തിരുവനന്തപുരം: (KVARTHA) നിർമ്മിത ബുദ്ധിയുടെ (AI) സാധ്യതകളും വെല്ലുവിളികളും തിരിച്ചറിഞ്ഞ് സംസ്ഥാന സർക്കാർ മുന്നോട്ട് പോകുകയാണെന്ന് മുഖ്യമന്ത്രി പിണറായി വിജയൻ നിയമസഭയിൽ പറഞ്ഞു. ലോകമെമ്പാടും നിർമ്മിത ബുദ്ധിയുടെ ഉപയോഗം വർധിച്ചു വരുന്ന ഈ കാലഘട്ടത്തിൽ, മുൻകാല കണ്ടുപിടുത്തങ്ങൾ സൃഷ്ടിച്ച തൊഴിൽ നഷ്ടം പോലുള്ള ആശങ്കകൾ കണക്കിലെടുത്ത്, ചരിത്രത്തിൽ നിന്ന് പാഠങ്ങൾ ഉൾക്കൊണ്ടാണ് സർക്കാർ ഈ നൂതന സാങ്കേതിക വിദ്യയെ സമീപിക്കുന്നത്.

ഡിജിറ്റൽ യൂണിവേഴ്സിറ്റി, ഐസിഫോസ് തുടങ്ങിയ സ്ഥാപനങ്ങൾ നിർമ്മിത ബുദ്ധിയിൽ ഗൗരവമായ ഗവേഷണങ്ങൾ നടത്തി വരികയാണ്. ഉന്നത വിദ്യാഭ്യാസ മേഖലയിൽ ആർട്ടിഫിഷ്യൽ ഇൻഗ്രീഡിയൻസ് ഡാറ്റാ സയൻസ് പോലുള്ള നൂതന കോഴ്സുകൾ ആരംഭിക്കാൻ സർക്കാർ ആലോചിക്കുന്നുണ്ട്. നിലവിലെ വിവര സാങ്കേതിക വിദ്യ സേവന മേഖലയിലെ തൊഴിൽ നഷ്ടം കണക്കിലെടുത്ത്, പുതിയ തലമുറ തൊഴിലവസരങ്ങൾ സൃഷ്ടിക്കുന്നതിന് സർക്കാർ മുൻഗണന നൽകുന്നു. ഇതിനായി ഡിജിറ്റൽ യൂണിവേഴ്സിറ്റിയും ഐസിഫോസും പുതിയ കോഴ്സുകൾ ആരംഭിക്കും.

നിർമ്മിത ബുദ്ധി മേഖലയിൽ പ്രവർത്തിക്കുന്ന സ്റ്റാർട്ടപ്പുകൾക്കായി ഈ വർഷത്തെ ബജറ്റിൽ പ്രധാനപ്പെട്ട പദ്ധതികൾ പ്രഖ്യാപിച്ചിട്ടുണ്ട്. ഇതിൻ്റെ ഭാഗമായി ഡീപ് ടെക് എക്കോസിസ്റ്റം രൂപീകരിക്കും. നിർമ്മിത ബുദ്ധി, മെഷീൻ ലേണിംഗ്, അനിമേഷൻ, വിഷ്വൽ എഫക്ട്, ഗെയിമിംഗ്, കോമിക്സ് എന്നീ മേഖലകളിലെ സംരംഭകർക്കായി ഗ്രാഫിക് പ്രോസസിംഗ് യൂണിറ്റ് ക്ലസ്റ്റർ സ്ഥാപിക്കാൻ ലക്ഷ്യമിടുന്നു. ഇതിനായി കേരള സ്റ്റാർട്ടപ്പ് മിഷന് 10 കോടി രൂപ അധികമായി അനുവദിച്ചിട്ടുണ്ട്.

ഏജൻ്റിക് നിർമ്മിത ബുദ്ധിയുടെ സാധ്യതകൾ പ്രോത്സാഹിപ്പിക്കുന്നതിനായി ദേശീയ തലത്തിൽ ഹാക്കത്തോൺ സംഘടിപ്പിക്കാനും മികച്ച ഏജൻ്റുകൾ നിർമ്മിക്കുന്നതിന് 20 ലക്ഷം രൂപ വീതം നൽകാനും സ്റ്റാർട്ടപ്പ് മിഷന് ഒരു കോടി രൂപ അനുവദിച്ചിട്ടുണ്ട്. കൃഷി, സ്പേസ്, ആരോഗ്യം തുടങ്ങിയ വിവിധ മേഖലകളിൽ നിർമ്മിത ബുദ്ധിയുടെ സാധ്യതകൾ പ്രയോജനപ്പെടുത്തുന്നതിനായി തിരുവനന്തപുരം ടെക്നോസിറ്റിയിൽ എമേർജിംഗ് ടെക്നോളജി ഹബ്ബ് സ്ഥാപിക്കും. ഏകദേശം 350 കോടി രൂപയാണ് ഇതിൻ്റെ ചെലവ്.

സംസ്ഥാനം ഒരു കരട് ആർട്ടിഫിഷ്യൽ ഇൻ്റലിജൻസ് നയം രൂപീകരിച്ചു വരികയാണ്. നിർമ്മിത ബുദ്ധി അധിഷ്ഠിത സോഫ്റ്റ്‌വെയർ നിർമ്മാണം, വിവരസഞ്ചയ നിർമ്മാണം, ഇന്നൊവേഷൻ സെൻ്ററുകൾ, നൈപുണ്യ വികസനം, സ്റ്റാർട്ടപ്പുകൾക്കുള്ള പിന്തുണ എന്നിവ ഈ നയത്തിൻ്റെ ഭാഗമാക്കും. സേവനങ്ങളുടെ ഉൽപ്പാദനക്ഷമത വർദ്ധിപ്പിക്കുന്നതിന് നിർമ്മിത ബുദ്ധി ഉപയോഗിക്കുമ്പോൾ ഉണ്ടാകുന്ന തൊഴിൽ നഷ്ടം പുതിയ മേഖലകളിൽ പുനർവിന്യസിക്കാൻ ശ്രമിക്കും.

നിർമ്മിത ബുദ്ധിയുടെ സാധ്യതകൾ കണക്കിലെടുത്ത് പുതിയ തൊഴിലവസരങ്ങൾക്കായി വിവിധ പോസ്റ്റ് ഗ്രാഡ്വേറ്റ് പ്രോഗ്രാമുകൾക്ക് പുറമെ കമ്മ്യൂണിറ്റി എഡ്യൂക്കേഷൻ പരിപാടികൾ ആരംഭിച്ചിട്ടുണ്ട്. യൂണിവേഴ്സിറ്റിയിലെയും മറ്റ് വിദ്യാഭ്യാസ സ്ഥാപനങ്ങളിലെയും അധ്യാപകർക്കായി ജനറേറ്റീവ് ആർട്ടിഫിഷ്യൽ ഇൻ്റലിജൻസിൽ വർക്ക്‌ഷോപ്പുകൾ നടത്തി വരുന്നു. ഗവേഷണങ്ങളുടെ ഫലമായുണ്ടാകുന്ന പ്രോട്ടോടൈപ്പുകൾ വാണിജ്യപരമായി വികസിപ്പിക്കാൻ ഡിജിറ്റൽ സയൻസ് പാർക്ക് ആരംഭിച്ചു. 

യൂറോപ്യൻ യൂണിയൻ്റെ നിർമ്മിത ബുദ്ധി നയത്തിൻ്റെ ചുവടുപിടിച്ച് ഉത്തരവാദിത്ത നിർമ്മിത ബുദ്ധി നയം രൂപീകരിക്കുന്നതിനുള്ള പ്രാഥമിക പ്രവർത്തനങ്ങൾ ഡിജിറ്റൽ യൂണിവേഴ്സിറ്റി ആരംഭിച്ചിട്ടുണ്ട്. കാലിഫോർണിയ ആസ്ഥാനമായ എൻവിഡിയ കമ്പനിയുടെ സഹായത്തോടെ എസ്‌എൽ‌എം ഗവേഷണങ്ങൾ നടത്തി വരുന്നു.

സംസ്ഥാന സർക്കാർ നിർമ്മിത ബുദ്ധി സാങ്കേതിക വിദ്യയുടെ വളർച്ചയിലൂടെ സമൂഹത്തിൽ ഉണ്ടാകുന്ന മാറ്റങ്ങളെയും വെല്ലുവിളികളെയും സമഗ്രമായി അപഗ്രഥിച്ചുകൊണ്ട് മുന്നോട്ട് പോകുകയാണെന്നും മുഖ്യമന്ത്രി കൂട്ടിച്ചേർത്തു. മഞ്ഞളാംകുഴി അലിയുടെ ശ്രദ്ധക്ഷണിക്കലിന് മറുപടി പറയുകയായിരുന്നു മുഖ്യമന്ത്രി.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക.

Kerala government announces new AI policies and projects to boost innovation and job creation, with a focus on startups, emerging technologies, and education.

#ArtificialIntelligence #KeralaGovernment #AIinKerala #Startups #TechnologyHub #Innovation