തിരുവനന്തപുരം: (KVARTHA) കേരള നിയമസഭ 2024-ലെ മാധ്യമ അവാർഡ് ജേതാക്കളെ പ്രഖ്യാപിച്ചു. ദൃശ്യ-അച്ചടി മാധ്യമ വിഭാഗങ്ങളിലെ മികച്ച സൃഷ്ടികൾക്ക് നൽകുന്ന അവാർഡുകളാണ് പ്രഖ്യാപിച്ചത്. മലയാള ഭാഷയുടെയും സംസ്കാരത്തിന്റെയും പരിപോഷണത്തിന് ശക്തി പകരുന്ന മാധ്യമ പ്രവർത്തനം, പൊതു സമൂഹത്തെ സ്വാധീനിക്കുകയും സമൂഹത്തിൽ ഏറെ ചർച്ച ചെയ്യപ്പെടുകയും ചെയ്ത അന്വേഷണാത്മക മാധ്യമ പ്രവർത്തനം, നിയമസഭാ നടപടികളുടെ റിപ്പോർട്ടിംഗ് എന്നീ മേഖലകളിൽ മികച്ച സംഭാവനകൾ നൽകിയ മാധ്യമപ്രവർത്തകർക്കാണ് അവാർഡുകൾ.

അവാർഡ് ജേതാക്കൾ:

അച്ചടി മാധ്യമം:
● ആർ. ശങ്കരനാരായണൻ തമ്പി അവാർഡ്: എൻ. പി. സി. രംജിത്, മലയാള മനോരമ  (വൃന്ദാവനമാകും, ചിറക്കലിൽ കൃഷ്ണഗാഥ പിറന്ന മണ്ണ് എന്ന ഫീച്ചർ).
● ഇ. കെ. നായനാർ അവാർഡ്: എം. എസ്. രാഖേഷ് കൃഷ്ണൻ, മാതൃഭൂമി തൊഴിൽ വാർത്ത (കേന്ദ്ര സർവീസ് നിയമനക്കണക്കിലെ ഒളിച്ചുകളികൾ എന്ന സീരീസ്).
● ജി. കാർത്തികേയൻ അവാർഡ്: മനോജ് കടമ്പാട്, മലയാള മനോരമ  (അടിയന്തര പ്രമേയം എത്ര അടിയന്തരമാവണം? ഏക വ്യക്തിനിയമനത്തിനു വേണ്ടി സി.പി.എം നിയമസഭാ പോരാട്ടം: ഇന്ന് 38-ാം വാർഷികം, ആദ്യം ശങ്കിച്ചു, പിന്നെ കടുപ്പിച്ചു എന്നീ റിപ്പോർട്ടുകൾ).

ദൃശ്യ മാധ്യമം:
● സി. അച്യുതമേനോൻ അവാർഡ്: ജി. പ്രസാദ് കുമാർ, മാതൃഭൂമി ന്യൂസ് (കരിമ്പനയുടെ ജാതകം എന്ന പ്രത്യേക പരിപാടി).
● കെ. ആർ. ഗൗരിയമ്മ അവാർഡ്: ഷാഫിഖാൻ എസ്., ഏഷ്യാനെറ്റ് ന്യൂസ് (ടോപ്പ് ഗിയർ: സുജയുടെ ജീവിത യാത്രകൾ എന്ന ഫീച്ചർ).

ഓരോ അവാർഡും 50,000 രൂപയും പ്രശസ്തിപത്രവും ഫലകവും ഉൾക്കൊള്ളുന്നു. അവാർഡുകൾ വിതരണം ചെയ്യുന്ന ചടങ്ങ് ഡിസംബർ 4-ന് വൈകിട്ട് 3 മണിക്ക് നിയമസഭാ സമുച്ചയത്തിൽ വച്ച് നടക്കും. നിയമസഭാ സ്പീക്കർ എ.എൻ. ഷംസീർ ചടങ്ങിൽ മുഖ്യാതിഥിയായിരിക്കും.

കെ. ജയകുമാർ (ചെയർമാൻ), എം. ജി. രാധാകൃഷ്ണൻ, ബാബു ജോസഫ്, ഡോ. മീന ടി. പിള്ള എന്നിവരാണ് അംഗങ്ങളും, നിയമസഭാ സെക്രട്ടറി ഡോ. എൻ. കൃഷ്ണ കുമാർ മെമ്പർ സെക്രട്ടറിയുമായ ജൂറിയാണ് അവാർഡ് ജേതാക്കളെ തെരഞ്ഞെടുത്തത്.

#KeralaMediaAwards #LegislativeAssembly #MalayalamMedia #JournalismAwards #KeralaNews #2024