തിരുവനന്തപുരം: (KVARTHA) കേരളത്തിലെ എല്ലാ കോളേജ് വിദ്യാർഥികളെയും കായികരംഗത്ത് സജീവമാക്കുക എന്ന ലക്ഷ്യത്തോടെ കേരള കോളേജ് സ്‌പോർട്‌സ് ലീഗ് ആരംഭിക്കുന്നു. ഇതിന്റെ ഉദ്ഘാടനം തിരുവനന്തപുരം യൂണിവേഴ്‌സിറ്റി കോളേജിൽ വച്ച് നടന്നു. ഈ ലീഗ് വഴി വിദ്യാർഥികൾക്ക് മികച്ച കായിക സംസ്കാരം വളർത്തിയെടുക്കാനും കോളേജുകളിലെ അടിസ്ഥാന സൗകര്യങ്ങൾ മെച്ചപ്പെടുത്താനും സാധിക്കുമെന്ന് ഉദ്ഘാടന ചടങ്ങിൽ സംസാരിച്ച ഉന്നത വിദ്യാഭ്യാസ മന്ത്രി ഡോ. ആർ. ബിന്ദു അഭിപ്രായപ്പെട്ടു.

രാജ്യത്താദ്യമായിട്ടാണ് കേരളത്തിൽ കോളേജ് വിദ്യാർഥികൾക്കായി പ്രത്യേക സ്‌പോർട്‌സ് ലീഗ് ആരംഭിക്കുന്നത്. ഈ ലീഗ് വഴി എല്ലാ വിദ്യാർഥികൾക്കും കായികരംഗത്ത് പങ്കെടുക്കാനുള്ള അവസരം ലഭിക്കും. കായിക പ്രതിഭകളെ മാത്രമല്ല, കായിക താൽപര്യമുള്ള എല്ലാ വിദ്യാർഥികളെയും ഇത് ഉൾക്കൊള്ളും. കായിക ഉച്ചകോടിയുടെ ഭാഗമായി ഉയർന്നു വന്ന ഈ ആശയം വിദ്യാർഥി സമൂഹവും കോളേജുകളും ഏറ്റെടുത്തതിൽ സന്തോഷമുണ്ടെന്ന് മന്ത്രി പറഞ്ഞു. ലീഗിന്റെ ഭാഗമായി സംസ്ഥാനത്തെ എല്ലാ കോളേജുകളിലും സ്പോർട്സ് ക്ലബ് തുടങ്ങും. വിദ്യാഭ്യാസ കായിക മേഖലകളിൽ മുന്നിട്ടു നിൽക്കുന്ന യൂണിവേഴ്‌സിറ്റി കോളേജിൽ ഇതിന് തുടക്കമിടുകയാണ്. മികച്ച കായിക സംസ്‌കാരം വാർത്തെടുക്കുന്നതിനൊപ്പം കോളേജുകളിലെ അടിസ്ഥാനസൗകര്യ വികസനം കൂടി ലക്ഷ്യമിട്ടാണ് കായിക വകുപ്പുമായി ചേർന്ന് സ്പോർട്‌സ് ലീഗ് പദ്ധതി നടപ്പിലാക്കുന്നത്. 

കായിക വകുപ്പ് മന്ത്രി വി. അബ്ദുറഹിമാൻ അറിയിച്ചതുപ്രകാരം, ഫുട്ബോൾ, ക്രിക്കറ്റ്, വോളിബോൾ, കബഡി എന്നീ ഇനങ്ങളിലാണ് ആദ്യഘട്ടത്തിൽ ലീഗ് നടക്കുക. കോളേജ് സ്‌പോർട്‌സ് ലീഗിന്റെ ഔദ്യോഗിക പ്രഖ്യാപനം നിർവഹിക്കുകയായിരുന്നു മന്ത്രി. ഭാവിയിൽ കൂടുതൽ ഇനങ്ങൾ ഉൾപ്പെടുത്തും. സംസ്ഥാനത്തെ കോളേജുകളെ നാല് സോണുകളായി തിരിച്ച് മൂന്ന് മുതൽ ആറുമാസം വരെ നീളുന്ന സ്‌പോർട്‌സ് ലീഗാണ് സംഘടിപ്പിക്കുക. ജില്ലാതല കമ്മിറ്റികൾ സ്പോർട്സ് ക്ലബുകളെ ഏകോപിപ്പിക്കും. ഉന്നതവിദ്യാഭ്യാസ, കായിക വകുപ്പുകളുടെ ഉദ്യോഗസ്ഥർ, ജില്ലാ സ്‌പോർട്‌സ് കൗൺസിൽ ഭാരവാഹികൾ, കായിക സംഘടനാ പ്രതിനിധികൾ, മുൻതാരങ്ങൾ എന്നിവർ ഈ കമ്മിറ്റികളിൽ അംഗങ്ങളായിരിക്കും. മുഖ്യമന്ത്രിയുടെ അധ്യക്ഷതയിൽ ഉന്നതവിദ്യാഭ്യാസ മന്ത്രിയും കായിക മന്ത്രിയും വൈസ് ചാൻസലർമാരും ഉദ്യോഗസ്ഥരും അടങ്ങുന്ന സംസ്ഥാനതല സമിതിയാകും ഭരണനിർവഹണം നടത്തുകയെന്ന് മന്ത്രി അറിയിച്ചു.

കോളേജ് സ്‌പോർട്‌സ് ക്ലബുകൾക്ക് സ്വന്തമായി വരുമാനം ഉണ്ടാക്കാനുള്ള സാധ്യതകൾ ഒരുക്കുക എന്നതാണ് ലീഗിന്റെ മറ്റൊരു ലക്ഷ്യം. കോളേജ് ലീഗിൽ മികച്ച പ്രകടനം കാഴ്ചവെക്കുന്നവർക്ക് പ്രൊഫഷണൽ ലീഗിലേക്ക് കടക്കാനുള്ള അവസരവും ലഭിക്കും. സ്വദേശത്തും വിദേശത്തുമുള്ള മികച്ച പരിശീലകരുടെ സേവനം വിദ്യാർഥികൾക്ക് ലഭ്യമാക്കാനും ലീഗ് ലക്ഷ്യമിടുന്നു.

സ്‌പോർട്‌സ് യുവജനകാര്യ ഡയറക്ടർ പി. വിഷ്ണുരാജ്, കേരള സ്റ്റേറ്റ് സ്‌പോർട്‌സ് കൗൺസിൽ പ്രസിഡന്റ് യു. ഷറഫലി, യൂണിവേഴ്‌സിറ്റി കോളേജ് പ്രിൻസിപ്പൽ ഡോ. സന്തോഷ് കുമാർ, ഉന്നത വിദ്യാഭ്യാസ ഡെപ്യൂട്ടി ഡയറക്ടർ വി എസ് ജോയ് തുടങ്ങിയവർ ചടങ്ങിൽ സംസാരിച്ചു.

#KeralaSports #CollegeLeague #InclusiveSports #Football #Cricket #Kabaddi