'അടുക്കളയില്‍ നിന്ന് പ്രതിഷേധാഗ്‌നി'; കപ്പ കുഴച്ച് കെ സി വേണുഗോപാല്‍, വീട്ടമ്മമാർക്കൊപ്പം വേറിട്ട പ്രതിഷേധം

ആലപ്പുഴ: (KVARTHA) കുടുംബ ബജറ്റ് താളം തെറ്റിക്കുന്ന രൂക്ഷമായ വിലക്കയറ്റത്തിനെതിരെ വേറിട്ട പ്രതിഷേധവുമായി എഐസിസി ജനറൽ സെക്രട്ടറി കെ.സി. വേണുഗോപാൽ എംപി. ആലപ്പുഴ നയനാവെളിയിലെ മത്സ്യത്തൊഴിലാളി കുടുംബാംഗമായ റീഫ മേരിയുടെ വീട്ടിലെത്തി, അടുക്കളയിൽ വീട്ടമ്മമാർക്കൊപ്പം കപ്പ കുഴച്ച് കഴിച്ചാണ് അദ്ദേഹം പ്രതിഷേധിച്ചത്.

വീട്ടമ്മമാരുടെ കണ്ണീർക്കണക്ക്

‘നൂറു രൂപയുമായി അരിയും മുളകും വാങ്ങാൻ ചെന്ന താൻ 20 രൂപ കടം പറഞ്ഞ് മടങ്ങേണ്ട ദുരവസ്ഥയാണ്,’ റീഫ മേരി കെ.സി. വേണുഗോപാലിനോട് പറഞ്ഞു. പത്തുവർഷം മുൻപ് ജോലി കുറവാണെങ്കിലും തട്ടിയും മുട്ടിയും ജീവിക്കാമായിരുന്നു. എന്നാൽ ഇന്ന് ചുരുങ്ങിയത് 10,000 രൂപയെങ്കിലും ഒരുമാസത്തെ അടുക്കള ചെലവിന് മാത്രം വേണം. 

കുട്ടികളുടെ പഠനം, ചികിത്സാ ചെലവ് എന്നിവ കൂടിയാകുമ്പോൾ മിച്ചം പിടിക്കാൻ കഴിയുന്നില്ലെന്നും ചെറിയ പനി വന്നാൽ പോലും കടം വാങ്ങേണ്ട അവസ്ഥയാണെന്നും വീട്ടമ്മമാർ സങ്കടം പങ്കുവെച്ചു. പാചകവാതക സബ്സിഡി വെട്ടിക്കുറച്ചതും മണ്ണെണ്ണ നിർത്തലാക്കിയതും വെളിച്ചെണ്ണയുടെ വിലവർധനയും അവർ ചൂണ്ടിക്കാട്ടി.

കിച്ചൺ ബജറ്റ് വൈറ്റ് പേപ്പർ

വിലവിവരങ്ങളും വിലക്കയറ്റത്തിന്റെ കാരണങ്ങളും വിശദീകരിക്കുന്ന 'കേരള കിച്ചൺ ബജറ്റ് വൈറ്റ് പേപ്പർ' കെ.സി. വേണുഗോപാൽ അവതരിപ്പിച്ചു. 2016 മുതൽ അരി, പാചക എണ്ണ, പാൽ, പച്ചക്കറികൾ, പയർവർഗ്ഗങ്ങൾ, മസാലകൾ എന്നിവയ്ക്കുണ്ടായ വിലവർധനവ് ഇതിൽ രേഖപ്പെടുത്തിയിട്ടുണ്ട്. ദേശീയ ശരാശരിയേക്കാൾ കൂടിയ വിലക്കയറ്റമാണ് കേരളത്തിൽ ഇപ്പോഴുള്ളതെന്ന് അദ്ദേഹം ചൂണ്ടിക്കാട്ടി.

സർക്കാരിനെതിരെ വിമർശനം

ഇത് രാഷ്ട്രീയ സമരമല്ല, മറിച്ച് സാധാരണക്കാരുടെ കുടുംബങ്ങൾ അനുഭവിക്കുന്ന യാഥാർത്ഥ്യമാണെന്ന് കെ.സി. വേണുഗോപാൽ പറഞ്ഞു. ‘എല്ലാം ശരിയാകുമെന്ന് പറഞ്ഞ് അധികാരത്തിൽ വന്നവരുടെ പത്തുവർഷ ഭരണത്തിനു ശേഷം, ഇന്ന് കണക്കുകൾ കൂട്ടിയാൽ ഒന്നും ശരിയായി വരുന്നില്ല. തട്ടിക്കൂട്ട് ബജറ്റ് അവതരിപ്പിച്ച് ആർക്കും മനസ്സിലാകാത്ത കണക്കുകൾ പറഞ്ഞ് ഭരണപരാജയത്തെ മറയ്ക്കാൻ ശ്രമിക്കുകയാണ് സർക്കാർ,’ അദ്ദേഹം കുറ്റപ്പെടുത്തി.

അടുക്കള പ്രവർത്തനം അവതാളത്തിലാകുമ്പോൾ ഭരണസംവിധാനം പരാജയപ്പെട്ടുവെന്നാണ് അർത്ഥമെന്നും, അടുത്ത യുഡിഎഫ് സർക്കാർ അധികാരത്തിലെത്തുമ്പോൾ വീട്ടമ്മമാരുടെ പ്രശ്നങ്ങൾക്ക് പരിഹാരം കാണുന്നതിന് മുൻഗണന നൽകുമെന്നും അദ്ദേഹം ഉറപ്പുനൽകി.

പുതിയ വാർത്തകൾ സമയബന്ധിതമായി അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക. ഈ വാർത്ത ഷെയർ ചെയ്യൂ. അഭിപ്രായം കമന്റായി രേഖപ്പെടുത്താനും മറക്കരുത്

Article Summary: KC Venugopal MP joins housewives in Alappuzha to protest against rising food prices by cooking and eating tapioca.

#KCVenugopal #PriceHike #Alappuzha #KitchenBudget #KeralaPolitics #UDF #Protest #KVARTHA