അപൂർവ്വ വസ്തുക്കൾ കണ്ടാൽ അറിയിക്കുക: കപ്പൽ ദുരന്തം; സുരക്ഷാ നിർദ്ദേശങ്ങൾ അറിയാം

(KVARTHA) ചീഫ് സെക്രട്ടറിയുടെ നേതൃത്വത്തിൽ ഞായറാഴ്ച (25.05.2025) ചേർന്ന അടിയന്തര യോഗത്തിൽ, എം.എസ്.സി എൽസ മൂൂന്ന് എന്ന കപ്പൽ അപകടത്തെക്കുറിച്ച് വിലയിരുത്തി. കപ്പൽ പൂർണ്ണമായും മുങ്ങിയിരിക്കുകയാണെന്നും, തോട്ടപ്പള്ളി സ്പിൽവേയിൽ നിന്ന് ഏകദേശം 14.6 നോട്ടിക്കൽ മൈൽ അകലെയാണ് ഇത് സംഭവിച്ചതെന്നും യോഗത്തിൽ അറിയിച്ചു.

അപകടത്തെ തുടർന്ന് ഏകദേശം 100 ഓളം കണ്ടെയ്നറുകൾ കടലിൽ വീണിട്ടുണ്ട്. കൂടാതെ, കപ്പലിലെ ഇന്ധനമായ എണ്ണയും ചോർന്നിട്ടുണ്ട്. ഈ കണ്ടെയ്നറുകൾ ഏകദേശം 3 കിലോമീറ്റർ വേഗത്തിൽ ഒഴുകി നീങ്ങുകയാണ്. അതേസമയം, കപ്പലിലെ ജീവനക്കാരെ എല്ലാവരെയും രക്ഷപ്പെടുത്താൻ കഴിഞ്ഞത് ആശ്വാസകരമാണ്.

നിലവിൽ, കോസ്റ്റ് ഗാർഡ് രണ്ട് കപ്പലുകൾ ഉപയോഗിച്ച് എണ്ണ പടരുന്നത് തടയാനുള്ള ശ്രമങ്ങൾ നടത്തിവരികയാണ്. ഒരു ഡോണിയർ വിമാനം ഉപയോഗിച്ച് എണ്ണ നശിപ്പിക്കാനുള്ള പൊടി എണ്ണപ്പാളിക്ക് മുകളിൽ തളിക്കുന്നുണ്ട്. ദേശീയ എണ്ണ പാട പ്രതിരോധ പദ്ധതിയുടെ അദ്ധ്യക്ഷനായ കോസ്റ്റ് ഗാർഡ് ഡയറക്ടർ ജനറൽ നേരിട്ട് ആവശ്യമായ നടപടികൾക്ക് നേതൃത്വം നൽകുന്നുണ്ട്.

കണ്ടെയ്നറുകൾ കൂടുതലായി എത്താൻ സാധ്യതയുള്ള ജില്ലകൾ ആലപ്പുഴ, കൊല്ലം, എറണാകുളം, തിരുവനന്തപുരം എന്നിവയാണ്. എന്നാൽ, എണ്ണ പാട എവിടെ വേണമെങ്കിലും എത്താൻ സാധ്യതയുള്ളതിനാൽ കേരളത്തിലെ മുഴുവൻ തീരദേശത്തിനും ജാഗ്രതാ നിർദ്ദേശം നൽകിയിട്ടുണ്ട്.

പൊതുജനങ്ങൾക്കുള്ള സുരക്ഷാ നിർദ്ദേശങ്ങൾ:

● തീരത്ത് അപൂർവ്വ വസ്തുക്കൾ, കണ്ടെയ്നറുകൾ എന്നിവ കണ്ടാൽ തൊടരുത്, അടുത്ത് പോകരുത്, അവയുടെ അടുത്ത് കൂട്ടം കൂടരുത്, 200 മീറ്ററെങ്കിലും അകലം പാലിക്കുക, 112-ൽ അറിയിക്കുക എന്ന നിർദ്ദേശം എല്ലാ തീരദേശ തദ്ദേശ സ്വയംഭരണ സ്ഥാപനങ്ങൾക്കും നൽകിയിട്ടുണ്ട്.

● കാലാവസ്ഥാ മുന്നറിയിപ്പിന്റെ പശ്ചാത്തലത്തിൽ മത്സ്യത്തൊഴിലാളികൾ നിലവിൽ കടലിൽ പോകരുത് എന്ന നിർദ്ദേശം നൽകിയിട്ടുണ്ട്.

● കപ്പൽ മുങ്ങിയ സ്ഥലത്തുനിന്ന് 20 നോട്ടിക്കൽ മൈൽ ചുറ്റളവിൽ ആരും മത്സ്യബന്ധനത്തിന് പോകരുത്. അപൂർവ്വ വസ്തുക്കൾ, കണ്ടെയ്നറുകൾ എന്നിവ കണ്ടാൽ തൊടരുത്, അടുത്ത് പോകരുത്, 112-ൽ അറിയിക്കുക എന്ന നിർദ്ദേശം മത്സ്യത്തൊഴിലാളികൾക്കും ബാധകമാണ്.

● കണ്ടെയ്‌നറുകൾ കരയിൽ സുരക്ഷിതമായി മാറ്റുന്നതിന് JCB, ക്രെയിനുകൾ എന്നിവ വിന്യോഗിക്കാൻ ഫാക്ടറികളും ബോയിലറുകളും (Factories and Boilers) വകുപ്പിന്റെ നേതൃത്വത്തിൽ തൃശ്ശൂർ മുതൽ തെക്കൻ ജില്ലകളിൽ രണ്ട് വീതം റാപ്പിഡ് റെസ്പോൺസ് ടീമുകളും, വടക്കൻ ജില്ലകളിൽ ഓരോ ടീമും തയ്യാറാക്കാൻ നിർദ്ദേശം നൽകിയിട്ടുണ്ട്.

● എണ്ണപ്പാട തീരത്തെത്തിയാൽ അത് കൈകാര്യം ചെയ്യാൻ പൊലൂഷൻ കൺട്രോൾ ബോർഡിന്റെ നേതൃത്വത്തിൽ തൃശ്ശൂർ മുതൽ തെക്കൻ ജില്ലകളിൽ രണ്ട് വീതം റാപ്പിഡ് റെസ്പോൺസ് ടീമുകളും, വടക്കൻ ജില്ലകളിൽ ഓരോ ടീമും തയ്യാറാക്കാൻ നിർദ്ദേശം നൽകിയിട്ടുണ്ട്.

● ജില്ലാ ദുരന്ത നിവാരണ അതോറിറ്റിയും പോലീസും മറ്റ് വകുപ്പുകളും ഈ ടീമുകൾക്ക് ആവശ്യമായ സഹായങ്ങൾ നൽകും.

● കപ്പലിലെ എണ്ണ കടൽത്തട്ടിൽ അടിഞ്ഞു കൂടാൻ സാധ്യതയുള്ളതിനാൽ, കോസ്റ്റ് ഗാർഡ്, നേവി, ഫോറസ്റ്റ് ഡിപ്പാർട്ട്മെന്റ്, ഫാക്ടറീസ് & ബോയിലേഴ്സ് എന്നിവരെ ഉൾപ്പെടുത്തി ഒരു പദ്ധതി തയ്യാറാക്കാനുള്ള നിർദ്ദേശവും നൽകിയിട്ടുണ്ട്.

● ഓയിൽ സ്പിൽ കണ്ടിൻജൻസി കൈകാര്യം ചെയ്യുന്നതിനായി കൂടുതൽ ബൂംസ്, സ്കിമ്മെർസ് എന്നിവ സജ്ജമാക്കാൻ കോസ്റ്റ് ഗാർഡ്, പോർട്ട് വകുപ്പ്, നേവി എന്നിവരോട് നിർദ്ദേശിച്ചിട്ടുണ്ട്.

● കണ്ടെയ്നർ, എണ്ണപ്പാട, കടലിന്റെ അടിയിലേക്ക് മുങ്ങുന്ന എണ്ണ എന്നിവ കൈകാര്യം ചെയ്യാൻ പ്രത്യേക നിർദ്ദേശങ്ങൾ ജില്ലകൾക്കും വകുപ്പുകൾക്കും നൽകിയിട്ടുണ്ട്.

●  പൊതുജനങ്ങളുടെ സുരക്ഷ, പരിസ്ഥിതി സംരക്ഷണം, മത്സ്യബന്ധന മേഖലയുടെ സംരക്ഷണം എന്നിവയ്ക്ക് സംസ്ഥാനം മുൻഗണന നൽകും.

ഈ നിർദ്ദേശങ്ങൾ എല്ലാ തീരദേശ തദ്ദേശ സ്വയംഭരണ സ്ഥാപനങ്ങൾക്കും നൽകിയിട്ടുണ്ട്. ദുരന്തത്തിന്റെ പശ്ചാത്തലത്തിൽ സർക്കാർ അതീവ ജാഗ്രത പുലർത്തുകയും ആവശ്യമായ എല്ലാ നടപടികളും സ്വീകരിച്ചു വരികയാണെന്നും ചീഫ് സെക്രട്ടറി അറിയിച്ചു. യോഗത്തിൽ വിവിധ വകുപ്പുകളിലെ ഉന്നത ഉദ്യോഗസ്ഥർ പങ്കെടുത്തു.

യോഗത്തിൽ പങ്കെടുത്തവർ

ഡോ. എ. ജയതിലക് ഐ.എ.എസ്, ചീഫ് സെക്രട്ടറി, ബിശ്വനാഥ് സിൻഹ ഐ.എ.എസ്, അഡിഷണൽ ചീഫ് സെക്രട്ടറി, ആഭ്യന്തര വകുപ്പ്, പുനീത് കുമാർ ഐ.എ.എസ്, അഡിഷണൽ ചീഫ് സെക്രട്ടറി, തദ്ദേശ സ്വയം ഭരണവകുപ്പ്, ടിങ്കു ബിസ്വാൾ ഐ.എ.എസ്, പ്രിൻസിപ്പൽ സെക്രട്ടറി, റെവന്യൂ വകുപ്പ്, എച്ച്. വെങ്കടേശ് ഐ.പി.എസ്, എഡിജിപി ലോ ആൻഡ് ഓർഡർ, കൗശിഗൻ ഐ.എ.എസ്, സ്പെഷ്യൽ സെക്രട്ടറി, ദുരന്ത നിവാരണ വകുപ്പ്, ശ്രീറാം സാംബശിവ റാവൂ ഐ.എ.എസ്, സ്പെഷ്യൽ സെക്രട്ടറി, പരിസ്ഥിതി വകുപ്പ് Lt Col Sanjeev Kumar Shahi, Joint Advisor (OPS), NDMA, ദിവ്യ അയ്യർ ഐ.എ.എസ്, മാനേജിംഗ് ഡയറക്ടർ, വിഴിഞ്ഞം അന്താരാഷ്ട്ര തുറമുഖം, അബ്ദുൽ നാസർ ഐ.എ.എസ്, ഡയറക്ടർ, ഫിഷറീസ്, സുനിൽ പമീദി ഐ.എഫ്.എസ്, ഡയറക്ടർ, പരിസ്ഥിതി കാലാവസ്ഥ വ്യതിയാന ഡയറക്ടറേറ്റ്, ഡി.ഐ.ജി ആശിഷ് മൽഹോത്ര, കോസ്റ്റ് ഗാർഡ്, ക്യാപ്റ്റൻ. ജോസ് വികാസ്, NOIC, നേവി, അനു കുമാരി ഐ.എ.എസ്, ജില്ലാ കളക്ടർ, തിരുവനന്തപുരം, ദേവദാസ് ഐ.എ.എസ്, ജില്ലാ കളക്ടർ, കൊല്ലം, അലക്സ് വർഗീസ് ഐ.എ.എസ്, ജില്ലാ കളക്ടർ, ആലപ്പുഴ, എൻ.എസ്.കെ ഉമേഷ് ഐ.എ.എസ്, ജില്ലാ കളക്ടർ, എറണാകുളം, അർജുൻ പാണ്ട്യൻ ഐ.എ.എസ്, ജില്ലാ കളക്ടർ, തൃശൂർ, വി.ആർ.വിനോദ് ഐ.എ.എസ്, ജില്ലാ കളക്ടർ, മലപ്പുറം, സ്നേഹിൽ കുമാർ സിംഗ് ഐ.എ.എസ്, ജില്ലാ കളക്ടർ, കോഴിക്കോട്, അർജുൻ വിജയൻ ഐ.എ.എസ്, ജില്ലാ കളക്ടർ, കണ്ണൂർ, ഇമ്പശേഖർ ഐ.എ.എസ്, ജില്ലാ കളക്ടർ, കാസർഗോഡ്, ആർ. ശ്രീലക്ഷ്മി ഐ.എ.എസ്, സ്റ്റാഫ് ഓഫീസർ, ഷൈൻ എ. ഹക്ക്, സി.ഇ.ഒ, കേരള മാരിടൈം ബോർഡ്, ശ്രീകല, ചെയർമാൻ, പൊലൂഷൻ കൺട്രോൾ ബോർഡ്, ഡോ. ശേഖർ ലൂക്കോസ് കുര്യാക്കോസ്, മെമ്പർ സെക്രട്ടറി, KSDMA, അമൃത, ഹസാർഡ് അനലിസ്റ്റ് (പരിസ്ഥിതി) KSDMA.

കപ്പൽ ദുരന്തത്തെക്കുറിച്ചും സുരക്ഷാ നിർദ്ദേശങ്ങളെക്കുറിച്ചും നിങ്ങളുടെ അഭിപ്രായങ്ങൾ പങ്കുവെക്കുക.

Summary: An emergency meeting chaired by the Chief Secretary assessed the MSC Elsa III ship accident, which fully sank near Thottappally, spilling around 100 containers and oil. Safety guidelines are issued for the public and fishermen, and efforts are underway to contain the oil spill.

 #ShipAccident #KeralaCoast #OilSpill #SafetyAlert #FishermenWarning #MaritimeSafety