TB Program | ടിബി നിവാരണ പ്രവര്ത്തനങ്ങളില് കേരളത്തിന്റേത് ശ്രദ്ധേയമായ പ്രവര്ത്തനങ്ങള്; 'ക്ഷയരോഗ ചികിത്സയുടെ നാള്വഴികള്' ഡോക്യുമെന്റിന്റെ പ്രകാശനം സെപ്റ്റംബര് 5 ന് മുഖ്യമന്ത്രി നിര്വഹിക്കും
തിരുവനന്തപുരം: (KVARTHA) ക്ഷയരോഗ നിവാരണ പ്രവര്ത്തനങ്ങളില് കേരളം ശ്രദ്ധേയമായ പ്രവര്ത്തനങ്ങളാണ് നടത്തി വരുന്നതെന്ന് മന്ത്രി വീണാ ജോര്ജ്. ക്ഷയരോഗ മുക്തകേരളം എന്ന ലക്ഷ്യത്തിനായി കേരളം ശക്തമായ പ്രവര്ത്തനങ്ങളാണ് നടത്തി വരുന്നത്. മികച്ച ക്ഷയരോഗ നിവാരണ പ്രവര്ത്തനങ്ങള്ക്ക് കേരളത്തിന് അടുത്തിടെ ദേശീയ പുരസ്കാരം ലഭിച്ചിരുന്നു.
ടിബിക്കെതിരായ കേരളത്തിന്റെ പോരാട്ടവും മുന്നേറ്റവും അടയാളപ്പെടുത്തുന്നതിന് ആരോഗ്യ വകുപ്പ് സെമിനാറും പാനല് ചര്ച്ചയും ഡോക്യുമെന്റ് പ്രകാശനവും സംഘടിപ്പിക്കുന്നു. സെപ്റ്റംബര് 5-ാം തീയതി വൈകുന്നേരം 3.30ന് തിരുവനന്തപുരം മസ്ക്കറ്റ് ഹോട്ടലില് വെച്ച് നടക്കുന്ന ചടങ്ങില് കേരളത്തിലെ ക്ഷയരോഗ ചികിത്സയുടെ നാള്വഴികള് ഉള്ക്കൊള്ളിച്ചു കൊണ്ടുള്ള ഡോക്യുമെന്റ് 'A Path to Wellness Kerala's Battle against TB'- മുഖ്യമന്ത്രി പിണറായി വിജയന് പ്രകാശനം ചെയ്യും.
സംസ്ഥാനത്ത് ക്ഷയരോഗ നിവാരണത്തിനുള്ള ആക്ഷന് പ്ലാനിന്റെ രണ്ടാം ഭാഗം (State Strategic Action Plan for TB Elimination 2.0) എന്ന നയരേഖ പുറത്തിറക്കുന്നതിന് മുന്നോടിയായുള്ള ലഘുലേഖയും മുഖ്യമന്ത്രി പ്രകാശനം ചെയ്യും. ചടങ്ങില് ആരോഗ്യ വകുപ്പ് മന്ത്രി വീണാ ജോര്ജ് അധ്യക്ഷത വഹിയ്ക്കും.
സ്വകാര്യ മേഖലയുടെ പങ്കാളിത്തം ഉറപ്പാക്കിക്കൊണ്ട് 2025 ഓടു കൂടി കേരളത്തെ ക്ഷയ രോഗമുക്തമാക്കുക എന്ന ലക്ഷ്യത്തോടെ ശക്തമായ പ്രവര്ത്തനങ്ങളാണ് നടത്തി വരുന്നത്. ഡ്രഗ് റസിസ്റ്റന്റ് ടി.ബി. ചികിത്സ, ക്ഷയരോഗ ബാധയില്ലാതെ രോഗാണുബാധ മാത്രമുള്ളവര്ക്കുള്ള ടി.ബി. പ്രിവന്റീവ് ചികിത്സ, സ്വകാര്യ മേഖലാ പങ്കാളിത്തം, പ്രാദേശിക സര്ക്കാരുകളുടെ നേതൃത്വം എന്നിവയിലൂടെ സംസ്ഥാനം നടത്തിയ മുന്നേറ്റങ്ങളാണ് ക്ഷയരോഗ ചികിത്സാ ചരിത്രത്തില് അനാവരണം ചെയ്യപ്പെടുന്നത്.
പ്രതിവര്ഷം 1000 ജനസംഖ്യയില് ഒന്നോ അതില് താഴെയോ മാത്രം ക്ഷയരോഗം റിപ്പോര്ട്ട് ചെയ്യുകയും മറ്റ് അനുബന്ധ മാനദണ്ഡങ്ങള് പാലിക്കുകയും ചെയ്ത് ക്ഷയരോഗ മുക്ത പഞ്ചായത്ത് ഒന്നാം ഘട്ടം, സംസ്ഥാനത്ത് 59 ഗ്രാമ പഞ്ചായത്തുകളും ഒരു മുനിസിപ്പാലിറ്റിയും (പെരുമ്പാവൂര്) വിജയകരമായി പൂര്ത്തിയാക്കിയിട്ടുണ്ട്. മുഴുവന് തദ്ദേശ സ്ഥാപനങ്ങളേയും ഇതേ രീതിയില് കൊണ്ടു വരാനാണ് ലക്ഷ്യമിടുന്നതെന്നും മന്ത്രി പറഞ്ഞു.
ലോകാരോഗ്യ സംഘടനാ ഇന്ത്യാ പ്രതിനിധി ഡോ. റോഡ്റികോ എച്ച് ഓഫ്രിന്, ആരോഗ്യവകുപ്പ് അഡീഷണല് ചീഫ് സെക്രട്ടറി ഡോ. രാജന് എന്. ഖോബ്രഗഡെ, എന്.എച്ച്.എം. സ്റ്റേറ്റ് മിഷന് ഡയറക്ടര് ഡോ. വിനയ് ഗോയല്, മെഡിക്കല് വിദ്യാഭ്യാസ ഡയറക്ടര് ഡോ. തോമസ് മാത്യു, ആരോഗ്യ വകുപ്പ് ഡയറക്ടര് ഡോ. കെ.ജെ. റീന എന്നിവര് പങ്കെടുക്കും.
അനുബന്ധമായി നടക്കുന്ന ആഗോള ടിബി നിവാരണ മാര്ഗങ്ങള് കേരളത്തിലേക്ക് (Bringing Global TB Solutions to Kerala) എന്ന സെമിനാറില് മെഡിക്കല് വിദ്യാഭ്യാസ വകുപ്പ് ജോ. ഡയറക്ടര് ഡോ. വിശ്വനാഥന്, ഡോ. രഞ്ജിനി രാമചന്ദ്രന്, ഡോ. സഞ്ജീവ് നായര്, ഡോ. രാകേഷ് പി.എസ് എന്നിവര് പങ്കടുക്കും.
#Kerala #TBfreeKerala #healthcare #publichealth #IndiaFightsTB
