സംസ്ഥാനത്ത് വൈദ്യുതി നിയന്ത്രണം കടുക്കും; ലോഡ് ഷെഡിങ് പതിവാകാൻ സാധ്യത, 200 മെഗാവാട്ട് വാങ്ങാൻ കെഎസ്ഇബി

തിരുവനന്തപുരം: (KVARTHA) കൂടുതൽ വൈദ്യുതി എത്തിക്കാൻ കെഎസ്ഇബിക്ക് കഴിഞ്ഞില്ലെങ്കിൽ ഈ വർഷം കേരളത്തിൽ വൈദ്യുതി നിയന്ത്രണം പതിവായേക്കും. വ്യാപകമായി മഴ പെയ്യാത്ത ദിവസങ്ങളിലെല്ലാം നിയന്ത്രണം വേണ്ടിവരും. ഇത് ഡിസംബർ വരെയെങ്കിലും തുടരുമെന്നാണ് വിലയിരുത്തൽ. പല ദിവസങ്ങളിലും കൂടുതൽ സമയം വൈദ്യുതി മുടങ്ങാനും സാധ്യതയുണ്ട്. 

15 മുതൽ 30 മിനിറ്റ് വരെയാണ് ലോഡ് ഷെഡിങ്ങിന് തീരുമാനിച്ചിരുന്നത്. എന്നാൽ ഇപ്പോൾ ഒരുമണിക്കൂർ വരെ പലയിടത്തും വൈദ്യുതി മുടങ്ങുന്നുണ്ട്. ജൂലൈ 15 ബുധനാഴ്ച 485 മുതൽ 628 മെഗാവാട്ട് വരെ നിയന്ത്രിക്കേണ്ടിവന്നു. 

മഴയില്ലാത്തതിനാൽ നാല് മുതൽ അഞ്ച് ഡിഗ്രി വരെ ചൂട് കൂടിയിട്ടുണ്ട്. ജൂലൈ 15-ന് ഉപഭോഗം ഒമ്പത് കോടി യൂണിറ്റായി. ഇത് ജൂലൈയിൽ കെഎസ്ഇബി പ്രതീക്ഷിച്ചതിനേക്കാൾ കൂടുതലാണ്. ആവശ്യകതയിൽ ആയിരം മെഗാവാട്ടിൻ്റെ വരെ വർധന പല ദിവസങ്ങളിലും ഉണ്ടാകുന്നുണ്ട്.

'ഇന്ദിരാ കട്ട്' എന്ന് പ്രതിപക്ഷം

മഴക്കാലത്തുപോലും വൈദ്യുതി നിയന്ത്രിക്കേണ്ടിവരുന്നതിൽ വലിയ പ്രതിഷേധമുണ്ട്. നിശ്ചിതസമയത്തല്ലാതെ വൈദ്യുതി മുടങ്ങുന്നത് വാണിജ്യ സ്ഥാപനങ്ങളെയും ബാധിക്കുന്നു. എൽനിനോയുടെ പ്രത്യാഘാതമെന്ന നിലയിൽ രാജ്യത്തെ വൈദ്യുതി ലഭ്യതക്കുറവാണ് പ്രശ്നമെന്നും ഇതിനെ രാഷ്ട്രീയവത്കരിക്കരുതെന്നുമാണ് മന്ത്രി സണ്ണി ജോസഫ് പറയുന്നത്. എന്നാൽ 'ഇന്ദിരാ കട്ട്' എന്ന് പേരിട്ട് വൈദ്യുതി നിയന്ത്രണത്തെ രൂക്ഷമായി പരിഹസിക്കുകയാണ് പ്രതിപക്ഷം.

പ്രതിദിനം 500 മെഗാവാട്ടിൻ്റെ കുറവ്

മഴയില്ലാത്ത ദിവസങ്ങളിൽ 500 മുതൽ 600 മെഗാവാട്ട് വൈദ്യുതിയുടെ കുറവ് ഇപ്പോൾ ദിവസേനയുണ്ട്. ഈ വിടവ് നികത്താനാകാത്തതാണ് പ്രധാന പ്രശ്നം. ഒന്നുകിൽ മഴ പെയ്യണം, അല്ലെങ്കിൽ പവർ എക്സ്ചേഞ്ച് എന്ന തത്സമയ വിപണിയിൽ വൈദ്യുതി ലഭ്യമാകണം. പവർ എക്സ്ചേഞ്ചിൽനിന്ന് നിലവിൽ വൈദ്യുതി കിട്ടാനില്ല. 

ഉത്പാദകരാകട്ടെ യൂണിറ്റിന് 10 രൂപ നിരക്കിൽ 24 മണിക്കൂറും വാങ്ങണമെന്ന നിബന്ധന വെക്കുന്നു. കേരളത്തിന് പകൽ വൈദ്യുതി ആവശ്യത്തിനുള്ളതിനാൽ ഇത് സ്വീകാര്യമല്ല. ജനം വൈദ്യുതിയുടെ ഉപഭോഗം കുറയ്ക്കുക മാത്രമാണ് നിയന്ത്രണത്തിൽ അയവ് വരുത്താൻ കെഎസ്ഇബിയുടെ മുന്നിലുള്ള ഏക മാർഗം. അതാകട്ടെ ഫലപ്രദമായി സാധ്യവുമല്ല. വേനൽക്കാലത്തേക്കായി കൂടുതൽ വൈദ്യുതി മുൻകൂട്ടി കരാറാക്കിയില്ലെങ്കിൽ നിയന്ത്രണം തുടരേണ്ടിവരും.

200 മെഗാവാട്ട് വാങ്ങാൻ കെഎസ്ഇബി

വൈദ്യുതി നിയന്ത്രണത്തിൽ അല്പം അയവുവരുത്താൻ 200 മെഗാവാട്ട് വാങ്ങാൻ കെഎസ്ഇബി ശ്രമം തുടങ്ങി. എൻടിപിസി ഉൾപ്പെടെയുള്ള സ്ഥാപനങ്ങളിൽ നിന്നാണിത്. യൂണിറ്റിന് 5.69 രൂപ നിരക്കിലാണിത്. റെഗുലേറ്ററി കമീഷൻ്റെ അനുവാദം കിട്ടിയാലുടൻ ഇതു വാങ്ങാനാണ് തീരുമാനം.

വൈദ്യുതി നിയന്ത്രണവുമായി ബന്ധപ്പെട്ട ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. പുതിയ അപ്ഡേറ്റുകൾ അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് താഴെ കമൻ്റായി രേഖപ്പെടുത്തുക.

Article Summary: KSEB plans to buy 200 MW to ease Kerala's severe power crisis.

#KSEB #PowerCut #KeralaNews #Trivandrum #LoadShedding #ElectricityCrisis #AmmuNews