Climate Action | കാലാവസ്ഥ വ്യതിയാനത്തെ പ്രതിരോധിക്കാൻ നാളികേര കേന്ദ്രീകൃത കൃഷി പരീക്ഷിക്കണം: മന്ത്രി പി പ്രസാദ്
കാസർകോട്: (KVARTHA) കാലാവസ്ഥ മാറ്റങ്ങളെ നേരിടാൻ നാളികേര കേന്ദ്രീകൃതമായ കൃഷി രീതികൾ അനിവാര്യമാണെന്ന് കൃഷി വകുപ്പ് മന്ത്രി പി പ്രസാദ് പറഞ്ഞു. കാസർകോട് ഐസിഎആർ-സിപിസിആർഐയിൽ നടന്ന ലോക നാളികേര ദിനാഘോഷത്തിൽ മുഖ്യാതിഥിയായി സംസാരിക്കുകയായിരുന്നു മന്ത്രി. 'ജീവൻ്റെ വൃക്ഷ'ത്തിനായി ഒരു ദിനം ആഘോഷിക്കുന്നതിൽ സംഘാടകരെ മന്ത്രി അഭിനന്ദിച്ചു.
വൃത്താകൃതിയിലുള്ള സമ്പദ്വ്യവസ്ഥ സുസ്ഥിരതയ്ക്ക് അത്യന്താപേക്ഷിതമാണെന്ന് മന്ത്രി പറഞ്ഞു. കാലാവസ്ഥ മാറ്റങ്ങളെ നേരിടാൻ നാളികേര കേന്ദ്രീകൃത കൃഷി അനിവാര്യ മാണെന്ന് മന്ത്രി പറഞ്ഞു. തേങ്ങ, ബദാം, സോയാമിൽക്ക് എന്നിവയിൽ മികച്ചത് തേങ്ങാ പാൽ ആണ്. സംരംഭകത്വ വളർച്ചയ്ക്ക് ഗുണം ചെയ്യുന്നതിനായി നാളികേരത്തെ അടിസ്ഥാനമാക്കിയുള്ള ദ്വിതീയ കൃഷിക്ക് ഊന്നൽ നൽകണം. കീട ശല്യത്തിനും പരിഹാരം കാണാനും അദ്ദേഹം നിർദ്ദേശിച്ചു.
നീര ഉൾപ്പെടെയുള്ള സിപിസിആർഐ വികസിപ്പിച്ച സാങ്കേതികവിദ്യകൾ കേരളത്തിൽ എന്ന പോലെ മറ്റു സംസ്ഥാനങ്ങളിലും മികച്ച സാന്നിധ്യം അർഹിക്കുന്നുണ്ടെന്ന് ചടങ്ങിൽ വിശിഷ്ടാതിഥിയായ എൻ.എ.നെല്ലിക്കുന്ന് എം എൽ എ പറഞ്ഞു. ന്യൂഡൽഹി ഐസിഎആർ -ഡിഡിജി (ഹോർട്ട്. സയൻസ്), ഡോ.എസ്.കെ. സിംഗ് അധ്യക്ഷത വഹിച്ചു.
പാഴാക്കാൻ ഒന്നുമില്ലാതെ തെങ്ങിന് ഊന്നൽ നൽകി കാലാവസ്ഥാ വ്യതിയാനത്തെ മികച്ച കൃഷിരീതികളിലൂടെ നേരിടണമെന്ന് അദ്ദേഹം പറഞ്ഞു. ദ്വീപ് രാജ്യങ്ങൾ നാളികേരവുമായി ബന്ധപ്പെട്ട് ഉയർത്തുന്ന മത്സരങ്ങളെ അതിജീവിച്ച് ലോകത്തെ നയിക്കാനുള്ള ശേഷി ഇന്ത്യയ്ക്കുണ്ട്. ഇന്ത്യയുടെ ആവശ്യങ്ങൾ നിറവേറ്റിക്കൊണ്ട് 200-ഓളം ഉൽപ്പന്നങ്ങളുള്ള നാളികേര മേഖല വർഷം മുഴുവനും തൊഴിലവസരങ്ങൾ നൽകുന്നു.
സി പി സി ആർ ഐ ഡയറക്ടർ ഡോ. കെ. ബാലചന്ദ്ര ഹെബ്ബാർ, നൂതന സാങ്കേതിക വിദ്യ, മേഖലകളിൽ കൈവരിച്ച നേട്ടങ്ങൾ വിശദീകരിച്ചു. കൽപ സുവർണ, കൽപ വജ്ര എന്നീ രണ്ട് തെങ്ങുകളുടെ പ്രകാശനത്തെക്കുറിച്ചും കൽപ നക്ഷത്രം, കൽപ ധാരെ എന്നീ രണ്ട് പുതിയ തിരിച്ചറിഞ്ഞ ഇനങ്ങളെക്കുറിച്ചും അദ്ദേഹം പരാമർശിച്ചു.
സി.പി.സി.ആർ.ഐ.യിലെ ജീവനക്കാരിൽ നിന്ന് സ്വരൂപിച്ച നിന്ന് 3,66,000 രൂപയുട ചെക്ക് മുഖ്യമന്ത്രിയുടെ ദുരിതാശ്വാസ നിധിയിലേക്കുള്ള സംഭാവനയായി ഡയറക്ടരിൽ നിന്ന് കൃഷിമന്ത്രി ഏറ്റുവാങ്ങി. അമൃത വിശ്വവിദ്യാപീഠത്തിലെ ഡോ.മേഗലിംഗം സംസാരിച്ചു. മലപ്പുറം തിരൂരിലെ പി ടി സുഷമ, കർണാടകയിൽ നിന്നുള്ള കൊണ്ടാന ചന്ദ്രശേഖര ഗാട്ടി, തമിഴ്നാട് പൊള്ളാച്ചിയിലെ സെന്തിൽകുമാർ, എന്നീ മികച്ച നാളികേര കർഷകരെ മന്ത്രി ചടങ്ങിൽ ആദരിച്ചു.
നാഗരാജ എച്ച്.ആർ. (പ്രോ-ബി, ബാംഗ്ലൂർ) , കൃഷ്ണൻ (പ്രകോഡൽ, ബയോപ്ലസ്), ഇ.ജെ. ജോസഫ്, (ഗ്രാമലക്ഷ്മി മാർക്കറ്റിംഗ് പ്രൊഡ്യൂസർ കമ്പനി) എന്നിവരെ യും ആദരിച്ചു. വ്യവസായ സംരംഭകർ ഇൻസ്റ്റിറ്റ്യൂട്ടുമായി ധാരണാപത്രങ്ങൾ കൈമാറ്റം ചെയ്തു.
സി പി സി ആർ ഐ (CPCRI) സാങ്കേതികവിദ്യകൾ സ്വീകരിക്കാൻ തയ്യാറായ സംരംഭകരിൽ എസ് കെ കുസുമാധർ കുമാര സ്വാമി, മണികണ്ഠൻ സി, ഡോ ഹരികൃഷ്ണൻ, സോളങ്കി നാനാഭായ്, കൽപരസ എന്നിവർ ഉൾപ്പെടുന്നു.
‘കൽപ ബ്ലിസ് - ഫ്ലേവർഡ് കോക്കനട്ട് മിൽക്ക്’, ഗുണമേന്മയുള്ള തെങ്ങിൻ തൈ, തേങ്ങാ ഹൽവ, തെങ്ങിൻ കീഴിൽ ഇടവിളയായ മരച്ചീനി, റെഡി റെക്കണർ ആസാമീസ് എന്നിവ പുറത്തിറക്കി.
കാസർകോട് ഉപ്പള സ്വദേശിയായ ഒരു സംരംഭകൻ്റെ എയറേറ്റഡ് കോക്കനട്ട് വാട്ടർ 'സില'യും ചടങ്ങിൽ പ്രകാശനം ചെയ്തു. ഐസിസിയിലെ 23 അംഗരാജ്യങ്ങളുമായി ഇന്ത്യ ഒരു ആഗോള പങ്കാളിയാണെന്ന് ഡോ. ബി. അഗസ്റ്റിൻ ജെറാർഡ് പറഞ്ഞു. ഐക്യരാഷ്ട്രസഭ കണ്ടെത്തിയ 17 ലക്ഷ്യങ്ങളിൽ 13 ഉം നിറവേറ്റാൻ നാളികേരത്തിന് കഴിയും. കാർബൺ ക്രെഡിറ്റ് വർദ്ധിപ്പിക്കുന്നതിനുള്ള ഏറ്റവും നല്ല വൃക്ഷമാണിതെന്ന് നബാർഡ് പ്രതിനിധി ഷാരോൺ നവാസ് പറഞ്ഞു സി.പി.സി.ആർ.ഐ വികസിപ്പിച്ച സാങ്കേതികവിദ്യകൾ നല്ല രീതിയിൽ സമൂഹം സ്വീകരിക്കുമെന്ന് കൃഷി വകുപ്പ്, ഡപ്യൂട്ടി ഡയറക്ടർ ജ്യോതി കുമാരി പറഞ്ഞു
കർഷകരെ ബോധവൽക്കരിക്കാൻ കർഷക ശാസ്ത്രജ്ഞരുടെ ഇൻ്റർഫേസ് സെഷൻ നടന്നു. നാനൂറോളം പേർ പങ്കെടുത്തു. ഡയറക്ടർ ഡോ. കെ. ബാലചന്ദ്ര ഹെബ്ബാർ സ്വാഗതവും സോഷ്യൽ സയൻസ് വകുപ്പ് മേധാവി ഡോ. കെ.പൊന്നുസാമി നന്ദിയും പറഞ്ഞു.
