കണ്ണൂർ ദസറ വർണാഭമായി; ആഘോഷങ്ങൾ ഉദ്ഘാടനം ചെയ്ത് കെ വി സുമേഷ് എംഎൽഎ

കണ്ണൂർ: (KVARTHA) നിറങ്ങളും സംഗീതവും സമന്വയിപ്പിച്ച് കണ്ണൂർ ദസറയുടെ രണ്ടാം ദിനം വർണാഭമായി. കെ.വി. സുമേഷ് എം.എൽ.എ. ആഘോഷങ്ങൾ ഉദ്ഘാടനം ചെയ്തു. വിയോജിപ്പുകളെ ഒഴിവാക്കി ഒന്നാകാനുള്ള സന്ദേശമാണ് എല്ലാ ആഘോഷങ്ങളും നൽകുന്നതെന്ന് അദ്ദേഹം ഉദ്ഘാടന പ്രസംഗത്തിൽ പറഞ്ഞു. എല്ലാ മതങ്ങൾക്കും അവരുടേതായ ആചാരങ്ങളും ആഘോഷങ്ങളുമുണ്ട്. അത് നിലനിൽക്കുമ്പോൾ മാത്രമാണ് ഇന്ത്യ ഒരു ജനാധിപത്യ മതേതര രാജ്യമായി തുടരുകയുള്ളൂവെന്നും അദ്ദേഹം കൂട്ടിച്ചേർത്തു.

പരസ്പര സ്നേഹത്തോടെയും ഐക്യത്തോടെയും ആഘോഷങ്ങളെ ആസ്വദിക്കാൻ കഴിയുമെന്നതിൻ്റെ ഉദാഹരണമാണ് കണ്ണൂർ ദസറ. മാധ്യമപ്രവർത്തക മാതു സജി മുഖ്യാതിഥിയായി പങ്കെടുത്ത ചടങ്ങിൽ വികസനകാര്യ സ്റ്റാൻഡിംഗ് കമ്മിറ്റി ചെയർമാൻ പി.കെ. രാഗേഷ് അധ്യക്ഷത വഹിച്ചു. വിവിധ രാഷ്‌ട്രീയ പാർട്ടി പ്രതിനിധികളായ എം.പി. വേലായുധൻ (ഐ.എൻ.സി), ബി.കെ. അഹമ്മദ് (ഐ.യു.എം.എൽ), സി.എ. അജീർ (സി.എം.പി) എന്നിവരും മറ്റ് സാമൂഹിക സാംസ്കാരിക നേതാക്കളും ചടങ്ങിൽ പങ്കെടുത്തു.

വിവിധ കലാപരിപാടികൾ

ദസറയുടെ രണ്ടാം ദിനം വിവിധതരം കലാപരിപാടികൾ അരങ്ങേറി. സന്ധ്യ നമ്പ്യാർ&ടീം അവതരിപ്പിച്ച ക്ലാസിക്കൽ & സെമി ക്ലാസിക്കൽ ഫ്യൂഷൻ, സ്പേസ് കണ്ണൂരിന്റെ തിരുവാതിര, ധ്വനി രാജ് & ദ്യുതിരാജ് അവതരിപ്പിച്ച ഭരതനാട്യം, പെരിങ്ങളായി നടനം ഗ്രൂപ്പിന്റെ ഡാൻഡിയ, ശ്രീലക്ഷ്മി ശ്രീലേഷ് അവതരിപ്പിച്ച മോഹിനിയാട്ടം എന്നിവ കാണികളെ ആവേശത്തിലാക്കി. തുടർന്ന് ചെമ്മീൻ ബാൻഡ് വിത്ത് സീനിയേഴ്സ് അവതരിപ്പിച്ച മ്യൂസിക്കൽ ഷോയിൽ സദസ്സും ആവേശത്തോടെ പങ്കുചേർന്നു.

മൂന്നാം ദിവസമായ വ്യാഴാഴ്ച സാംസ്കാരിക സമ്മേളനം നജീബ് കാന്തപുരം ഉദ്ഘാടനം ചെയ്യും. സുഭാഷ് ചേർത്തലയുടെ 'അമ്മ' കവിതയുടെ ദൃശ്യാവിഷ്കാരം, ടീം ചിലങ്കയുടെ തിരുവാതിര, ബിജി ബാലൻ അവതരിപ്പിക്കുന്ന ഭരതനാട്യം, കലാമണ്ഡലം നയനാ നാരായണന്റെ മോഹിനിയാട്ടം, ശിവാനി സന്തോഷിന്റെ കുച്ചിപ്പുടി, രഞ്ജു ചാലക്കുടി നയിക്കുന്ന ഫോക് മെഗാ ഷോ തുടങ്ങിയ പരിപാടികളും അരങ്ങേറും.

കണ്ണൂർ ദസറയുടെ വിശേഷങ്ങൾ സുഹൃത്തുക്കളുമായി പങ്കുവയ്ക്കുക.

Article Summary: The second day of Kannur Dasara festival begins with colorful cultural events.

#KannurDasara #Festival #KeralaCulture #Music #Dance #Unity