കണ്ണൂർ: (KVARTHA) കേരളം വ്യവസായ സൗഹൃദമായ അന്തരീക്ഷം ഒരുക്കുന്നതിൽ രാജ്യത്ത് ഒന്നാം സ്ഥാനത്താണെന്ന് വ്യവസായ വകുപ്പ് മന്ത്രി പി. രാജീവ് പറഞ്ഞു. കണ്ണൂർ മാവിലായിയിലെ കറിപൗഡർ ഫാക്ടറി അങ്കണത്തിൽ റെയ്ഡ്കോ ഫുഡ്സ് ഉൽപ്പന്നങ്ങളുടെ വിദേശത്തേക്കുള്ള കയറ്റുമതി ഉദ്ഘാടനം ചെയ്തുകൊണ്ട് സംസാരിക്കുകയായിരുന്നു മന്ത്രി.

ലോകത്തെ 139 രാജ്യങ്ങളിലും മലയാളികൾ ഉള്ളതിനാൽ, അവരുടെ രുചികൾക്ക് അനുയോജ്യമായ കേരളീയ ഉൽപ്പന്നങ്ങൾ എത്തിക്കുക എന്ന ലക്ഷ്യത്തോടെയാണ് ഈ നീക്കമെന്ന് മന്ത്രി പറഞ്ഞു. കേരളം ഇന്ന് ലോകമെങ്ങും അംഗീകരിക്കപ്പെടുന്ന ഒരു ബ്രാൻഡാണെന്നും അദ്ദേഹം കൂട്ടിച്ചേർത്തു. റെയ്ഡ്കോ ഉൽപ്പന്നങ്ങൾക്ക് കേരളത്തിലെ പൊതുമേഖല സ്ഥാപനങ്ങളുടെ ഓൺലൈൻ പ്ലാറ്റ്ഫോം കെഷോപ്പി ഉപയോഗിക്കാനാകും. കേരളാ ബ്രാൻഡിൽ ഗുണമേന്മയും വിശ്വസ്തതയുമുള്ള കറിപൗഡറുകൾ കൂടി ഉൾപ്പെടുത്തുമ്പോൾ റെയ്ഡ്കോയ്ക്ക് മാനദണ്ഡതനുസരിച്ചുള്ള അംഗീകാരം ലഭിക്കുമെന്നും മന്ത്രി പറഞ്ഞു. 

സംസ്ഥാനത്ത് ഒരു വർഷം ഒരു ലക്ഷം സംരംഭകരെ സൃഷ്ടിക്കുക എന്ന ലക്ഷ്യം സർക്കാർ മുന്നോട്ടുവച്ചിരുന്നു. എന്നാൽ, രണ്ടര വർഷം കൊണ്ട് തന്നെ മൂന്നേകാൽ ലക്ഷം സംരംഭങ്ങൾ ആരംഭിച്ചു എന്നത് വലിയ നേട്ടമാണ്. ഇതിൽ 1.80 ലക്ഷം സംരംഭകർ സ്ത്രീകളാണെന്നത് പ്രത്യേകം ശ്രദ്ധേയമാണ്. ഗുണമേന്മയുള്ള ഉൽപ്പന്നങ്ങൾക്ക് വിപണിയിൽ എപ്പോഴും സ്ഥാനമുണ്ടാകുമെന്നും ഓൺലൈൻ വിപണനം ഇതിനായി വലിയ സാധ്യതകൾ തുറന്നിടുന്നുവെന്നും മന്ത്രി ചൂണ്ടിക്കാട്ടി.

റെയ്ഡ്കോ ചെയർമാൻ എം. സുരേന്ദ്രന് മന്ത്രി കയറ്റുമതി ചെയ്ത ഉൽപ്പന്നങ്ങളുടെ കൺസൈൻമെന്റിന്റെ ചെക്ക് കൈമാറി. ദുബായിലേക്കുള്ള കയറ്റുമതിക്ക് പുതിയതായി ലഭിച്ച രണ്ട് ഓർഡറുകളും മന്ത്രിക്ക് കൈമാറി. ആദ്യഘട്ടത്തിൽ യു.എ.ഇ.യിലേക്കും പിന്നീട് ഖത്തർ, സൗദി അറേബ്യ, ഒമാൻ, ബഹ്‌റൈൻ തുടങ്ങിയ മറ്റ് അറബ് രാജ്യങ്ങളിലേക്കും കയറ്റുമതി വ്യാപിപ്പിക്കാനുള്ള പദ്ധതികളാണ്.

ജില്ലാ പഞ്ചായത്ത് പ്രസിഡന്റ് അഡ്വ. കെ. കെ. രത്നകുമാരി അധ്യക്ഷയായിരുന്നു. പെരളശ്ശേരി ഗ്രാമപഞ്ചായത്ത് പ്രസിഡന്റ് എ. വി. ഷീബ, ജില്ലാ പഞ്ചായത്ത് മെമ്പർ പി ശ്രീധരൻ, റെയ്ഡ്കോ ചെയർമാൻ എം സുരേന്ദ്രൻ, വൈസ് ചെയർമാൻ കെ. പുഷ്പജ, ഡയറക്ടർമാരായ കെ. കെ ഗംഗാധരൻ, വാസു തോട്ടത്തിൽ, ചീഫ് എക്സിക്യൂട്ടീവ് ഓഫീസർ വി രതീശൻ, മുൻ എംഎൽഎ കെ. കെ നാരായണൻ, വിവിധ രാഷ്ട്രീയ പാർട്ടി പ്രതിനിധികൾ, വ്യാപാരി വ്യവസായി ഏകോപന സമിതി അംഗങ്ങൾ, യൂണിയൻ പ്രതിനിധികൾ തുടങ്ങിയവർ സംസാരിച്ചു.

#KeralaBusiness #RaidcoFoods #KeralaExports #Prajivee #KeralaGrowth #CurryPowders