കേരള പൊലീസ് സ്പോർട്സ് മീറ്റിൻ്റെ ഭാഗമായുള്ള ലഹരിവിരുദ്ധ ദീപശിഖാ പ്രയാണത്തിന് തുടക്കം; കാസർകോട്ട് നിന്ന് പ്രയാണം ആരംഭിച്ച ദീപശിഖയ്ക്ക് കണ്ണൂരിൽ ആവേശോജ്ജ്വല സ്വീകരണം നൽകി

കണ്ണൂർ/ കാസർകോട്: (KVARTHA) 'സ്‌പോർട്‌സിനൊപ്പം നിൽക്കൂ, ലഹരിയെ അകറ്റൂ' എന്ന മുദ്രാവാക്യവുമായി കേരള പൊലീസ് അത്‌ലറ്റിക് മീറ്റ് 2026-ൻ്റെ ഭാഗമായി സംഘടിപ്പിക്കുന്ന സംസ്ഥാനതല മാരത്തോണിനും ദീപശിഖാ പ്രയാണത്തിനും കാസർകോട്ട് തുടക്കമായി. സെപ്റ്റംബർ എട്ട് മുതൽ 10 വരെ തിരുവനന്തപുരത്ത് നടക്കുന്ന പൊലീസ് സ്പോർട്സ് മീറ്റിൻ്റെ മുന്നോടിയായാണ് പ്രയാണം. 

ശനിയാഴ്ച (സെപ്റ്റംബർ 5) രാവിലെ ഏഴ് മണിക്ക് കാസർകോട് പുതിയ ബസ് സ്റ്റാൻഡ് പരിസരത്ത് നിന്നാണ് ഈ ലഹരിവിരുദ്ധ ജനകീയ മുന്നേറ്റം ആരംഭിച്ചത്. സെപ്റ്റംബർ എട്ട് വരെ കാസർകോട് മുതൽ തിരുവനന്തപുരം വരെയാണ് മാരത്തോൺ നടക്കുന്നത്. 

ചടങ്ങിൽ കാസർകോട് എംപി രാജ്‌മോഹൻ ഉണ്ണിത്താൻ പരിപാടിയുടെ ഔദ്യോഗിക ഉദ്ഘാടനം നിർവഹിച്ചു. കാസർകോട് എംഎൽഎ എൻഎ നെല്ലിക്കുന്ന്, മഞ്ചേശ്വരം എംഎൽഎ എകെഎം അഷ്റഫ്, ഉദുമ എംഎൽഎ സിഎച്ച് കുഞ്ഞമ്പു, കാഞ്ഞങ്ങാട് എംഎൽഎ ഇ ചന്ദ്രശേഖരൻ, തൃക്കരിപ്പൂർ എംഎൽഎ എം രാജഗോപാലൻ, കാസർകോട് ജില്ലാ പഞ്ചായത്ത് പ്രസിഡൻ്റ് സാബു എബ്രഹാം, ബ്ലോക്ക് പഞ്ചായത്ത് പ്രസിഡൻ്റ് അബ്ദുല്ലക്കുഞ്ഞി, കാസർകോട് നഗരസഭാ അധ്യക്ഷ ഷാഹിന സലിം, വിദ്യാഭ്യാസ ഉപഡയറക്ടർ റഫീഖ് എന്നിവർ വിശിഷ്ടാതിഥികളായി.

വിദ്യാർഥികളുമായുള്ള സംവാദവും കാർണിവലും

കാസർകോട് എഎസ്പി അച്യുത് അശോക് ഐപിഎസ് ലഹരിവിരുദ്ധ പ്രതിജ്ഞ ചൊല്ലിക്കൊടുത്തു. 'തൂഫാൻ' ലഹരിവിരുദ്ധ പ്രചാരണ വാഹനത്തിൻ്റെ അനാച്ഛാദനം കാസർകോട് ജില്ലാ കളക്ടർ കെ അർജുൻ പാണ്ഡ്യൻ ഐഎഎസ് നിർവഹിച്ചു. അന്താരാഷ്ട്ര താരങ്ങളായ ജഗദീഷ് കുമ്പള, മുഹമ്മദ് റാഫി എന്നിവരിൽ നിന്നാണ് ദീപശിഖ ഏറ്റുവാങ്ങിയത്. 

പുലിക്കുന്നിലെ മുനിസിപ്പൽ കോൺഫറൻസ് ഹാളിൽ എൻഎസ്എസ്, എൻസിസി, എസ്പിസി കേഡറ്റുകളുമായി ജില്ലാ പൊലീസ് മേധാവി സംവദിച്ചു. ലഹരിവിരുദ്ധ സെഷന് ഡിവൈഎസ്പി ഡോ. വി ബാലകൃഷ്ണൻ നേതൃത്വം നൽകി. 

കാസർകോട് ജില്ലാ പൊലീസ് മേധാവി പി നിധിൻരാജ് ഐപിഎസ് സ്വാഗതവും ഡിവൈഎസ്പി ടി ഉത്തംദാസ് നന്ദിയും പറഞ്ഞു. വൈകുന്നേരം മൂന്ന് മണിക്ക് കാസർകോട് ഡിഎച്ച്ക്യു പൊലീസ് ടർഫിൽ എട്ട് ടീമുകളെ ഉൾപ്പെടുത്തി 'തൂഫാൻ കിക്ക്' സ്പോർട്സ് കാർണിവലും സംഘടിപ്പിച്ചു.

കണ്ണൂരിൽ ആവേശോജ്ജ്വല സ്വീകരണം

കാസർകോട്ട് നിന്ന് ആരംഭിച്ച ദീപശിഖയെ കണ്ണൂർ സിറ്റി പൊലീസിൻ്റെ ആഭിമുഖ്യത്തിൽ വിപുലമായ പരിപാടികളോടെയാണ് സ്വീകരിച്ചത്. കണ്ണൂർ റൂറൽ പൊലീസിൻ്റെ സ്വീകരണത്തിന് ശേഷം ദീപശിഖയെ കല്യാശ്ശേരിയിൽ വെച്ച് കണ്ണൂർ റൂറൽ ജില്ലാ പൊലീസ് മേധാവി ഉമേഷ് ഗോയൽ ഐപിഎസിൻ്റെ സാന്നിധ്യത്തിൽ ആർആർആർഎഫ് കമാൻഡൻ്റ് ശക്തി സിങ് ആര്യ ഐപിഎസിൽ നിന്ന് കണ്ണൂർ സിറ്റി പൊലീസ് കമ്മീഷണർ ബിവി വിജയ ഭരത് റെഡ്ഡി ഐപിഎസ് സ്വീകരിച്ചു. 

തുടർന്ന് കണ്ണൂർ എകെജി ആശുപത്രി പരിസരത്തുനിന്നുള്ള മാരത്തോണും സൈക്കിൾ റാലിയും ദീപശിഖാ പ്രയാണത്തെ അനുഗമിച്ചു. കാൽടെക്സ് പരിസരത്ത് നിന്ന് പൊലീസ് ബാൻഡ്, ശിങ്കാരിമേളം, എസ്പിസി കേഡറ്റുകളുടെ മാർച്ച് പാസ്റ്റ് എന്നിവയുടെ അകമ്പടിയോടെ ദീപശിഖ കണ്ണൂർ പൊലീസ് പരേഡ് ഗ്രൗണ്ടിലെ പ്രധാന വേദിയിലേക്ക് എത്തുകയും, സിറ്റി പൊലീസ് കമ്മീഷണറിൽ നിന്ന് കണ്ണൂർ സിറ്റി അഡീഷണൽ സൂപ്രണ്ട് ഓഫ് പൊലീസ് ഷാജി വർഗീസ് സ്വീകരിക്കുകയും ചെയ്തു.

കണ്ണൂരിലെ ഔദ്യോഗിക ചടങ്ങും കലാപരിപാടികളും

പൊലീസ് മൈതാനത്ത് നടന്ന ഔദ്യോഗിക ചടങ്ങിൽ കണ്ണൂർ സിറ്റി പൊലീസ് കമ്മീഷണർ ബിവി വിജയ ഭരത് റെഡ്ഡി ഐപിഎസ് സ്വാഗതം ആശംസിച്ചു. ജില്ലാ പഞ്ചായത്ത് പ്രസിഡൻ്റ് അഡ്വ. ബിനോയ് കുര്യൻ അധ്യക്ഷത വഹിച്ച ചടങ്ങ് കണ്ണൂർ എംപി കെ സുധാകരൻ ഉദ്ഘാടനം ചെയ്തു. ഗായിക ദേവന ചടങ്ങിൽ അതിഥിയായി സംബന്ധിച്ചു. 

കോർപ്പറേഷൻ വികസനകാര്യ സ്റ്റാൻഡിങ് കമ്മിറ്റി ചെയർപേഴ്സൺ അഡ്വ. ലിഷ ദീപക്, കണ്ണൂർ അസിസ്റ്റൻ്റ് കളക്ടർ എസ് സ്വാതി ഐഎഎസ്, മദേഴ്സ് ആർമി ജനറൽ സെക്രട്ടറി ഷബാന ജംഷീദ് എന്നിവർ സംസാരിച്ചു. കണ്ണൂർ അസിസ്റ്റൻ്റ് കമ്മീഷണർ ഓഫ് പൊലീസ് എംപി ആസാദ് നന്ദി പറഞ്ഞു. 

തുടർന്ന് കാണികളെ ആവേശം കൊള്ളിച്ച വിവിധ കലാ-കായിക പരിപാടികൾ വേദിയിൽ അരങ്ങേറി. ഏച്ചൂർ വിശ്വഭാരതി കളരി സംഘത്തിൻ്റെ കളരിപ്പയറ്റ് പ്രദർശനം, വനിതാ പൊലീസ് ടീം അവതരിപ്പിച്ച 'തൂഫാൻ' നൃത്താവിഷ്കാരം, സെൻ്റ് തെരേസാസ് ടീമിൻ്റെ ഫ്ലാഷ് മോബ് എന്നിവ പരിപാടിയുടെ പ്രധാന ആകർഷണങ്ങളായി. വിവിധ വകുപ്പുകളിലെ അത്‌ലറ്റുകൾ മാറ്റുരച്ച റിലേ മത്സരത്തിൽ കണ്ണൂർ സിറ്റി പൊലീസ് ടീം വിജയികളായി. 2-ാം സ്ഥാനം റവന്യൂ ഡിപ്പാർട്ട്മെൻ്റും നേടി.

ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്താം

Article Summary: The anti-drug torch relay for the Kerala Police Athletic Meet 2026, bearing the slogan 'Yes to Sports, No to Drugs', kicked off in Kasaragod on September 5, 2026, and received a grand reception in Kannur.

#Kvartha #KeralaPolice #AntiDrugCampaign #YesToSportsNoToDrugs #KasaragodNews #KannurNews #KeralaNews #MalayalamNews #TorchRelay #AthleticMeet2026#AmmuNews