കാസർകോട് ഫാക്ടറിയിൽ വൻ ദുരന്തം: ബോയിലർ പൊട്ടിത്തെറിച്ച് 19 വയസ്സുകാരന് ദാരുണാന്ത്യം; പ്രകമ്പനം 3 കിലോമീറ്റർ ചുറ്റളവിൽ

കാസർകോട്: (KVARTHA) കുമ്പളയ്ക്ക് സമീപമുള്ള അനന്തപുരം ഇൻഡസ്ട്രിയൽ എസ്റ്റേറ്റിലെ ഡെക്കോർ പാനൽ ഇൻഡസ്ട്രീസ് ഫാക്ടറിയിൽ തിങ്കളാഴ്ച വൈകുന്നേരം ഉണ്ടായ ബോയിലർ സ്ഫോടനം നാടിനെ നടുക്കി. ഉഗ്രമായ സ്ഫോടനത്തിൽ അസം സ്വദേശിയായ 19 വയസ്സുകാരനായ തൊഴിലാളി മരിച്ചു. മൂന്ന് കിലോമീറ്റർ ചുറ്റളവിലെ ജനങ്ങളെ പരിഭ്രാന്തരാക്കി ഈ സ്ഫോടനത്തിൻ്റെ പ്രകമ്പനം.

ദുരന്തത്തിൽ ജീവൻ പൊലിഞ്ഞത് അസം സ്വദേശിക്ക്

അപകടത്തിൽ മരണപ്പെട്ട തൊഴിലാളിയെ തിരിച്ചറിഞ്ഞു. അസം സംസ്ഥാനത്തെ ഉദൽഗുരി ജില്ലയിലെ ബിസ്‌കുതി ഗാവോൺ സ്വദേശിയായ നജിറുൽ അലി (Najiurul Ali) ആണ് മരിച്ചത്. ഹുസ്സൈൻ അലി - സാറ ദമ്പതികളുടെ മകനാണ്..

തിങ്കളാഴ്ച രാത്രി 7.10 ഓടെയാണ് സ്ഫോടനം നടന്നത്. വൈകുന്നേരം 6.45-ന് പുതിയ ഷിഫ്റ്റ് ആരംഭിച്ചതിന് തൊട്ടുപിന്നാലെയാണ് ദുരന്തം സംഭവിച്ചത്. അപകടസമയത്ത് ഏകദേശം 20 തൊഴിലാളികൾ ഡ്യൂട്ടിയിൽ ഉണ്ടായിരുന്നുവെന്ന് ജില്ലാ വ്യവസായ കേന്ദ്രം മാനേജർ കെ. സജിത്ത് അറിയിച്ചു.

പരിക്കേറ്റ 10 പേരിൽ മൂന്നുപേരുടെ നില ഗുരുതരം

സ്ഫോടനത്തിൽ പരിക്കേറ്റ 10 തൊഴിലാളികളിൽ മൂന്നുപേരുടെ നില ഗുരുതരമായി തുടരുകയാണെന്ന് ജില്ലാ കളക്ടർ കെ. ഇംബശേഖരൻ സ്ഥിരീകരിച്ചു.

പരിക്കേറ്റ തൊഴിലാളികളെ ഉടൻതന്നെ സമീപത്തെ ആശുപത്രികളിലേക്ക് മാറ്റി. പരിക്കേറ്റ ഏഴുപേരെ ആദ്യം ഉപ്പളയിലെ ഡോക്ടേഴ്സ് ആശുപത്രിയിൽ എത്തിച്ചു. ഇവിടെ വെച്ചാണ് നജിറുൽ അലി മരണപ്പെട്ടത്. ഡോക്ടേഴ്സ് ആശുപത്രിയിലെ അധികൃതരുടെ അറിയിപ്പ് പ്രകാരം, ബാക്കിയുള്ള ആറുപേരെ കൂടുതൽ വിദഗ്ധ ചികിത്സയ്ക്കായി മംഗളൂരുവിലെ യെനപോയ ആശുപത്രിയിലേക്ക് മാറ്റിയിട്ടുണ്ട്. നിലവിൽ, പരിക്കേറ്റവർക്ക് ചികിത്സ ഉറപ്പാക്കിയിട്ടുണ്ടെന്നും കളക്ടർ അറിയിച്ചു.

പ്രകമ്പനം 3 കിലോമീറ്റർ ദൂരത്തേക്ക്; വീടുകൾക്ക് നാശനഷ്ടം

പുതിഗെ ഗ്രാമപഞ്ചായത്തിലെ കണ്ണൂർ വാർഡിലാണ് ഇൻഡസ്ട്രിയൽ എസ്റ്റേറ്റ് സ്ഥിതി ചെയ്യുന്നത്. പ്രശസ്തമായ അനന്തപുരം തടാക ക്ഷേത്രത്തിൽ നിന്ന് വെറും 500 മീറ്റർ അകലെയാണ് അപകടം നടന്ന ഫാക്ടറി.

‘ശബ്ദം കേട്ട് ഞങ്ങൾ ഭയന്ന് വീടുകളിൽ നിന്ന് പുറത്തേക്ക് ഓടി. 300 മീറ്റർ പരിധിക്കുള്ളിലെ വീടുകളുടെ ജനലുകളും വാതിലുകളും തകർന്നു. ഏകദേശം 3 കിലോമീറ്റർ ദൂരത്തേക്കു വരെ ഉഗ്രശബ്ദം കേൾക്കുകയും പ്രകമ്പനം അനുഭവപ്പെടുകയും ചെയ്തു,’ വാർഡ് മെമ്പർ കെ. ജനാർദന പൂജാരി പറഞ്ഞു. ഫാക്ടറിയുടെ ഭാഗങ്ങൾക്കും സ്ഫോടനത്തിൽ കാര്യമായ കേടുപാടുകൾ സംഭവിച്ചു.

അതേസമയം ചൗക്കി കമ്പാർ പ്രദേശങ്ങളിലും ശക്തമായ പ്രകമ്പനം ഉണ്ടായതായും ഭൂമികുലുക്കമാണോ സംഭവിച്ചതെന്ന് സംശയിച്ചിരുന്നതയും പൊതുപ്രവർത്തകൻ ഹക്കിം കമ്പാർ കെവാർത്തയോട് പറഞ്ഞു.

ഫാക്ടറിയെക്കുറിച്ച് അന്വേഷണം കെംറെക്കിന്

എറണാകുളം പെരുമ്പാവൂർ സ്വദേശി പോളിയുടെ ഉടമസ്ഥതയിലുള്ളതാണ് 'ഡെക്കോർ പാനൽ ഇൻഡസ്ട്രീസ്'. ഫാക്ടറിയുടെ ഉടമ വിവരമറിഞ്ഞ് കാസർകോട്ടേക്ക് തിരിച്ചിട്ടുണ്ട്. മാനേജർ ജിൻ്റോയും ഓടിയെത്തിയ നാട്ടുകാരും പൊലീസും ഫയർഫോർസും എല്ലാം രക്ഷാപ്രവർത്തനത്തിന് നേതൃത്വം നൽകി.  ഇവിടെ ജോലി ചെയ്യുന്ന 300-ഓളം തൊഴിലാളികളിൽ കൂടുതലും ഇതര സംസ്ഥാനങ്ങളിൽ നിന്നുള്ളവരാണ്. പാനൽ നിർമ്മാണത്തിന് ആവശ്യമായ ഉയർന്ന മർദ്ദത്തിലുള്ള നീരാവി ഉത്പാദിപ്പിക്കാനാണ് ഇവിടെ ബോയിലറുകൾ ഉപയോഗിച്ചിരുന്നത്.

സംഭവസ്ഥലത്ത് പോലീസ് സംഘം എത്തി സുരക്ഷാ മുൻകരുതലുകൾ സ്വീകരിച്ചിട്ടുണ്ട്. സ്ഫോടനത്തിൻ്റെ യഥാർത്ഥ കാരണം കണ്ടെത്താനും സുരക്ഷാ മാനദണ്ഡങ്ങൾ പാലിക്കുന്നതിൽ വീഴ്ച സംഭവിച്ചിട്ടുണ്ടോ എന്നും ബോയിലറിൻ്റെ ഗുണനിലവാരം ഉൾപ്പെടെയുള്ള കാര്യങ്ങൾ പരിശോധിക്കാൻ ഫാക്ടറീസ് ആൻഡ് ബോയിലർസ് വകുപ്പിൻ്റെ എറണാകുളത്തെ കെമിക്കൽ എമർജൻസി റെസ്പോൺസ് സെന്ററിനെ (CHEMREC) ചുമതലപ്പെടുത്തി. വിശദമായ അന്വേഷണ റിപ്പോർട്ട് ലഭിച്ച ശേഷം തുടർനടപടികൾ സ്വീകരിക്കുമെന്ന് ജില്ലാ കളക്ടർ അറിയിച്ചു.

കാസർകോട്ടെ ഫാക്ടറി ദുരന്തത്തിൻ്റെ വിശദാംശങ്ങൾ കൂടുതൽ പേരിലേക്ക് എത്തിക്കുക.

Article Summary: 19-year-old killed in Kasaragod boiler explosion, 10 injured; Collector orders CHEMREC probe.

#KasaragodAccident #BoilerExplosion #FactoryTragedy #NajiurulAli #IndustrialSafety #CHEMRECProbe