'മദ്യപിച്ചാലും കെഎസ്ആർടിസി ബസിൽ കയറ്റും, പക്ഷേ മിണ്ടാതിരുന്നോളണം; അലമ്പാക്കിയാൽ നേരെ പോലീസ് സ്റ്റേഷനിലേക്ക്' - ഗതാഗത മന്ത്രി കെ ബി ഗണേഷ് കുമാർ

കൊല്ലം: (KVARTHA) മദ്യപിച്ചതിൻ്റെ പേരിൽ ഒരാളെ കെഎസ്ആർടിസി ബസിൽ കയറ്റാതിരിക്കാൻ കഴിയില്ലെന്ന് ഗതാഗത മന്ത്രി കെ.ബി ഗണേഷ് കുമാർ പറഞ്ഞു. എന്നാൽ കെഎസ്ആർടിസി ബസിൽ മദ്യപിച്ച് കയറി അഭ്യാസം കാണിച്ചാൽ അത്തരക്കാരെ അടുത്ത പോലീസ് സ്റ്റേഷനിൽ എത്തിക്കും. പുകവലി ചോദ്യം ചെയ്തതിൻ്റെ പേരിൽ പെൺകുട്ടിക്ക് നേരെയുണ്ടായ അതിക്രമത്തെ പറ്റിയുള്ള ചോദ്യത്തിന് മറുപടി പറയുകയായിരുന്നു മന്ത്രി. പത്തനാപുരത്ത് വെച്ചാണ് അദ്ദേഹം മാധ്യമപ്രവർത്തകരോട് ഇക്കാര്യം വ്യക്തമാക്കിയത്.

'അലമ്പാക്കിയാൽ നേരെ സ്റ്റേഷനിലേക്ക്'

'രണ്ടെണ്ണം അടിച്ചാൽ അവിടെ മിണ്ടാതിരുന്നോളണം... യാത്ര ചെയ്യുന്നതിൽ വിരോധമില്ല,' മന്ത്രി ഗണേഷ് കുമാർ പറഞ്ഞു. അതേസമയം, മദ്യപിച്ച് ബസിൽ കയറി അലമ്പാക്കിയാൽ അല്ലെങ്കിൽ യാത്രക്കാർക്കും ഡ്രൈവർക്കും കണ്ടക്ടർക്കും ബുദ്ധിമുട്ടുണ്ടാക്കിയാൽ വാഹനം നേരെ പോലീസ് സ്റ്റേഷനിലേക്ക് വിടാനുള്ള നിർദേശം ഡ്രൈവർമാർക്ക് നൽകിയിട്ടുണ്ട്. മദ്യപിച്ചു എന്നതിൻ്റെ പേരിൽ ഒരാളെ ബസിൽ നിന്ന് ഇറക്കി വിടുകയൊന്നുമില്ലെന്നും അദ്ദേഹം കൂട്ടിച്ചേർത്തു.

സ്ത്രീകളെ ശല്യം ചെയ്താൽ കർശന നടപടി

മദ്യപിച്ച യാത്രക്കാർ സ്ത്രീകളെ ശല്യം ചെയ്യുക, അടുത്തിരിക്കുന്ന ആളുടെ തോളിൽ കിടന്നുറങ്ങുക, ബഹളം വയ്ക്കുക, കണ്ടക്ടറെ ചീത്ത പറയുക തുടങ്ങിയവ ഉണ്ടായാൽ ജീവനക്കാർക്ക് ഉടൻ ഇടപെടാം. ഇത്തരമൊരു സാഹചര്യം വന്നാൽ കണ്ടക്ടറോട് വിവരം പറഞ്ഞാൽ മതിയെന്നും, ഡ്രൈവർ ബസ് നേരെ പോലീസ് സ്റ്റേഷനിലേക്ക് കൊണ്ടുപോകുമെന്നും മന്ത്രി വ്യക്തമാക്കി. യാത്രക്കാരുടെ സുരക്ഷ ഉറപ്പാക്കുന്നതിൻ്റെ ഭാഗമായാണ് ഇത്തരമൊരു കർശന നിർദ്ദേശം നൽകിയിട്ടുള്ളത്.

ഈ നിർദ്ദേശം സഹായകരമാകുമോ? നിങ്ങളുടെ അഭിപ്രായം പങ്കുവെക്കുക.

Article Summary: KSRTC Minister K B Ganesh Kumar says drunk passengers allowed, but misbehavior leads to police.

#KSRTC #KBGaneshKumar #KeralaTransport #DrunkDriving #PoliceAction #PassengerSafety