കെഎസ്ആർടിസി ജീവനക്കാർക്ക് പ്രമോഷൻ; രണ്ടുദിവസത്തിനകം ഉത്തരവിറങ്ങുമെന്ന് കെ ബി ഗണേഷ് കുമാർ

മലപ്പുറം: (KVARTHA) അർഹരായ എല്ലാ കെഎസ്ആർടിസി ജീവനക്കാർക്കും പ്രമോഷൻ ലഭ്യമാക്കുമെന്ന് ഗതാഗത മന്ത്രി കെ ബി ഗണേഷ് കുമാർ. ഇതിനായുള്ള ഉത്തരവ് രണ്ടുദിവസത്തിനകം പുറത്തിറക്കുമെന്നും അദ്ദേഹം വ്യക്തമാക്കി. വ്യാഴാഴ്ച, 2026 ഫെബ്രുവരി 19-ന് മലപ്പുറത്ത് മാധ്യമപ്രവർത്തകരോട് സംസാരിക്കുകയായിരുന്നു അദ്ദേഹം.

ഒഴിവുകൾ പരിഗണിച്ച് പ്രമോഷൻ

ഈ വർഷം വിവിധ തസ്‌തികകളിൽ നിന്നായി നിരവധി ജീവനക്കാർ വിരമിക്കുന്നുണ്ട്. ഈ ഒഴിവുകൾ പരിഗണിച്ചാണ് അർഹരായവർക്ക് പ്രമോഷൻ നൽകുന്നത്. നിലവിലുള്ള ജീവനക്കാരിൽ ഏറെയും ദീർഘനാൾ സർവീസുള്ളവരാണ്. ഇവർക്ക് പ്രമോഷൻ നൽകുന്നതിലൂടെ കെഎസ്ആർടിസിയുടെ പ്രവർത്തനങ്ങൾ കൂടുതൽ കാര്യക്ഷമമാക്കാൻ കഴിയുമെന്നും അദ്ദേഹം വിശദീകരിച്ചു.

എടപ്പാളിൽ പുതിയ സ്ക്രാപ് കേന്ദ്രം

എടപ്പാളിൽ പുതുതായി ആരംഭിക്കുന്ന സ്ക്രാപ് കേന്ദ്രം സംസ്ഥാനത്തിന് വലിയ തോതിൽ ഗുണകരമാവും. സ്വകാര്യവാഹനങ്ങൾ ഉൾപ്പെടെ ആധുനിക സംവിധാനങ്ങൾ ഉപയോഗിച്ച് മലനീകരണമില്ലാതെ സ്ക്രാപ് ചെയ്യുന്നതാണ് പുതിയ പദ്ധതി. വാഹന പൊളിക്കൽ പദ്ധതി നയമായി കേന്ദ്ര സർക്കാർ പ്രഖ്യാപിച്ച 150 കോടി രൂപയോളം ഇതിലൂടെ സംസ്ഥാന സർക്കാരിന് ലഭ്യമാവുമെന്നും മന്ത്രി ചൂണ്ടിക്കാട്ടി.

നവകേരള സർവേയും മുന്നണി ബന്ധവും

നവകേരള സർവേയെ രാഷ്ട്രീയമായി മാത്രം കാണരുത്. ഒരു സർക്കാർ എങ്ങനെ പ്രവർത്തിച്ചു, ഇനി എന്തെല്ലാം ചെയ്യണമെന്ന് പൊതുജനങ്ങളിൽനിന്നറിയാനുള്ള ഒരു പരിപാടിയായിരുന്നു അത്. ന്യൂജനറേഷന്റെ നാളെയുടെ കാഴ്‌ചപ്പാടുകളും കൂടി ഉൾക്കൊണ്ടുള്ള അഭിപ്രായ സ്വരൂപണം കൂടിയായിരുന്ന ആ സർവേയെന്നും അദ്ദേഹം പറഞ്ഞു. എൽഡിഎഫിനൊപ്പം സന്തോഷത്തോടെയാണ് പ്രവർത്തിക്കുന്നത്.

'മതേതര നിലപാടുള്ള, തൊഴിലാളികളോടും പാവപ്പെട്ടവരോടും ചേർന്നുനിൽക്കുന്ന പാർട്ടിയാണ് കേരള കോൺഗ്രസ് ബി. ഇടതുപക്ഷ സംവിധാനങ്ങൾ ഉൾക്കൊണ്ട് മുന്നോട്ട് പോവാൻ ഞങ്ങൾക്ക് കഴിയുന്നുണ്ട്', അദ്ദേഹം പറഞ്ഞു. 

എല്ലാ പ്രവർത്തനങ്ങൾക്കും മുഖ്യമന്ത്രിയുടെ പിന്തുണയുണ്ടെന്നും നല്ലൊരു സർക്കാരിൽ പങ്കാളിയാവാൻ കഴിഞ്ഞതിൽ അതിയായ സന്തോഷമുണ്ടെന്നും അദ്ദേഹം കൂട്ടിച്ചേർത്തു.

തീർഥാടകരെ ഇറക്കിവിട്ട സംഭവം

ശബരിമല തീർഥാടകരെ രാത്രി വനമേഖലയിൽ ഇറക്കിവിട്ട സംഭവത്തിൽ കർശനമായ ഇടപെടലുണ്ടായിട്ടുണ്ട്. കെഎസ്ആർടിസി ഡ്രൈവർക്കും കണ്ടക്‌ടർക്കും എതിരെ ആദ്യഘട്ട നടപടി സ്വീകരിച്ചിട്ടുണ്ട്. ഈ വിഷയത്തിൽ വിശദമായ അന്വേഷണത്തിന് ശേഷം യഥാർഥ കുറ്റക്കാർക്കെതിരെ തുടർനടപടികൾ സ്വീകരിക്കുമെന്നും മന്ത്രി ഗണേഷ് കുമാർ മാധ്യമങ്ങളോട് പറഞ്ഞു.

വാട്സ്ആപ്പ് ഗ്രൂപ്പുകളിലും സോഷ്യൽ മീഡിയയിലും ഈ വാർത്ത പങ്കുവെക്കുമല്ലോ. ഇത്തരം വാർത്തകൾ അപ്പപ്പോൾ അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യൂ. അഭിപ്രായം കമന്റായി രേഖപ്പെടുത്താനും മറക്കരുത്.

Article Summary: Transport Minister K.B. Ganesh Kumar announced promotions for all eligible KSRTC employees within two days and highlighted the benefits of the new Edappal scrap center during a press meet in Malappuram.

#KBGaneshKumar #KSRTC #Promotion #TransportMinister #Malappuram #KeralaGovernment #EdappalScrapCenter #LDF #PublicTransport #KVARTHA