കേരളത്തിന്റെ റോഡുകൾ ഇനി സ്മാർട്ടാകും; പുതിയ പുനരുപയോഗ സാങ്കേതികവിദ്യ വരുന്നു

(KVARTHA) സംസ്ഥാനത്തെ റോഡ് നിർമ്മാണ മേഖലയിൽ റീക്ലെയ്മ്ഡ് അസഫാൾട്ട് പേവ്മെന്റ് (RAP) സാങ്കേതികവിദ്യ പരീക്ഷിക്കാൻ തീരുമാനിച്ചതായി പൊതുമരാമത്ത് വകുപ്പ് മന്ത്രി പി.എ. മുഹമ്മദ് റിയാസ് അറിയിച്ചു. 

റോഡിന്റെ ഉപരിതലം പൊളിച്ച് പുനരുപയോഗിച്ച് പുതിയ ഉപരിതലം നിർമ്മിക്കുന്ന സാങ്കേതികവിദ്യയാണിത്. പരീക്ഷണാടിസ്ഥാനത്തിൽ തിരുവനന്തപുരം ജില്ലയിലെ കിള്ളിപ്പാലം-പ്രാവച്ചമ്പലം റോഡിലാണ് ഈ പ്രവൃത്തി നടത്താൻ ഉദ്ദേശിക്കുന്നത്.

പൊതുമരാമത്ത് വകുപ്പ് മന്ത്രിയുടെ അധ്യക്ഷതയിൽ ചേർന്ന യോഗത്തിലാണ് ഈ തീരുമാനം കൈക്കൊണ്ടത്. മദ്രാസ് ഐ.ഐ.ടിയിലെ വിദഗ്ദ്ധർ, പൊതുമരാമത്ത് വകുപ്പ് ചീഫ് എൻജിനീയർമാർ, കെ.എച്ച്.ആർ.ഐ. ഉദ്യോഗസ്ഥർ എന്നിവർ യോഗത്തിൽ പങ്കെടുത്തു.

റോഡ് നവീകരണത്തിനായി പുതിയ സാങ്കേതികവിദ്യകൾ കൊണ്ടുവരാൻ പരമാവധി ശ്രമിക്കുമെന്ന് പൊതുമരാമത്ത് വകുപ്പ് നേരത്തെ പ്രഖ്യാപിച്ചിരുന്നു. ഇതിന്റെ ഭാഗമായി, പി.ഡബ്ല്യു.ഡിക്ക് കീഴിലുള്ള കേരള ഹൈവേ റിസർച്ച് ഇൻസ്റ്റിറ്റ്യൂട്ടിന്റെ (കെ.എച്ച്.ആർ.ഐ) നേതൃത്വത്തിൽ നിരവധി ഗവേഷണങ്ങൾ നടന്നുവരുന്നുണ്ട്. 

കെ.എച്ച്.ആർ.ഐയും മദ്രാസ് ഐ.ഐ.ടിയും ചേർന്ന് നടത്തിയ പഠനത്തിൽ റീക്ലെയ്മ്ഡ് അസഫാൾട്ട് പേവ്മെന്റ് (RAP) സാങ്കേതികവിദ്യയെക്കുറിച്ചും പഠനങ്ങൾ നടത്തിയിരുന്നു. ഈ പഠനങ്ങളെ തുടർന്നാണ് കേരളത്തിലും ഈ പദ്ധതി അനുയോജ്യമാകുമെന്ന നിഗമനത്തിലെത്തിയത്.

നിർമ്മാണ വസ്തുക്കളുടെ പുനരുപയോഗം വർദ്ധിപ്പിക്കുന്ന ഈ പദ്ധതിയിലൂടെ അസംസ്കൃത വസ്തുക്കളുടെ ഉപയോഗം കുറയ്ക്കാൻ സാധിക്കും. അതോടൊപ്പം പാരിസ്ഥിതിക പ്രശ്നങ്ങളും താരതമ്യേന കുറവാണ്. അധിക സാമ്പത്തിക ബാധ്യതകളില്ലാതെ ദീർഘകാലം ഈടുനിൽക്കുന്ന റോഡുകൾ ഇതിലൂടെ നിർമ്മിക്കാൻ കഴിയുമെന്നാണ് പ്രതീക്ഷിക്കുന്നത്.
 

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെയ്ക്കൂ. 

Article Summary: Kerala to test recycled asphalt tech for road construction.

#Kerala #Roads #Recycling #Technology #PWD #Infrastructure