കണ്ണൂർ ദസറ ആഘോഷങ്ങൾക്ക് ചൊവ്വാഴ്ച തുടക്കമാകും; ഷോപ്പിങ് ഫെസ്റ്റിവലിന് ബെലേനോ കാർ ബംപർ സമ്മാനം

കണ്ണൂർ: (KVARTHA) കാഴ്ചകളുടെയും വർണ്ണങ്ങളുടെയും ദീപാലങ്കാരങ്ങളുടെയും വിരുന്നൊരുക്കി കണ്ണൂർ കോർപ്പറേഷന്റെ ആഭിമുഖ്യത്തിൽ ദസറ ആഘോഷങ്ങൾക്ക് ചൊവ്വാഴ്ച തുടക്കമാകും. സെപ്റ്റംബർ 23 മുതൽ ഒക്ടോബർ ഒന്നുവരെ കണ്ണൂർ കലക്ടറേറ്റ് മൈതാനിയിലാണ് ആഘോഷങ്ങൾ നടക്കുക. 'പങ്കുവെയ്ക്കാം സ്നേഹം പങ്കുചേരാം ദസറ' എന്ന മുദ്രാവാക്യത്തിലാണ് ഈ വർഷത്തെ ദസറ സംഘടിപ്പിച്ചിരിക്കുന്നത്. ദസറയോടൊപ്പം ഇത്തവണ ഷോപ്പിങ് ഫെസ്റ്റിവലും ഒരുക്കിയിട്ടുണ്ട്.

ഈ ഉത്സവകാലത്ത് കോർപ്പറേഷൻ പരിധിയിലെ വ്യാപാര സ്ഥാപനങ്ങളിൽനിന്ന് സാധനങ്ങൾ വാങ്ങുമ്പോൾ ലഭിക്കുന്ന സൗജന്യ കൂപ്പണുകളിലൂടെയാണ് സമ്മാനങ്ങൾ നൽകുന്നത്. ഈ പദ്ധതി ഓഗസ്റ്റ് 25ന് തന്നെ ആരംഭിച്ചിരുന്നു. ബംപർ സമ്മാനമായി ബെലേനോ കാറാണ് വിജയിയെ കാത്തിരിക്കുന്നത്. അതോടൊപ്പം അഞ്ച് പേർക്ക് ജൂപ്പിറ്റർ സ്കൂട്ടറും, 50 പേർക്ക് സ്മാർട്ട് ഫോണുകളും ലഭിക്കും. പ്രോത്സാഹന സമ്മാനമായി 500 പേർക്ക് 1000 രൂപയുടെ ഗിഫ്റ്റ് വൗച്ചറുകളും നൽകും. ഒക്ടോബർ 10ന് ഷോപ്പിങ് ഫെസ്റ്റിവൽ അവസാനിക്കുമ്പോൾ, സമ്മാന നറുക്കെടുപ്പ് ഒക്ടോബർ 15ന് നടക്കും.

കലാപരിപാടികളാണ് ദസറ ആഘോഷങ്ങളുടെ മറ്റൊരു പ്രധാന ആകർഷണം. പ്രമുഖ കലാകാരന്മാർ അണിനിരക്കുന്ന വിവിധ പരിപാടികൾ ഇതിന്റെ ഭാഗമായി അരങ്ങേറും. ആൽമരം മ്യൂസിക് ബാന്റ്, ചെമ്മീൻ ബാന്റ് വിത്ത് സീനിയേഴ്സ്, രഞ്ജു ചാലക്കുടി അവതരിപ്പിക്കുന്ന ഫോക് മെഗാഷോ, ഫെജോ ആന്റ് എഡിജെ നയിക്കുന്ന ലൈവ് റാപ്പ് ഷോ, കൊല്ലം ഷാഫിയും രഹ്നയും നയിക്കുന്ന ഇശൽ രാവ്, ബിൻസിയും ഇമാമും അവതരിപ്പിക്കുന്ന സൂഫി സംഗീത സന്ധ്യ, ഗാനമേള, നടി ആശാ ശരത്ത് നയിക്കുന്ന 'ആശാ നടനം', അവിയൽ ബാൻഡ് മെഗാ ഷോ എന്നിവ ആഘോഷങ്ങൾക്ക് നിറം പകരും.

ചൊവ്വാഴ്ച നടക്കുന്ന കൊടിയേറ്റത്തോടെയാണ് ദസറ ആഘോഷങ്ങൾക്ക് ഔദ്യോഗികമായി തുടക്കമാകുക. തുടർന്ന് അംഗൻവാടി ജീവനക്കാർ അവതരിപ്പിക്കുന്ന മെഗാ ഒപ്പനയും ഉണ്ടാകും. കെ. സുധാകരൻ എം.പി. ദസറ ഉദ്ഘാടനം ചെയ്യും. നടൻ ഉണ്ണിരാജ് ചെറുവത്തൂർ ചടങ്ങിൽ പങ്കെടുക്കും. ദസറയോടനുബന്ധിച്ച് കോർപ്പറേഷൻ പരിധിയിലെ വ്യാപാര സ്ഥാപനങ്ങളും പൊതു സ്ഥലങ്ങളും ദീപാലങ്കാരങ്ങളാൽ അലങ്കരിക്കും. മികച്ച ദീപാലങ്കാരങ്ങൾക്ക് സമ്മാനങ്ങൾ നൽകുമെന്ന് മേയർ മുസ് ലിഹ് മഠത്തിൽ, ഡെപ്യൂട്ടി മേയർ അഡ്വ. പി. ഇന്ദിര, സ്റ്റാൻഡിംഗ് കമ്മിറ്റി ചെയർമാൻമാരായ പി. ഷമീമ ടീച്ചർ, എം.പി രാജേഷ്, വി.കെ ശ്രീലത, സിയാദ് തങ്ങൾ, ഷാഹിന മൊയ്തീൻ, സുരേഷ് ബാബു എളയാവൂർ, കൗൺസിലർമാരായ ടി. രവീന്ദ്രൻ, എൻ. ഉഷ, ദസറ അസിസ്റ്റന്റ് കോ ഓർഡിനേറ്റർ കെ.സി രാജൻ മാസ്റ്റർ, മീഡിയ കമ്മിറ്റി ചെയർമാൻ സി. സുനിൽ കുമാർ എന്നിവർ വാർത്താസമ്മേളനത്തിൽ അറിയിച്ചു.

ഈ വർഷത്തെ ദസറയെക്കുറിച്ച് നിങ്ങളുടെ അഭിപ്രായം എന്താണ്? കമന്റ് ചെയ്യൂ.

Article Summary: Kannur Dasara festivities with a shopping festival starting on Tuesday.

#Kannur #Dasara #ShoppingFestival #Kerala #BalenoCar #Festival