K K Shailaja | വടകരയില്‍ സ്ത്രീ വോട്ടില്‍ കണ്ണും നട്ട് കെ കെ ശൈലജ; ടി പി വികാരം അതിജീവിക്കാന്‍ വികസനമുദ്രാവാക്യം

കെ മുരളീധരന്‍ എതിര്‍ സ്ഥാനാര്‍ത്ഥിയായി മത്സരിക്കുന്ന വടകര മണ്ഡലത്തില്‍ വികസനമുരടിപ്പാണ് കെ.കെ ശൈലജ തെരഞ്ഞെടുപ്പു വിഷയമാക്കുന്നത്. ടി.പി ചന്ദ്രശേഖരന്റെ പേരുപറഞ്ഞ് വികസന പ്രവര്‍ത്തനങ്ങള്‍ തടയരുതെന്നാണ് സ്ഥാനാര്‍ത്ഥി പ്രഖ്യാപനത്തിനു ശേഷം ശൈലജ ടീച്ചര്‍ വടകരയില്‍ മാധ്യമപ്രവര്‍ത്തകരോട് പ്രതികരിച്ചത്. ടി.പി വധക്കേസിലെ കോടതി വിധിയെ മാനിക്കുന്നു. എന്നാല്‍ വടകര ഇക്കുറി എല്‍.ഡി.എഫിനൊപ്പം നില്‍ക്കും. സംസ്ഥാനത്തെ മുഴുവന്‍ സീറ്റുകളിലും വിജയിക്കാനുളള പ്രവര്‍ത്തനമാണ് എല്‍.ഡി. എഫ് നടത്തുന്നത്. പതിനഞ്ചു സീറ്റ് ഉറപ്പാക്കുമെന്നും കെ.കെ ശൈലജ പ്രതികരിച്ചു.

ആരോഗ്യമന്ത്രിയായിരുന്നപ്പോള്‍ ജനങ്ങള്‍ക്കുണ്ടായിരുന്ന സ്‌നേഹം വോട്ടായിമാറുമെന്നും കെ.കെ ശൈലജ പറഞ്ഞു. കോവിഡ് കാലത്ത് നടന്ന പി. പി. ഇ കിറ്റ് അഴിമതിയില്‍ അന്നത്തെ ആരോഗ്യമന്ത്രിയായ കെ.കെ ശൈലജയ്ക്കു പങ്കുണ്ടെന്ന മുന്‍ കെ.പി.സി.സി അധ്യക്ഷന്‍ മുല്ലപ്പളളി രാമചന്ദ്രന്റെആരോപണവും അവര്‍ തളളി. അക്കാര്യത്തില്‍ കോണ്‍ഗ്രസുകാര്‍ക്ക് തന്നെ എതിരഭിപ്രായമുണ്ട്. കാബിനറ്റും കോര്‍ കമ്മിറ്റിയും ആലോചിച്ചാണ് കോവിഡ് പ്രതിരോധ സാധനങ്ങള്‍ വാങ്ങിയതെന്നും കെ.കെ ശൈലജ ടീച്ചര്‍ പ്രതികരിച്ചു.