തിരുവനന്തപുരം: (KVARTHA) കേരളത്തിലെ ഐടിഐകളിൽ ആർത്തവ അവധി പ്രഖ്യാപിച്ച് സർക്കാർ. മാസത്തിൽ രണ്ട് ദിവസമാണ് അവധി അനുവദിച്ചിരിക്കുന്നത്. വളരെ ആയാസമേറിയ നൈപുണ്യ പരിശീലന ട്രേഡുകളിൽ പോലും വനിതാ ട്രെയിനികൾ നിലവിലുണ്ടെന്നും ഇക്കാര്യങ്ങൾ എല്ലാം കണക്കിലെടുത്താണ് ഈ തീരുമാനമെടുത്തതെന്നും വിദ്യാഭ്യാസ മന്ത്രി വി ശിവൻകുട്ടി വ്യക്തമാക്കി.

ഇതോടൊപ്പം, ഐടിഐകളിലെ പ്രവൃത്തി ദിവസങ്ങളിലും മാറ്റം വരുത്തിയിരിക്കുന്നു. ഇതുവരെ പ്രവൃത്തി ദിവസമായിരുന്ന ശനിയാഴ്ചകൾ ഇനി മുതൽ അവധിയായിരിക്കും. എന്നാൽ, ആവശ്യമുള്ള വിദ്യാർഥികൾക്ക് ഷോപ്പ് ഫ്ലോർ ട്രെയിനിങ്, ഹ്രസ്വകാല പരിശീലന കോഴ്സുകൾ തുടങ്ങിയ പാഠ്യേതര പ്രവർത്തനങ്ങൾക്ക് ഈ ദിവസം ഉപയോഗപ്പെടുത്താം.

ഈ തീരുമാനത്തിലൂടെ, ഐടിഐകളിലെ പഠന സമയത്തിനും മാറ്റം വന്നിട്ടുണ്ട്. ഇനി മുതൽ രണ്ട് ഷിഫ്റ്റുകളിലായി ക്ലാസുകൾ നടക്കും. ആദ്യ ഷിഫ്റ്റ് രാവിലെ 7.30 മുതൽ വൈകുന്നേരം 3.00 മണി വരെയും രണ്ടാം ഷിഫ്റ്റ് രാവിലെ 10 മണി മുതൽ വൈകുന്നേരം 5.30 വരെയുമായിരിക്കും.

#KeralaITI #menstrualleave #womenshealth #education #India #policychange