ ഡ്യൂട്ടി അനുവദിക്കുന്നതിനുള്ള പ്രൊപ്പോസൽ തയ്യാറാക്കി നൽകാൻ മന്ത്രി സണ്ണി ജോസഫ് ഉദ്യോഗസ്ഥർക്ക് നിർദേശം നൽകി. 

യോഗത്തിൽ എംഎൽഎമാരായ കെ. വി. സുമേഷ്, വി. കുഞ്ഞികൃഷ്ണൻ, വയനാട് ജില്ലാ പഞ്ചായത്ത് പ്രസിഡൻ്റ് ചന്ദ്രിക കൃഷ്ണൻ, കെഎസ്ഇബി നോർത്ത് മലബാർ റീജ്യൻ ചീഫ് എൻജിനീയർ ടി. എസ്. ജയശ്രീ, മറ്റ് വൈദ്യുത ഉദ്യോഗസ്ഥർ എന്നിവർ പങ്കെടുത്തു.

വൈദ്യുതി വിതരണവുമായി ബന്ധപ്പെട്ട ഈ വാർത്ത സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. പുതിയ അറിയിപ്പുകൾ അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. 

Article Summary: Electricity Minister Sunny Joseph directed officials to activate constituency-level committees to resolve power issues swiftly during a KSEB North Malabar review meeting, where upcoming Battery Energy Storage System projects and various infrastructural demands from MLAs were also discussed.

#KSEB #KeralaElectricity #SunnyJoseph #NorthMalabar #KannurNews #KasaragodNews #WayanadNews #AmmuNews