Accidental Death | പരിയാരത്ത് കളിക്കുന്നതിനിടെ സെപ്റ്റിക് ടാങ്കില്‍ വീണ് 3 വയസുകാരന് ദാരുണാന്ത്യം

തളിപ്പറമ്പ്: (www.kvartha.com) പരിയാരത്ത് നിര്‍മാണം നടന്നുകൊണ്ടിരുന്ന സെപ്റ്റിക് ടാങ്കിന് സമീപം കളിക്കുന്നതിനിടെ കാല്‍വഴുതി വീണ് മൂന്നുവയസുകാരന്‍ മരിച്ചു. പരിയാരത്തെ തമീന്‍ ബശീറാണ് മരിച്ചത്. കൂടെ കളിച്ചിരുന്ന അഹ്‌മദ് ഹാരിസ് എന്ന മൂന്നു വയസുകാരനെ കണ്ണൂരിലെ സ്വകാര്യ ആശുപത്രിയില്‍ പ്രവേശിപ്പിച്ചു. ഈ കുട്ടി അപകടനില തരണം ചെയ്തതായി ആശുപത്രി വൃത്തങ്ങള്‍ അറിയിച്ചു.

വ്യാഴാഴ്ച വൈകുന്നേരം മൂന്നേകാലിനാണ് നാടിനെ നടുക്കിയ ദുരന്തം നടന്നത്. കോരന്‍പീടികയില്‍ താമസക്കാരനായ തളിപ്പറമ്പ് മുക്കോലയിലെ ഓടോ ഡ്രൈവര്‍ പിസി ബശീറിന്റെ മകനാണ് തമീന്‍. പരിയാരം പഞ്ചായത് ഓഫീസിന് പുറകുവശത്താണ് ഇവരുടെ വീട്.

ജസീനയാണ് ഉമ്മ. റാഫിയ, റിയാന്‍, മുഹമ്മദ് എന്നിവരാണ് സഹോദരങ്ങള്‍. നിര്‍മാണം നടന്നുവരുന്ന വീടിനായി നിര്‍മിച്ച സെപ്റ്റിക് ടാങ്കില്‍ കഴിഞ്ഞ ദിവസം പെയ്ത കനത്ത മഴയില്‍ വെളളം കെട്ടിനിന്നിരുന്നു. കുട്ടികള്‍ ഇവിടെ കളിക്കുന്നത് മറ്റുളളവര്‍ ശ്രദ്ധിച്ചിരുന്നില്ല.

നല്ല ആഴമുളള സെപ്റ്റിക് ടാങ്കില്‍ രണ്ടു കുട്ടികളും കാല്‍വഴുതി വീഴുകയായിരുന്നു. ബഹളം കേട്ട് ഓടിയെത്തിയ വീട്ടുകാര്‍ പ്രദേശവാസികളുടെ സഹായത്തോടെ കുട്ടികളെ പുറത്തെടുത്ത് തളിപ്പറമ്പിലെ സ്വകാര്യ ആശുപത്രിയിലെത്തിച്ചുവെങ്കിലും തമീന്റെ ജീവന്‍ രക്ഷിക്കാനായില്ല.