'നമുക്ക് പറയാം': പൊലീസ് ഓഫീസേഴ്സ് അസോസിയേഷൻ സംസ്ഥാന തല ശില്പശാല ജനുവരി 02, 03 തീയതികളിൽ

തിരുവനന്തപുരം: (KVARTHA) കേരള പൊലീസ് ഓഫീസേഴ്‌സ് അസോസിയേഷൻ സംഘടിപ്പിക്കുന്ന ‘നമുക്ക് പറയാം’ സംസ്ഥാന തല ശില്‌പശാലയ്ക്ക് തിരുവനന്തപുരം വേദിയാകുന്നു. 2026 ജനുവരി 02, 03 തീയതികളിലായി തിരുവനന്തപുരം ഗവ. കോട്ടൺഹിൽ ഗേൾസ് ഹയർ സെക്കൻ്ററി സ്‌കൂളിലാണ് ശിൽപ്പശാല നടക്കുക. വിവിധ ജില്ലകളിൽ നിന്ന് തിരഞ്ഞെടുക്കപ്പെട്ട പ്രതിനിധികൾ രണ്ട് ദിവസങ്ങളിലായി നടക്കുന്ന ഈ ചർച്ചകളിൽ പങ്കെടുക്കും.

സംസ്ഥാന പൊലീസിൻ്റെ നവീകരണത്തിനും പൊതുസമൂഹത്തിന് കൂടുതൽ മികവുറ്റ പൊലീസ് സേവനം ലഭ്യമാക്കുന്നതിനും ആവശ്യമായ മാറ്റങ്ങൾ കൊണ്ടുവരിക എന്ന ലക്ഷ്യത്തോടെയാണ് ശില്പശാല സംഘടിപ്പിച്ചിട്ടുള്ളത്. പൊലീസ് ഉദ്യോഗസ്ഥർ അവരുടെ ഔദ്യോഗിക ജീവിതത്തിൽ നേരിടുന്ന വിവിധങ്ങളായ പ്രതിസന്ധികളും അവ പരിഹരിക്കുന്നതിനുള്ള പ്രായോഗിക മാർഗ്ഗങ്ങളും ശില്പശാലയിൽ വിശദമായി ചർച്ച ചെയ്യും.

ഈ സംസ്ഥാന തല ശില്പശാലയ്ക്ക് മുന്നോടിയായി ഒക്ടോബർ ഒന്ന് മുതൽ വിപുലമായ ക്യാമ്പയിൻ അസോസിയേഷൻ നടത്തി വരികയാണ്. സംഘടനയുടെ സംസ്ഥാന ഭാരവാഹികൾ കേരളത്തിലെ മുഴുവൻ പൊലീസ് യൂണിറ്റുകളിലും നേരിട്ടെത്തി ഉദ്യോഗസ്ഥരുമായി ആശയവിനിമയം നടത്തിയിരുന്നു. 

യൂണിറ്റ് തല സംവാദങ്ങൾക്ക് പിന്നാലെ ഓരോ ജില്ലകളിലും തിരഞ്ഞെടുക്കപ്പെട്ട പ്രതിനിധികളെ പങ്കെടുപ്പിച്ച് ഏകദിന ശില്പശാലകളും സംഘടിപ്പിച്ചിരുന്നു. ഈ ജില്ലാതല ശില്പശാലകളിൽ നിന്ന് തിരഞ്ഞെടുക്കപ്പെട്ടവരാണ് ജനുവരിയിൽ തലസ്ഥാനത്ത് നടക്കുന്ന സംസ്ഥാന തല യോഗത്തിൽ പങ്കെടുക്കുക. പൊലീസിന്റെ സേവന നിലവാരം വർദ്ധിപ്പിക്കുന്നതിനും ഉദ്യോഗസ്ഥരുടെ ക്ഷേമത്തിനുമായി തയ്യാറാക്കിയ നിർദ്ദേശങ്ങൾ ഇവിടെ സമർപ്പിക്കും.

കേരള പൊലീസിലെ മാറ്റങ്ങൾക്കായുള്ള ഈ വാർത്ത ഷെയർ ചെയ്യൂ. നിങ്ങളുടെ അഭിപ്രായങ്ങൾ പങ്കുവെക്കൂ. 

Article Summary: Kerala Police Officers Association state workshop 'Namukku Parayam' on Jan 2-3 at Trivandrum.

#KeralaPolice #PoliceOfficersAssociation #Trivandrum #NamukkuParayam #PoliceReform #KeralaNews