ഇനി 'കേരളം' മാത്രം; സർക്കാർ ഓഫീസുകളിലും രേഖകളിലും പേരുമാറ്റം ഘട്ടം ഘട്ടമായി നടപ്പാക്കാൻ ചീഫ് സെക്രട്ടറിയുടെ നിർദേശം

തിരുവനന്തപുരം: (KVARTHA) സംസ്ഥാനത്തിന്റെ പേര് ഇംഗ്ലീഷിൽ 'Kerala' എന്നതിൽ നിന്ന് 'Keralam' എന്നും മലയാളത്തിൽ 'കേരള' എന്നതിൽ നിന്ന് 'കേരളം' എന്നും മാറ്റി കേന്ദ്രസർക്കാർ വിജ്ഞാപനം പുറപ്പെടുവിച്ചതിന് പിന്നാലെ, സർക്കാർ ഓഫീസുകളിലും പൊതുസ്ഥാപനങ്ങളിലും പേരുമാറ്റം ഘട്ടം ഘട്ടമായി നടപ്പാക്കാൻ നിർദേശം. ചീഫ് സെക്രട്ടറി ബിശ്വനാഥ് സിൻഹ ശനിയാഴ്ച (ഓഗസ്റ്റ് 29) പുറത്തിറക്കിയ സർക്കുലറിലാണ് ഇതുസംബന്ധിച്ച വ്യക്തമായ മാർഗനിർദേശങ്ങൾ നൽകിയത്.

സർക്കാർ വകുപ്പുകൾ, വകുപ്പ് മേധാവികളുടെ ഓഫീസുകൾ, ഫീൽഡ് ഓഫീസുകൾ, പൊതുമേഖലാ സ്ഥാപനങ്ങൾ, ബോർഡുകൾ, കോർപ്പറേഷനുകൾ, തദ്ദേശ സ്വയംഭരണ സ്ഥാപനങ്ങൾ, സർക്കാരിന്റെ നിയന്ത്രണത്തിലുള്ള മറ്റ് സ്ഥാപനങ്ങൾ എന്നിവിടങ്ങളിലെ നെയിം ബോർഡുകളിലും ഔദ്യോഗിക രേഖകളിലും ഇനി പുതിയ പേര് ഉപയോഗിക്കണം. എന്നാൽ പേരുമാറ്റത്തിന്റെ പേരിൽ പഴയ ലെറ്റർഹെഡുകൾ, കവറുകൾ, ഫോമുകൾ, രജിസ്റ്ററുകൾ, ഫയലുകൾ, പ്രസിദ്ധീകരണങ്ങൾ തുടങ്ങിയ സ്റ്റേഷനറി സാധനങ്ങൾ നശിപ്പിച്ച് പുതിയത് അച്ചടിക്കരുതെന്ന് സർക്കാർ പ്രത്യേകം നിർദേശിച്ചിട്ടുണ്ട്.

സർക്കുലറിലെ പ്രധാന നിർദേശങ്ങൾ

ഓഫീസുകളിൽ നിലവിലുള്ള പഴയ സാധനങ്ങൾ നഷ്ടപ്പെടുത്താതെ തന്നെ പുതിയ പേര് എങ്ങനെ ഉൾപ്പെടുത്താമെന്നത് സംബന്ധിച്ച് സർക്കുലറിൽ കൃത്യമായ നിർദേശങ്ങളുണ്ട്:

● ലെറ്റർഹെഡുകളും ഫോമുകളും: സാധ്യമാകുന്നിടത്ത് ഇംഗ്ലീഷിലെ 'Kerala' എന്നതിനൊപ്പം 'm' ചേർത്ത് 'Keralam' എന്നും, മലയാളത്തിലെ 'കേരള' എന്നതിനൊപ്പം 'ം' ചേർത്ത് 'കേരളം' എന്നും തിരുത്തി ഉപയോഗിക്കാം.
● റബർ സ്റ്റാമ്പുകൾ: ഓഫീസുകളിലെ നിലവിലുള്ള റബർ സ്റ്റാമ്പുകളും മുദ്രകളും കേടുവരുന്നതുവരെ ഉപയോഗിക്കാം. ആവശ്യമെങ്കിൽ ചെറിയ തിരുത്തലുകൾ വരുത്തിയാൽ മതിയാകും.
● ഓഫീസ് ബോർഡുകൾ: നിലവിലുള്ള നെയിം ബോർഡുകളും ദിശാസൂചികകളും ഉടൻ മാറ്റേണ്ടതില്ല. പെയിന്റ് ചെയ്യുന്ന സമയത്തോ അല്ലെങ്കിൽ തനിമ നഷ്ടപ്പെടാതെ 'm', 'ം' എന്നിവ ചേർത്തോ തിരുത്താം.

ഐ.ടി. സംവിധാനങ്ങളിലെ മാറ്റം

ഉപകരണങ്ങൾ, വാഹനങ്ങൾ, ഫർണിച്ചറുകൾ എന്നിവയുടെ കാലാവധി കഴിയുന്നതിന് മുൻപ് പേരുമാറ്റാൻ വേണ്ടി മാത്രം പുതിയവ വാങ്ങരുതെന്നും പുതിയവയ്ക്ക് ഓർഡർ നൽകുമ്പോൾ പുതിയ പേര് തന്നെ ഉപയോഗിക്കണമെന്നും നിർദേശമുണ്ട്. ഇനി പുതുതായി അച്ചടിക്കുന്ന സ്റ്റേഷനറികളിലും പുതിയ ബോർഡുകളിലും 'കേരളം' എന്ന് തന്നെ നിർബന്ധമായും ചേർക്കണം. സർക്കാർ വെബ്സൈറ്റുകളിലും ഐ.ടി. സംവിധാനങ്ങളിലും അധിക ചെലവില്ലാത്ത രീതിയിൽ പേരുമാറ്റാൻ ഐ.ടി. വകുപ്പ് അടിയന്തര നടപടി സ്വീകരിക്കണം.

പുതിയ വാർത്തകൾ അറിയാൻ ഞങ്ങളുടെ വാട്സ്ആപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായം ഞങ്ങളുടെ ഫേസ്ബുക്ക് പേജിൽ ഈ വാർത്തയുടെ പോസ്റ്റിന് താഴെ കമന്റായി രേഖപ്പെടുത്താനും മറക്കരുത്. കൂടുതൽ വാർത്തകൾ അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. 

Article Summary: Govt issues guidelines to adopt Keralam name change.

#KeralaToKeralam #KeralaGovernment #ChiefSecretary #Keralam #KeralaNews #OfficialNameChange #KeralaAdministration #AnjanaNews