Donation | വയനാട് ദുരിതാശ്വാസത്തിന് കൃഷ്ണ ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസസ് ഒരു കോടി രൂപ നൽകി
കൊച്ചി/തിരുവനന്തപുരം: (KVARTHA) വയനാട് ഉരുൾപൊട്ടൽ ദുരന്തത്തിൽ കുടുങ്ങിയവരെ സഹായിക്കുന്നതിനും ജില്ലയുടെ പുനരുദ്ധാരണ പ്രവർത്തനങ്ങൾക്ക് സഹായമാകുന്നതിനും തെലങ്കാന ആസ്ഥാനമായ കൃഷ്ണ ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസസ് ഒരു കോടി രൂപ സംഭാവന ചെയ്തു. ഈ തുക മുഖ്യമന്ത്രിയുടെ ദുരിതാശ്വാസ നിധിയിലേക്ക് നൽകി.
ആശുപത്രി ശൃംഖലയുടെ ചെയർമാനും മാനേജിങ് ഡയറക്ടറുമായ ഡോ. ബി ഭാസ്കർ റാവു, ചീഫ് എക്സിക്യൂട്ടീവ് ഓഫീസർ ഡോ. അഭിനയ് ബൊള്ളിനേനി, ഡയറക്ടർ ശ്രീ. ശ്രീനാഥ് എന്നിവർ ചേർന്ന് മുഖ്യമന്ത്രി പിണറായി വിജയന് ഈ തുക ഔദ്യോഗികമായി കൈമാറി.
തമിഴ്നാടും കർണാടകയുമുൾപ്പെടെയുള്ള അയൽ സംസ്ഥാനങ്ങളിലും സാന്നിധ്യമുറപ്പിച്ച കൃഷ്ണ ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസസ്, ദക്ഷിണേന്ത്യയിലെ ആരോഗ്യ സേവന രംഗത്ത് വളർച്ച കൈവരിക്കുന്നതിന് ശ്രമിക്കുകയാണ്. കേരളവും ഈ വിശാല പദ്ധതിയുടെ ഭാഗമാണെന്ന് ചെയർമാൻ ഡോ. ബി ഭാസ്കർ റാവു പറഞ്ഞു.
2004-ൽ സ്ഥാപിതമായ കൃഷ്ണ ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസസ് ഇന്ന് ഇന്ത്യയിലെ ഏറ്റവും വലിയ സ്വകാര്യ ആരോഗ്യ സേവന ശൃംഖലകളിൽ ഒന്നാണ്. തെലങ്കാന, ആന്ധ്രാപ്രദേശ്, മഹാരാഷ്ട്ര എന്നീ സംസ്ഥാനങ്ങളിൽ 13 ആശുപത്രികളുമായി ശക്തമായ സാന്നിധ്യം ഇവർക്ക് ഉണ്ട്. വിവിധ രോഗങ്ങൾക്കുള്ള ചികിത്സ ലഭ്യമാക്കുന്ന ഈ ആശുപത്രികൾ, താങ്ങാനാവുന്ന നിരക്കിൽ മികച്ച ചികിത്സ നൽകുന്നതിലും പ്രശസ്തമാണ്. നാല്പതിലധികം വിദഗ്ധ ചികിത്സാ വിഭാഗങ്ങളിലായി 4000-ലധികം കിടക്കകളും മികച്ച ഡോക്ടർമാരുടെ സേവനവും ഇവിടെ ലഭ്യമാണ്.
കേരളത്തിലെ എല്ലാ ജില്ലകളിലും ആശുപത്രികൾ സ്ഥാപിച്ച് സമഗ്രമായ ചികിത്സാ സംവിധാനങ്ങൾ ഒരുക്കാനാണ് കൃഷ്ണ ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസസിന്റെ ലക്ഷ്യം. എല്ലാവർക്കും താങ്ങാനാവുന്ന വിധത്തിൽ ഗുണമേന്മയുള്ള ചികിത്സ ലഭ്യമാക്കുകയെന്നതാണ് ഇവരുടെ പ്രഖ്യാപിത നയമെന്ന് ആശുപത്രി വൃത്തങ്ങൾ പറഞ്ഞു.
