Mohanlal | മാമാനിക്കുന്ന് ശ്രീ മഹാദേവക്ഷേത്രത്തില്‍ മോഹന്‍ലാല്‍ ദര്‍ശനം നടത്തി

കണ്ണൂര്‍: (KVARTHA) പത്മശ്രീ മോഹന്‍ലാല്‍ ഇരിക്കൂര്‍ മാമാനിക്കുന്ന് ശ്രീ മഹാദേവി ക്ഷേത്രത്തില്‍ ദര്‍ശനം നടത്തി. കണ്ണൂരില്‍ വിവിധ പരിപാടികള്‍ക്കായെത്തിയ മോഹന്‍ലാല്‍ ബുധനാഴ്ച (08.05.2024) പുലര്‍ചെ ആറു മണിയോടെയാണ് മാമാനിക്കുന്ന് ഭഗവതി ക്ഷേത്രത്തില്‍ ദര്‍ശനപുണ്യം തേടാനെത്തിയത്. ക്ഷേത്രം എക്‌സി ക്യൂടീവ് ഓഫീസറും ഭാരവാഹികളും ജീവനക്കാരും പ്രദേശവാസികളും ചേര്‍ന്ന് അദ്ദേഹത്തെ സ്വീകരിച്ചു.
ക്ഷേത്രം മേല്‍ശാന്തി ചന്ദ്രന്‍ മൂസ് പ്രത്യേക പൂജയുടെ പ്രസാദം മോഹന്‍ലാലിന് നല്‍കി.

ഐതിഹ്യങ്ങളും ആചാരങ്ങളും ചോദിച്ച് മനസിലാക്കി ക്ഷേത്ര പ്രദക്ഷിണം നടത്തുകയും ദോഷങ്ങളും മാര്‍ഗതടസങ്ങളും അകറ്റുമെന്ന് വിശ്വസിക്കുന്ന 'ഉരിച്ച തേങ്ങ മറികൊത്തല്‍' നടത്തുകയും വിശേഷ വഴിപാടുകള്‍ കഴിക്കുകയും ചെയ്തതിനുശേഷമാണ് മോഹന്‍ലാല്‍ കാറില്‍ മടങ്ങിയത്.

ജില്ലയിലെ ഇരിക്കൂറില്‍ പുഴയുടെ കിഴക്ക് കരയില്‍ ഒരു ചെറിയ കുന്നിന് മുകളില്‍ സ്ഥിതി ചെയ്യുന്ന ശാക്തേയ ക്ഷേത്രമാണ് 'മാമാന് മഹാദേവി ക്ഷേത്രം' അഥവാ 'മാമാനിക്കുന്ന് ഭഗവതി ക്ഷേത്രം'. പരാശക്തിയാണ് ഇവിടെ മുഖ്യപ്രതിഷ്ഠ. കല്യാട് താഴത്തുവീട് വകയായിരുന്നു ഈ ക്ഷേത്രം. ഇപ്പോള്‍ മലബാര്‍ ദേവസ്വം ബോര്‍ഡിന് കീഴിലാണ് പ്രവര്‍ത്തിക്കുന്നത്.