Survival | മണ്ണിടിച്ചിൽ ദുരന്തത്തിനിടയിലും ജീവിതം മുന്നോട്ട്; അർജുന്റെ ഭാര്യക്ക് ജോലി

കോഴിക്കോട്: (KVARTHA) കർണാടകയിലെ ഷിരൂരിൽ ഉണ്ടായ മണ്ണിടിച്ചിൽ ദുരന്തത്തിൽ കാണാതായ അർജുന്റെ ഭാര്യ കൃഷ്‌ണപ്രിയക്ക് ഒരു പുതിയ തുടക്കം. വേങ്ങേരി സർവീസ് സഹകരണ ബാങ്കിൽ ജൂനിയർ ക്ലാർക്കായി നിയമിതയായെന്ന സന്തോഷവാര്ത്തയാണ് ഇപ്പോൾ പുറത്തുവന്നിരിക്കുന്നത്.

കഴിഞ്ഞ ദിവസമായിരുന്നു സഹകരണ വകുപ്പ് ഈ സംബന്ധിച്ച ഉത്തരവ് പുറപ്പെടുവിച്ചത്. വർഷങ്ങളായി ബാങ്കുമായി ബന്ധപ്പെട്ടു പോന്ന അർജുന്റെ കുടുംബത്തോടുള്ള സഹാനുഭൂതിയാണ് ഈ നിയമനത്തിന് കാരണം. കേരള സർക്കാർ ഈ നിയമനത്തിന് പ്രത്യേക അനുമതി നൽകുകയായിരുന്നു.

ജൂലായ് 16നാണ് ദക്ഷിണ കന്നഡയിലെ ഷിരൂരില്‍ പനവേല്‍ - കന്യാകുമാരി ദേശീയപാതയില്‍ മണ്ണിടിച്ചിലുണ്ടാകുന്നതും അർജുനെ കാണാതാകുന്നതും. 15ന് ബെല്‍ഗാമില്‍ നിന്ന് തടിയുമായി എടവണ്ണയിലേക്ക് വരികയായിരുന്നു അർജുൻ.

അർജുനായുള്ള തെരച്ചിലുമായി ബന്ധപ്പെട്ട് കർണാടക സർക്കാരില്‍ വലിയ വിശ്വാസം ഉണ്ടെന്നും ഡ്രെഡ്ജിംഗ് മെഷീൻ ഉടൻ എത്തിക്കുമെന്ന പ്രതീക്ഷയിലാണെന്നും കൃഷ്‌ണപ്രിയ പ്രതികരിച്ചു. ഇതുവരെ പൊതുസമൂഹം നല്‍കിയ എല്ലാ പിന്തുണയ്ക്കും നന്ദി രേഖപ്പെടുത്തുന്നെന്നും കൃഷ്‌ണപ്രിയ കൂട്ടിച്ചേർത്തു.

കഴിഞ്ഞ ദിവസം അർജുന്റെ കുടുംബം കർണാടക മുഖ്യമന്ത്രി സിദ്ധരാമയ്യയെ സന്ദർശിച്ചിരുന്നു. ഡ്രെഡ്ജിംഗ് പ്രവർത്തനങ്ങൾക്ക് സർക്കാർ പൂർണ സഹായം നൽകുമെന്ന് മുഖ്യമന്ത്രി ബന്ധുക്കള്‍ക്ക് ഉറപ്പ് നല്‍കിയിട്ടുണ്ട്. 96 ലക്ഷം രൂപയാണ് ഗോവയില്‍ നിന്ന് ഡ്രെഡ്ജർ എത്തിക്കാൻ ചെലവ് പ്രതീക്ഷിക്കുന്നത്. പുഴയില്‍ പ്രവർത്തിപ്പിക്കാൻ വേറെ ചെലവ് വേണ്ടിവരുമെന്നും മുഖ്യമന്ത്രി പറഞ്ഞു.

#KrishnaPriya, #LandslideRelief, #JobAppointment, #VengeriBank, #Karnataka, #GovernmentSupport