Appeal | വയനാട് ഉരുള് പൊട്ടല് ദുരന്തത്തിന്റെ പശ്ചാത്തലത്തില് മാധ്യമങ്ങളോട് അപേക്ഷയുമായി മന്ത്രി വീണാ ജോര്ജ്; ഈയൊരു കാര്യം കൂടി ദയവായി പരിഗണിക്കുമല്ലോ എന്നും അഭ്യര്ഥന
ADVERTISEMENT
മരണമടഞ്ഞ കൂട്ടുകാരെക്കുറിച്ചോ വീട്ടുകാരെക്കുറിച്ചോ തകര്ന്ന സ്കൂളിനെക്കുറിച്ചോ കുട്ടികളെക്കൊണ്ട് ദയവായി ഈ അവസരത്തില് പറയിക്കാതിരിക്കുക.
കുഞ്ഞുങ്ങളുടെ ഐഡന്റിറ്റി ഡിസ്ക്ലോസ് ചെയ്യുന്നുണ്ടെങ്കില് അവരുടെ മാതാപിതാക്കളുടേയോ രക്ഷകര്ത്താക്കളുടേയോ അനുവാദത്തോടെ മാത്രം ചെയ്യുക.
വയനാട്: (KVARTHA) ഉരുള് പൊട്ടല് ദുരന്തത്തിന്റെ പശ്ചാത്തലത്തില് മാധ്യമങ്ങളോട് അപേക്ഷയുമായി ആരോഗ്യമന്ത്രി വീണാ ജോര്ജ്. ഈ അഭ്യര്ഥന മാധ്യമങ്ങളോടുള്ളതാണെന്നും മന്ത്രി പറഞ്ഞു. പൊതുവില് വയനാട് ദുരന്തത്തില് കേരളത്തിലെ മാധ്യമങ്ങള് അഭിനന്ദനാര്ഹമായ നിലയിലാണ് പ്രവര്ത്തിക്കുന്നത് എന്നിരുന്നാലും ഈ അഭ്യര്ഥന അത്യന്താപേക്ഷിതമാണെന്ന് മന്ത്രി ഊന്നിപ്പറഞ്ഞു.
1. ഏതൊരു ദുരന്തത്തിലും എന്താണ് സംഭവിച്ചതെന്ന് ദയവായി കുട്ടികളോട് ചോദിക്കാതിരിക്കുക. (കുട്ടികളാണെങ്കിലും മുതിര്ന്നവരാണെങ്കിലും അവരുടെ മനസില് ഈ ദുരന്തം വീണ്ടും ഉറപ്പിക്കുന്നതിനും ഭാവിയില് മാനസിക ബുദ്ധിമുട്ടുകള് ഉണ്ടാക്കുന്നതിനും ഈ ആവര്ത്തനങ്ങള് കാരണമായേക്കാം).
2. മരണമടഞ്ഞ കൂട്ടുകാരെക്കുറിച്ചോ വീട്ടുകാരെക്കുറിച്ചോ തകര്ന്ന സ്കൂളിനെക്കുറിച്ചോ കുട്ടികളെക്കൊണ്ട് ദയവായി ഈ അവസരത്തില് പറയിക്കാതിരിക്കുക.
3. കുഞ്ഞുങ്ങളുടെ ഐഡന്റിറ്റി ഡിസ്ക്ലോസ് ചെയ്യുന്നുണ്ടെങ്കില് അവരുടെ മാതാപിതാക്കളുടേയോ രക്ഷകര്ത്താക്കളുടേയോ അനുവാദത്തോടെ മാത്രം ചെയ്യുക.
4. ഈ വ്യക്തിയുടെ ഈ ബന്ധു മരിച്ചു എന്ന രീതിയില് ദുരന്തത്തിനിരയായവരെക്കുറിച്ച് പറയാതിരിക്കുക. ചിലപ്പോള് അവര് അതറിഞ്ഞിട്ടുണ്ടാകില്ല. ഇങ്ങനെ അറിയുന്നത് അവരെ കൂടുതല് സങ്കീര്ണാവസ്ഥകളിലേക്ക് എത്തിക്കും.
