കണ്ണൂരിൽ പേമാരിയും ചുഴലിക്കാറ്റും; താഴ്ന്ന പ്രദേശങ്ങൾ വെള്ളത്തിനടിയിൽ

കണ്ണൂർ: (KVARTHA) സംസ്ഥാനത്ത് മഴ ശക്തമാകുന്ന സാഹചര്യത്തിൽ മഴക്കെടുതികൾ വർധിക്കുകയാണ്. വടക്കൻ ജില്ലകളിൽ മഴ ശക്തമായി തുടരുന്നു. തിങ്കളാഴ്ച രാത്രി മുതൽ കണ്ണൂർ ജില്ലയുടെ വിവിധ ഭാഗങ്ങളിൽ ശക്തമായ മഴ പെയ്യുകയാണ്. കനത്ത മഴയെത്തുടർന്ന് താഴ്ന്ന പ്രദേശങ്ങളിൽ വെള്ളക്കെട്ട് രൂപപ്പെട്ടു. 

താഴെ ചൊവ്വയിൽ താഴ്ന്ന പ്രദേശങ്ങളിലെ വീടുകളിൽ വെള്ളം കയറി. പിലാത്തറയിൽ ദേശീയപാതയുടെ സർവീസ് റോഡിലും പാപ്പിനിശ്ശേരിയിലും റോഡുകളിൽ വെള്ളക്കെട്ട് രൂപപ്പെട്ടിട്ടുണ്ട്.

കനത്ത മഴ തുടരുന്നതിനാൽ തലശ്ശേരി റെയിൽവേ സ്റ്റേഷൻ റോഡിലും സമീപത്തെ കടകളിലും വെള്ളക്കെട്ട് രൂപപ്പെട്ടു. റെയിൽവേ സ്റ്റേഷന്റെ പ്രധാന കവാടത്തിലേക്കുള്ള റോഡിലാണ് വെള്ളം നിറഞ്ഞിരിക്കുന്നത്. തളിപ്പറമ്പ് കുപ്പത്ത് ദേശീയപാത നിർമ്മാണ പ്രവർത്തനങ്ങൾ നടക്കുന്ന സ്ഥലത്ത് വീടുകളിലേക്ക് വെള്ളം കയറി. വീടുകളിൽ ചെളി കയറിയതായും റിപ്പോർട്ടുകളുണ്ട്.

മട്ടന്നൂരിലെ ഉരുവച്ചാലിൽ ഇടിമിന്നലിൽ ഒരു വീടിന് വലിയ നാശനഷ്ടം സംഭവിച്ചു. പാവോട്ടുപാറയിലെ കൃഷ്ണമുരളിയുടെ വീടിനാണ് ഇടിമിന്നലേറ്റത്. വീടിന് വിള്ളലുണ്ടാവുകയും വയറിംഗും ഇലക്ട്രോണിക് ഉപകരണങ്ങളും കത്തി നശിക്കുകയും ചെയ്തു. 

കോഴിക്കോട് ഒരു വീടിന് മുകളിലേക്ക് മരം വീണ് നാശനഷ്ടമുണ്ടായി. ആളപായം റിപ്പോർട്ട് ചെയ്തിട്ടില്ല. കുറുവയിൽ മൂന്ന് വീടുകൾ മഴക്കെടുതിയിൽ തകർന്നു. മതിലിടിഞ്ഞും മരങ്ങൾ വീണുമാണ് വീടുകൾക്ക് നാശനഷ്ടമുണ്ടായത്.

കണ്ണൂർ - കാസർകോട് ദേശീയപാതയിൽ പെരിയ കേന്ദ്ര സർവകലാശാലയ്ക്ക് സമീപം ഒരു ബസ് ചെളിയിൽ പുതഞ്ഞു. കണ്ണൂരിൽ നിന്ന് മംഗലാപുരത്തേക്ക് പോവുകയായിരുന്ന മെഹബൂബ് ബസാണ് അപകടത്തിൽപ്പെട്ടത്. 

ഓവുചാലിന് കുഴിയെടുത്ത വീതി കുറഞ്ഞ ഭാഗത്താണ് അപകടം സംഭവിച്ചത്. ചൊവ്വാഴ്ച രാവിലെ 8.30 ഓടെയായിരുന്നു സംഭവം. ഇതിനെത്തുടർന്ന് കാസർകോട് ഭാഗത്തേക്കുള്ള ഗതാഗതം തടസ്സപ്പെട്ടു.

ഈ വാർത്തയെക്കുറിച്ച് നിങ്ങളുടെ അഭിപ്രായങ്ങൾ പങ്കുവെക്കുക. ഷെയർ ചെയ്യുക. 

Article Summary: Heavy rains and strong winds in Kannur caused waterlogging in low-lying areas, damaging houses and roads. A bus got stuck in mud, disrupting traffic. Lightning struck a house in Mattannur, and trees fell on houses in Kozhikode and Kuruva. No casualties were reported.
 

#KannurRains, #KeralaFloods, #WeatherAlert, #RainDamage, #NorthKerala, #TrafficDisruption