Accidental Death | പെരുമ്പാവൂര്‍ പുല്ലുവഴിയില്‍ 3 വാഹനങ്ങള്‍ കൂട്ടിയിടിച്ച് ഒരാള്‍ മരിച്ചു; 5 പേര്‍ക്ക് പരുക്ക്

കൊച്ചി: (KVARTHA) പെരുമ്പാവൂര്‍ പുല്ലുവഴിയില്‍ മൂന്നു വാഹനങ്ങള്‍ കൂട്ടിയിടിച്ചുണ്ടായ അപകടത്തില്‍ മധ്യവയസ്‌കന് ദാരുണാന്ത്യം. മലയാറ്റൂര്‍ സ്വദേശി സദന്‍ (55) ആണ് മരിച്ചത്. യാത്രക്കാരായ അഞ്ച് പേര്‍ക്ക് പരുക്കേറ്റിട്ടുണ്ട്. ഇതില്‍ ഒരാളുടെ നില ഗുരുതരമാണെന്നാണ് വിവരം.

മുവാറ്റുപുഴ ഭാഗത്തുനിന്ന് വന്ന കാറാണ് നിയന്ത്രണം വിട്ട് മറ്റു വാഹനങ്ങളില്‍ ഇടിച്ചത്. അല്ലപ്ര സ്വദേശികളായ സജീവ്, രാജി പ്രദീപ്, മലയാറ്റൂര്‍ സ്വദേശികളായ രാജീവ്, മിനി ഷിബു എന്നിവരെ പരുക്കുകളോടെ പെരുമ്പാവൂരിലെ ആശുപത്രിയില്‍ പ്രവേശിപ്പിച്ചു. ഇവര്‍ക്ക് വയറിനും തലയ്ക്കുമാണ് പരുക്ക്.

എംസി റോഡില്‍ പുല്ലുവഴി വിലേജ് ജംഗ്ഷനില്‍ രാവിലെ ആറ് മണിയോടെയാണ് സംഭവം. നാട്ടുകാര്‍ ചേര്‍ന്ന് വാഹനം വെട്ടിപ്പൊളിച്ചാണ് പരുക്കേറ്റവരെ പുറത്തെടുത്തത്. മൂവാറ്റുപുഴ ഭാഗത്തുനിന്ന് നെടുമ്പാശ്ശേരി വിമാനത്താവളത്തിലേക്ക് ആളുകളുമായി പോയ ഇന്നോവ കാര്‍ നിയന്ത്രണം വിട്ട് എതിര്‍ദിശയില്‍ വന്ന ഓടോറിക്ഷയിലും കാറിലും ഇടിക്കുകയായിരുന്നു.