കണ്ണൂർ: (KVARTHA) നഗരത്തിലെ പൊടിക്കുണ്ടിൽ നിയന്ത്രണം വിട്ട ചെങ്കൽ ലോറി മരത്തിലിടിച്ച് ഡ്രൈവർ മരിച്ചു. തിങ്കളാഴ്ച വൈകിട്ട് നടന്ന അപകടത്തിൽ മലപ്പുറം കൊണ്ടോട്ടി സ്വദേശി പി. ജലീലാണ് (45) ദാരുണമായി മരിച്ചത്.

അപകടത്തിൽ ചെങ്കൽ ലോറിയുടെ മുൻഭാഗം പൂർണ്ണമായി തകർന്നു. ഗുരുതരമായി പരിക്കേറ്റ ജലീലിനെ ലോറിയുടെ കാബിനിൽ നിന്ന് പോലീസും അഗ്നിരക്ഷാ സേനയും ചേർന്ന് പുറത്തെടുത്ത് ഉടൻതന്നെ കണ്ണൂരിലെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.

തളിപ്പറമ്പ് ഭാഗത്തുനിന്ന് ചെങ്കല്ലുമായി വരികയായിരുന്ന ലോറിയുടെ അമിത വേഗതയാണ് അപകടത്തിന് കാരണമെന്ന് പോലീസിന്റെ പ്രാഥമിക അന്വേഷണത്തിൽ വ്യക്തമായിട്ടുണ്ട്. ജലീലിന്റെ മൃതദേഹം പോസ്റ്റ്‌മോർട്ടത്തിനായി കണ്ണൂർ ജില്ലാ ആശുപത്രി മോർച്ചറിയിലേക്ക് മാറ്റി.

അപകടം നടന്ന സ്ഥലത്തെ റോഡരികിലുള്ള ഒരു കടയിലെ സി.സി.ടി.വി കാമറയിൽ പതിഞ്ഞ ദൃശ്യങ്ങൾ പോലീസിന് ലഭിച്ചിട്ടുണ്ട്. ഇത് അപകടത്തെക്കുറിച്ച് കൂടുതൽ വിവരങ്ങൾ നൽകാൻ സഹായിക്കും.

Summary: A brick lorry went out of control and crashed into a tree in Kannur, resulting in the tragic death of the driver, P. Jaleel, from Malappuram. Police suspect overspeeding caused the accident.
 

#KannurAccident, #RoadAccident, #TragicDeath, #LorryAccident, #KeralaNews, #Overspeeding