ക്ഷേമപെൻഷൻ 2000 രൂപയാക്കി ഉയർത്തി അതിദാരിദ്ര്യമുക്ത സംസ്ഥാനമായി കേരളം: മുഖ്യമന്ത്രി

തിരുവനന്തപുരം: (KVARTHA) ക്ഷേമപെൻഷൻ 2000 രൂപയായി ഉയർത്തിയും പുതിയ സ്ത്രീ സുരക്ഷാ പെൻഷൻ പദ്ധതി പ്രഖ്യാപിച്ചും കേരളം അതിദാരിദ്ര്യമുക്ത സംസ്ഥാനമായി ഔപചാരികമായി ഉയർത്തപ്പെടുന്നതായി മുഖ്യമന്ത്രി പിണറായി വിജയൻ അറിയിച്ചു. 2025 ഒക്ടോബർ 29 ബുധനാഴ്ച നടത്തിയ വാർത്താ സമ്മേളനത്തിലാണ് മുഖ്യമന്ത്രി സുപ്രധാനമായ പ്രഖ്യാപനങ്ങൾ നടത്തിയത്.

2016ൽ തുടങ്ങി 2021ൽ തുടർഭരണം ഉറപ്പിച്ച വികസന-ജനക്ഷേമ പ്രവർത്തനങ്ങളുടെ വിജയമായാണ് സർക്കാർ ഈ നേട്ടങ്ങളെ കാണുന്നത്. 2021ൽ അധികാരമേറ്റെടുത്ത ശേഷം ആദ്യ മന്ത്രിസഭാ യോഗത്തിൽ എടുത്ത അതിദാരിദ്ര്യം പൂർണ്ണമായി നിർമ്മാർജ്ജനം ചെയ്യുക എന്ന ലക്ഷ്യം ഇപ്പോൾ പൂർത്തീകരിച്ചിരിക്കുകയാണ്. കേന്ദ്ര സർക്കാർ സാമ്പത്തികമായി ഉപരോധം തീർത്ത് ഞെരുക്കാൻ ശ്രമിക്കുമ്പോഴും ഒട്ടേറെ വ്യാജപ്രചാരണങ്ങളിലൂടെ വലതുപക്ഷം സർക്കാരിനെ തകർക്കാൻ ശ്രമിക്കുമ്പോഴും അവയെല്ലാം അതിജീവിച്ചാണ് ഈ നേട്ടങ്ങൾ കൈവരിക്കുന്നതെന്ന് മുഖ്യമന്ത്രി പറഞ്ഞു. 'നമ്മുടെ വികസന മാതൃക കേവലം സാമ്പത്തിക കണക്കുകളുടേതല്ല, അത് മാനവികതയിൽ അധിഷ്ഠിതമാണ്' എന്ന് അദ്ദേഹം കൂട്ടിച്ചേർത്തു.

പുതിയ ക്ഷേമ പദ്ധതികൾ

ബുധനാഴ്ച ചേർന്ന മന്ത്രിസഭാ യോഗം തീരുമാനിച്ച മൂന്ന് പുതിയ പദ്ധതികൾ നവംബർ ഒന്ന് കേരളപ്പിറവി ദിനം മുതൽ പ്രാബല്യത്തിൽ വരും.

ഒന്നാമതായി, സ്ത്രീ സുരക്ഷയ്ക്ക് വേണ്ടി 'സ്ത്രീ സുരക്ഷാ പദ്ധതി' ആരംഭിക്കും. സാമൂഹ്യ ക്ഷേമ പദ്ധതികളിൽ ഗുണഭോക്താക്കൾ അല്ലാത്ത ട്രാൻസ് വുമൺ അടക്കമുള്ള പാവപ്പെട്ട കുടുംബങ്ങളിലെ സ്ത്രീകൾക്ക് എല്ലാ മാസവും സാമ്പത്തിക സഹായം ഈ പദ്ധതിയിലൂടെ ഉറപ്പാക്കും. 35 മുതൽ 60 വയസ്സ് വരെയുള്ള, നിലവിൽ ഏതെങ്കിലും സാമൂഹ്യ ക്ഷേമ പെൻഷൻ ലഭിക്കാത്ത എ.എ.വൈ (മഞ്ഞക്കാർഡ്), പി.എച്ച്.എച്ച് (മുൻഗണനാ വിഭാഗം-പിങ്ക് കാർഡ്) വിഭാഗത്തിൽപെട്ട സ്ത്രീകൾക്ക് പ്രതിമാസം 1000 രൂപ വീതം സ്ത്രീ സുരക്ഷാ പെൻഷൻ അനുവദിക്കും. 31.34 ലക്ഷം സ്ത്രീകളായിരിക്കും ഈ പദ്ധതിയുടെ ഗുണഭോക്താക്കൾ.

രണ്ടാമതായി, യുവതലമുറക്ക് മികച്ച ജോലി ലഭിക്കാൻ 'കണക്ട് ടു വർക്ക് സ്കോളർഷിപ്പ്' പദ്ധതി ആരംഭിക്കും. പ്രതിവർഷ കുടുംബ വരുമാനം ഒര ലക്ഷം രൂപയിൽ താഴെയുള്ള പ്ലസ് ടു/ഐ.ടി.ഐ/ഡിപ്ലോമ/ഡിഗ്രി പഠനത്തിനു ശേഷം വിവിധ നൈപുണ്യ കോഴ്സുകളിൽ പഠിക്കുന്നവരോ വിവിധ ജോലി/മത്സര പരീക്ഷകൾക്ക് തയ്യാറെടുക്കുന്നവരോ ആയ 18 മുതൽ 30 വയസ്സ് വരെയുള്ള യുവതി/യുവാക്കൾക്ക് പ്രതിമാസം 1000 രൂപ വീതം ധനസഹായം നൽകും. അഞ്ച് ലക്ഷം യുവതീ യുവാക്കൾ ഈ പദ്ധതിയുടെ ഗുണഭോക്താക്കൾ ആകും.

മൂന്നാമതായി, കുടുംബശ്രീയുടെ ത്രിതല സംഘടനാ സംവിധാനത്തിൻ്റെ ഭാഗമായ സംസ്ഥാനത്താകെയുള്ള 19,470 എ.ഡി.എസ്സുകൾക്ക് (ഏരിയ ഡെവലപ്മെൻറ് സൊസൈറ്റി) പ്രവർത്തന ഗ്രാൻ്റായി പ്രതിമാസം 1000 രൂപ നൽകുന്ന പദ്ധതി പ്രഖ്യാപിച്ചു.

ക്ഷേമപെൻഷൻ 2000 രൂപയാക്കി

പുതിയ പദ്ധതികൾക്ക് പുറമേ നിലവിലെ ആനുകൂല്യങ്ങളും പരിഷ്കരിക്കാൻ സർക്കാർ തീരുമാനിച്ചു. നിലവിൽ പ്രതിമാസം 1600 രൂപയായിരുന്ന സാമൂഹിക സുരക്ഷാ പെൻഷനുകൾ/ക്ഷേമനിധി ബോർഡ് പെൻഷനുകൾ/സർക്കസ്-അവശ കലാകാര പെൻഷനുകൾ എന്നിവ 400 രൂപ കൂടി ഉയർത്തി പ്രതിമാസം 2000 രൂപയായി വർദ്ധിപ്പിച്ചതായി മുഖ്യമന്ത്രി പ്രഖ്യാപിച്ചു. പ്രതിവർഷം ഏകദേശം 13,000 കോടി രൂപയാണ് ഈ ക്ഷേമപെൻഷൻ വിതരണത്തിനായി സർക്കാർ നീക്കിവെക്കുന്നത്. 'ഒരു ഗഡുപോലും അനിശ്ചിതമായി കുടിശിക ആകാതിരിക്കാൻ സർക്കാർ ശ്രദ്ധിച്ചു' എന്നും മുഖ്യമന്ത്രി വ്യക്തമാക്കി.

മറ്റ് പ്രധാന പ്രഖ്യാപനങ്ങൾ

റബ്ബർ സബ്സിഡി: റബ്ബർ ഉൽപാദന ഇൻസെൻ്റീവ് പദ്ധതി പ്രകാരം റബ്ബർ കർഷകർക്ക് നൽകി വരുന്ന റബ്ബറിൻ്റെ താങ്ങുവില കിലോഗ്രാമിന് 180 രൂപയിൽ നിന്ന് 200 രൂപയായി ഉയർത്തും.

ഡി.എ./ഡി.ആർ: സംസ്ഥാന സർക്കാർ ജീവനക്കാർ/അധ്യാപകർ/പെൻഷൻകാർ എന്നിവർക്ക് നൽകാനുള്ള ഡി.എ. - ഡി.ആർ. കുടിശ്ശികയുടെ ഒര ഗഡു കൂടി അനുവദിക്കും. മുൻ ഗഡുക്കളിൽ 2%, 3% ആയിരുന്നെങ്കിൽ ഇത്തവണ അത് 4% ആയി നവംബർ മാസത്തില് വിതരണം ചെയ്യുന്ന ശമ്പളം/പെന്ഷനോടൊപ്പം നൽകും.

ശമ്പള പരിഷ്കരണ കുടിശ്ശിക: സംസ്ഥാന സർക്കാർ ജീവനക്കാരുടെ പതിനൊന്നാം ശമ്പള പരിഷ്കരണ കുടിശ്ശികയുടെ മൂന്നും നാലും ഗഡുക്കൾ ഈ സാമ്പത്തിക വർഷം തന്നെ അനുവദിക്കും. 2026 ഏപ്രിൽ ഒന്നിനു ശേഷം ഈ കുടിശ്ശിക തുക പി.എഫിൽ ലയിപ്പിക്കുകയോ പി.എഫ് ഇല്ലാത്തവർക്ക് പണമായി നൽകുകയോ ചെയ്യും.

ഓണറേറിയം വർദ്ധനവ്: അംഗനവാടി വർക്കർമാർ, ഹെൽപ്പർമാർ, സാക്ഷരത പ്രേരക്മാർ, ആശ വർക്കർമാർ, പ്രീ പ്രൈമറി ടീച്ചർമാർ, ആയമാർ എന്നിവരുടെ പ്രതിമാസ ഓണറേറിയം/വേതനം 1000 രൂപ വീതം വർദ്ധിപ്പിക്കും. കൂടാതെ ഗസ്റ്റ് ലക്ച്ചറർമാരുടെ പ്രതിമാസ വേതനം പരമാവധി 2000 രൂപയും പാചകത്തൊഴിലാളികളുടെ പ്രതിദിന കൂലി പ്രതിമാസം 1100 രൂപയും വർദ്ധിപ്പിക്കും.

കുടിശ്ശിക തീർക്കാൻ അധിക ധനസഹായം

കേന്ദ്രത്തിൻ്റെ സാമ്പത്തിക ഞെരുക്കത്തിൻ്റെ പശ്ചാത്തലത്തിലും ജനങ്ങളോടുള്ള പ്രതിബദ്ധതയാണ് സർക്കാർ മുഖ്യമായി കാണുന്നതെന്ന് മുഖ്യമന്ത്രി ആവർത്തിച്ചു. അതിൻ്റെ ഭാഗമായി വിവിധ പദ്ധതികളിലെ കുടിശ്ശിക തീർക്കുന്നതിന് വൻ തുക അനുവദിച്ചു.

നിർമ്മാണ തൊഴിലാളി പെൻഷൻ: കേരള നിർമ്മാണ തൊഴിലാളിക്ഷേമനിധി ബോർഡിലെ തൊഴിലാളികളുടെ പെൻഷൻ കുടിശ്ശിക തീർക്കുന്നതിനായി 992 കോടി രൂപ വായ്പയെടുക്കും.

സ്കോളർഷിപ്പ്: പട്ടികജാതി, പട്ടികവർഗ്ഗ, മത്സ്യത്തൊഴിലാളി വിദ്യാർത്ഥികൾക്കുള്ള സ്കോളർഷിപ്പ് ഇനത്തിൽ ആകെ 303.80 കോടി രൂപ അനുവദിച്ചു.

ആരോഗ്യ-ഭക്ഷ്യ മേഖലകൾ: മരുന്ന് വിതരണവുമായി ബന്ധപ്പെട്ട തടസ്സങ്ങൾ നീക്കുവാൻ കെ.എം.എസ്.സി.എലിന് 914 കോടി രൂപയും സപ്ലൈകോ - വിപണി ഇടപെടൽ ഇനത്തിൽ കുടിശ്ശിക തീർക്കുന്നതിനായി 110 കോടി രൂപയും അനുവദിച്ചു. നെല്ല് സംഭരണത്തിൽ ബാക്കി നൽകാനുള്ള തുക ഉടനെ കണ്ടെത്തി നൽകുമെന്നും അദ്ദേഹം അറിയിച്ചു.

കരാറുകാരുടെ കുടിശ്ശിക: കരാറുകാരുടെ കുടിശ്ശിക ബി.ഡി.എസ് വഴി കൃത്യതയോടെ നൽകും. ഈ ഇനത്തിൽ ആകെ 3094 കോടി രൂപയാണ് ചെലവ് പ്രതീക്ഷിക്കുന്നത്. മുഖ്യമന്ത്രിയുടെ തദ്ദേശ റോഡ് പുനരുദ്ധാരണ പദ്ധതിക്കായി വകയിരുത്തിയ 1000 കോടി രൂപ ഡിസംബർ 31 വരെ സമർപ്പിക്കുന്ന ബില്ലുകൾക്ക് ബി.ഡി.എസ് ഒഴിവാക്കി മുൻഗണന നൽകി നേരിട്ട് തുക അനുവദിക്കും.

സാമൂഹിക സുരക്ഷാ മിഷൻ: വയോമിത്രം, സ്നേഹപൂർവ്വം, ആശ്വാസകിരണം, സ്നേഹസ്പർശം തുടങ്ങിയ കേരള സാമൂഹിക സുരക്ഷാ മിഷൻ മുഖേന നടപ്പിലാക്കുന്ന 10 പദ്ധതികൾക്കുള്ള കുടിശ്ശിക തീർക്കുന്നതിനായി 88.38 കോടി രൂപ അനുവദിച്ചു.

2016ലും 2021ലും ജനങ്ങൾക്ക് നൽകിയ ഉറപ്പുകൾ ഒന്നൊന്നായി നടപ്പാക്കുന്നതിൽ ഒരു വിട്ടുവീഴ്ചയും ഉണ്ടാകില്ലെന്ന് മുഖ്യമന്ത്രി ആവർത്തിച്ചു. ജനങ്ങളുടെ അകമഴിഞ്ഞ പിന്തുണയോടെ നവകേരളം കെട്ടിപ്പടുക്കുന്നതിനുള്ള ദൃഢനിശ്ചയവുമായി സർക്കാർ മുന്നോട്ട് പോകുമെന്നും അദ്ദേഹം പറഞ്ഞു.

ഈ സുപ്രധാന ജനക്ഷേമ വാർത്ത ഷെയർ ചെയ്ത് അഭിപ്രായം കമൻ്റ് ചെയ്യുക. 

Article Summary: Kerala welfare pension raised to ₹2000; state declared destitution-free.

#Kerala #WelfarePension #PinarayiVijayan #NewSchemes #DestitutionFree #ConnectToWork