2027-ൽ വൈദ്യുതി നിരക്കിൽ മാറ്റം വരും; ഫിക്സഡ് ചാർജിൽ വർധനയ്ക്ക് സാധ്യത, കെഎസ്ഇബി നടപടികൾ തുടങ്ങി

തിരുവനന്തപുരം: (KVARTHA) സംസ്ഥാനത്ത് 2027 ഏപ്രിൽ 1 മുതൽ ആരംഭിക്കുന്ന പുതിയ നിയന്ത്രണ കാലയളവിലേക്കുള്ള (2027-32) വൈദ്യുതി നിരക്ക് നിശ്ചയിക്കാൻ കെഎസ്ഇബി നടപടികൾ തുടങ്ങി. അടുത്ത വൈദ്യുതി നിരക്ക് പരിഷ്കരണത്തിൽ എനർജി ചാർജിൽ കാര്യമായ വർധനയുണ്ടാകില്ലെങ്കിലും ഫിക്സഡ് ചാർജിൽ നേരിയ വർധനയുണ്ടാകുമെന്നാണു സൂചന. 

നിരക്ക് പരിഷ്കരണത്തിനായി വിവിധ വിഭാഗങ്ങളിൽ നിന്ന് കെഎസ്ഇബി റിപ്പോർട്ടുകൾ ആവശ്യപ്പെട്ടിട്ടുണ്ട്. നിരക്ക് വർധന സംബന്ധിച്ച അപേക്ഷ നവംബറിനു മുൻപു സമർപ്പിക്കാനാണു സംസ്ഥാന വൈദ്യുതി റഗുലേറ്ററി കമ്മിഷൻ നൽകിയിരിക്കുന്ന നിർദേശം. അപേക്ഷ അന്തിമമാക്കുന്നതിനു മുൻപ് സംസ്ഥാന സർക്കാരിൻ്റെ നിലപാടും കെഎസ്ഇബി തേടും.

ടിഒഡി മീറ്ററിങ്ങിൽ മാറ്റങ്ങൾ

നിലവിൽ 250 യൂണിറ്റിനു മുകളിൽ വൈദ്യുതി ഉപയോഗിക്കുന്നവർക്കുള്ള ടൈം ഓഫ് ഡേ മീറ്ററിങ്, 200 യൂണിറ്റിനു മുകളിലുള്ളവർക്കും ബാധകമാക്കിയേക്കും. കൂടാതെ, പകൽ വൈദ്യുതി ഉപയോഗത്തിനുള്ള ഇളവ് നിലവിലെ 10 ശതമാനത്തിൽ നിന്നും 15 മുതൽ 25 ശതമാനം വരെയായി വർധിപ്പിച്ചേക്കും. 

കെഎസ്ഇബി ഉയർന്ന വിലയ്ക്കു വൈദ്യുതി വാങ്ങുന്ന പീക്ക് സമയത്ത് നിലവിലെ 25 ശതമാനം അധികനിരക്ക് 50-60 ശതമാനമായി വർധിപ്പിക്കാനും സാധ്യതയുണ്ട്. നിലവിൽ രാത്രി 10 വരെയാണ് പീക്ക് സമയം. ഇത് രാത്രി 11 വരെയോ 12 വരെയോ ദീർഘിപ്പിച്ചേക്കും. സൗരോർജ വൈദ്യുതി ലഭ്യമായ പകൽ സമയത്തെ ഉപയോഗം പ്രോത്സാഹിപ്പിക്കാനാണ് ഈ നീക്കം.

പ്രത്യേക സർചാർജും സമ്മർ താരിഫും

കെഎസ്ഇബിക്ക് താരിഫിൽ ഈടാക്കാൻ കഴിയാത്ത ഏകദേശം 6,500 കോടി രൂപയുടെ നഷ്ടം 2031 മാർച്ച് 31-ന് മുൻപ് ഈടാക്കണമെന്ന സുപ്രീംകോടതി ഉത്തരവ് നിലവിലുണ്ട്. ഇത് നടപ്പാക്കുന്നതിൻ്റെ ഭാഗമായി യൂണിറ്റിന് 25 പൈസ വരെ പ്രത്യേക സർചാർജ് ഏർപ്പെടുത്തിയേക്കും. കൂടാതെ ജനുവരി മുതൽ മേയ് വരെയുള്ള മാസങ്ങളിൽ യൂണിറ്റിന് 10 പൈസ വരെ അധികനിരക്ക് ഈടാക്കാനും സാധ്യതയുണ്ട്. 

വൈദ്യുതി വാഹനങ്ങളുടെ ചാർജിങ് പകൽ സമയത്താക്കാൻ നിരക്കിളവ് ഉൾപ്പെടെയുള്ള പ്രോത്സാഹന പദ്ധതികളും കെഎസ്ഇബി ആലോചിക്കുന്നുണ്ട്. കേന്ദ്ര നിർദേശമനുസരിച്ച് ക്രോസ് സബ്‌സിഡി ഒഴിവാക്കുന്നതിൻ്റെ ഭാഗമായി സൗജന്യമായി വൈദ്യുതി ലഭിക്കുന്നവർക്ക് സർക്കാർ പ്രത്യേക സബ്‌സിഡി നൽകേണ്ടി വരും.

ഈ വാർത്ത നിങ്ങളുടെ സുഹൃത്തുക്കൾക്കും ബന്ധുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. പുതിയ വാർത്തകൾക്കായി ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്താം.

Article Summary: KSEB has initiated the process to finalize the electricity tariff for the 2027-2032 period. While energy charges may remain stable, a slight increase in fixed charges is expected. 

#KSEB #ElectricityTariff #KeralaNews #EnergyCharge #ToDMetering #KeralaBusiness #AmmuNews