Rally | കണ്ണൂരില്‍ സമാന്തര വിദ്യാഭ്യാസ സംരക്ഷണറാലിയും സംഗമവും നടത്തി: ഭൂരിപക്ഷം വരുന്ന കുട്ടികളുടെ വിദ്യാഭ്യാസ പ്രശ്നം പരിഹരിക്കുമെന്ന് രാമചന്ദ്രന്‍ കടന്നപ്പള്ളി എം എല്‍ എ

കണ്ണൂര്‍: (KVARTHA) സാധാരണക്കാരായ ഭൂരിപക്ഷം വരുന്ന കുട്ടികളുടെ വിദ്യാഭ്യാസത്തില്‍ ഉണ്ടായിട്ടുള്ള സാങ്കേതിക തടസങ്ങള്‍ ഒഴിവാക്കി സമാന്തര വിദ്യാഭ്യാസത്തെ സംരക്ഷിക്കുമെന്ന് രാമചന്ദ്രന്‍ കടന്നപ്പള്ളി എംഎല്‍എ പറഞ്ഞു. കേരളത്തിലെ ലക്ഷോപലക്ഷം സാധാരണക്കാരുടെ മക്കള്‍ക്ക് വിദ്യാഭ്യാസവും അഭ്യസ്തവിദ്യര്‍ക്ക് തൊഴിലും നല്‍കിക്കൊണ്ട് ഏഴ് പതിറ്റാണ്ടായി പ്രവര്‍ത്തിച്ചുവരുന്ന പാരലല്‍ കോളജുകള്‍ സംരക്ഷിക്കണമെന്നാവശ്യപ്പെട്ടുകൊണ്ട് നടത്തിയ സമാന്തര വിദ്യാഭ്യാസ സംരക്ഷണ സംസ്ഥാനതല സംഗമം ഉദ്ഘാടനം ചെയ്യുകയായിരുന്നു അദ്ദേഹം.


ശ്രീനാരായണ ഓപണ്‍ യൂനിവേഴ്സിറ്റിയില്‍ 47(2), 72 വകുപ്പുകള്‍ എടുത്തുമാറ്റിക്കൊണ്ട് കേരളത്തിലെ എല്ലാ യൂനിവേഴ്സിറ്റികളിലും പ്രൈവറ്റ് /വിദൂര വിഭാഗം കോഴ്സുകള്‍ തുടങ്ങാന്‍ സര്‍കാര്‍ അടിയന്തര നടപടി സ്വീകരിക്കണമെന്ന് സംഗമം ആവശ്യപ്പെട്ടു. കേരളത്തിലെ ഏത് യൂനിവേഴ്സിറ്റിയിലും വിദ്യാര്‍ഥികള്‍ക്ക് ഇഷ്ടമുള്ള ഏത് കോഴ്സും പഠിക്കാനുള്ള സാഹചര്യം ഉണ്ടാക്കണമെന്നാണ് പാരലല്‍ കോളജ് അസോസിയേഷന്‍ ആവശ്യപ്പെടുന്നത്.

ഈ മേഖലയെ ആശ്രയിച്ചു കഴിയുന്ന പതിനായിരക്കണക്കിന് അധ്യാപകരെയും, അനധ്യാപകരെയും അവരുടെ ലക്ഷക്കണക്കിന് കുടുംബങ്ങളെയും പട്ടിണിയിലേക്ക് തള്ളിവിടാതിരിക്കാന്‍ സര്‍കാര്‍ ഇടപെടണമെന്നും സംഗമം ആവശ്യപ്പെട്ടു. സംഘാടക സമിതി ചെയര്‍മാന്‍ സി അനില്‍കുമാര്‍ അധ്യക്ഷത വഹിച്ചു. കെവി സുമേഷ് എംഎല്‍എ മുഖ്യപ്രഭാഷണം നടത്തി.