KC Venugopal | യുവവോടർമാരുടെ മനം കവർന്ന് കെ സി വേണുഗോപാൽ; യുവത്വത്തിന്റെ ഹൃദയത്തുടിപ്പ് അറിഞ്ഞ് കലാലയങ്ങളിലൂടെ സന്ദർശനം

ആലപ്പുഴ: (KVARTHA) വിദ്യാർഥികളായ യുവവോടർമാരുടെ മനം കവർന്ന് ആലപ്പുഴയിലെ യുഡിഎഫ് സ്ഥാനാർഥി കെ സി വേണുഗോപാലിന്റെ തിരഞ്ഞെടുപ്പ് പ്രചാരണം. യുവത്വത്തിന്റെ ഹൃദയ തുടിപ്പറിയാൻ മണ്ഡലത്തിലെ വിവിധ കോളജുകളിലാണ് അദ്ദേഹം സന്ദർശനം നടത്തിയത്. കായംകുളം വനിതാ പോളിടെക്‌നിക് കോളജിൽ നിന്നാണ് പ്രയാണം ആരംഭിച്ചത്. കായംകുളം എംഎസ്എം കോളജിലും എത്തി കെ സി വോട് അഭ്യർഥിച്ചു. ആവേശകരമായ വരവേൽപാണ് ഓരോ കോളജുകളിലും ലഭിച്ചത്. പൂക്കൾ വാരി വിതറിയും ഹാരാർപ്പണം നടത്തിയും ചെണ്ടമേളങ്ങളുടെ അകമ്പടിയോടെയുമാണ് വരവേറ്റത്.
   ഹരിപ്പാട് ടികെഎംഎം കോളജിൽ ചെണ്ടമേളത്തിന്റെ അകമ്പടിയോടെയാണ് കെ സിയെ സ്വീകരിച്ചത്. കോളജിലെ കെ എസ് യു വിദ്യാർഥികളുടെ മുഖപത്രം കലാവേദി അദ്ദേഹം പ്രകാശനം ചെയ്തു. കോളേജിൽ നിന്നും വിരമിക്കുന്ന പ്രിൻസിപൽ ഡോ. പി പി ശർമിളയ്ക്ക് കെ എസ് യു യൂണിറ്റ് കമിറ്റിയുടെ നേതൃത്വത്തിൽ ഏർപ്പെടുത്തിയ സ്നേഹോപഹാരവും അദ്ദേഹം കൈമാറി. തുടർന്ന് അമ്പലപ്പുഴ ഗവ. കോളജിലും എത്തി വിദ്യാർഥികളോട് വോട് അഭ്യർഥിച്ചു. പടക്കം പൊട്ടിച്ചാണ് കെ എസ് യു പ്രവർത്തകർ അദ്ദേഹത്തെ സ്വീകരിച്ചത്.

ആലപ്പുഴ എസ് ഡി കോളജിലും പടക്കം പൊട്ടിച്ചാണ് പ്രവർത്തകർ കെ സി യെ വരവേറ്റത്. വിദ്യാർഥികളോട് വോട് അഭ്യർഥിച്ച അദ്ദേഹം കോളജിലെ കെ എസ് യു യൂണിറ്റ് കമിറ്റി ഏർപ്പെടുത്തിയ ഹോളി ആഘോഷത്തിലും പങ്കെടുത്തു. പ്രവർത്തകർ വർണങ്ങളിൽ കെ സി യെ പൊതിഞ്ഞത് വേറിട്ട കാഴ്ചയായി. സെന്റ് ജോസഫ് വിമൻസ് കോളേജിലും എത്തി കെ സി വോട് തേടി.