Criticized | പോരാളി ഷാജിയെ തള്ളിപ്പറയുന്നത് മുഖ്യമന്ത്രിയെ സംരക്ഷിക്കാനെന്ന് കെ സുധാകരന്
ADVERTISEMENT
എകെജി സെന്ററില് പ്രവര്ത്തിക്കുന്ന സിപിഎം സൈബര് വിഭാഗം ഏറ്റവുമധികം പകര്ത്തിയത് പോരാളി ഷാജിയുടെ പോസ്റ്റുകള്
ടിപി ചന്ദ്രശേഖറിനെ അരിഞ്ഞുവീഴ്ത്തിയതുപോലെ എത്രയോ യുഡിഎഫ് നേതാക്കളെയാണ് ഇവര് ആക്രമിച്ചിട്ടുള്ളത്
കണ്ണൂര്: (KVARTHA) കോണ്ഗ്രസ് നേതാക്കളെ സൈബര് ലോകത്ത് വളഞ്ഞിട്ട് ആക്രമിക്കാന് പോറ്റി വളര്ത്തിയ പോരാളി ഷാജിമാരെ ഇപ്പോള് തള്ളിപ്പറയുന്നത് തിരഞ്ഞെടുപ്പ് പരാജയം അവരുടെ തലയില് കെട്ടിവച്ച് മുഖ്യമന്ത്രിക്കും സിപിഎം നേതാക്കള്ക്കും രക്ഷപ്പെടാനാണെന്ന് കെപിസിസി അധ്യക്ഷന് കെ സുധാകരന് എംപി.
തിരഞ്ഞെടുപ്പ് കാലത്ത് ഇവരുടെ പോസ്റ്റുകള് സിപിഎം വ്യാപകമായി പ്രചരിപ്പിരുന്നു. എകെജി സെന്ററില് പ്രവര്ത്തിക്കുന്ന സിപിഎം സൈബര് വിഭാഗം ഏറ്റവുമധികം പകര്ത്തിയത് പോരാളി ഷാജിയുടെ പോസ്റ്റുകളാണ്. അതാണ് പരാജയ കാരണമായി സിപിഎം ഇപ്പോള് വിലയിരുത്തുന്നതെന്നും അദ്ദേഹം പ്രസ്താവനയില് പറഞ്ഞു.
മടിയിലും ഒക്കത്തുംവച്ച് പാലൂട്ടി വളര്ത്തിയശേഷമാണ് ഇപ്പോള് ഇറങ്ങിവാടാ എന്ന് ആക്രോശിക്കുന്നത്. സിപിഎമിന്റെ കൊലപാതക- ക്വട്ടേഷന് സംഘം പോലെയാണ് സൈബര് ലോകത്ത് പോരാളി ഷാജിയും കൂട്ടരും. ടിപി ചന്ദ്രശേഖറിനെ അരിഞ്ഞുവീഴ്ത്തിയതുപോലെ എത്രയോ യുഡിഎഫ് നേതാക്കളെയാണ് ഇവര് ആക്രമിച്ചിട്ടുള്ളത്.
ഇതിനെതിരെ കെപിസിസി ഔദ്യോഗികമായി തന്നെ നിരവധി തവണ പരാതി നല്കിയിട്ടും ചെറുവിരല് അനക്കിയിട്ടില്ല.
പിണറായി വിജയനും സിപിഎം നേതാക്കളും അവരെ സംരക്ഷിക്കുകയും അവരുടെ പോസ്റ്റുകള് വ്യാപകമായി പ്രചരിപ്പിക്കുകയും ചെയ്തുവെന്നും അദ്ദേഹം പറഞ്ഞു.
തിരഞ്ഞെടുപ്പില് ഇടതുപക്ഷത്തിനുണ്ടായ കനത്ത പരാജയത്തിന്റെ പ്രധാന കാരണമായി പോരാളി ഷാജി കാണുന്നത് പണമിടപാടുകളും ദന്തഗോപുരവാസവുമാണ്. ഇത് മുഖ്യന്ത്രി പിണറായി വിജയനുള്ള നേരിട്ടുള്ള കുത്താണ്.
മദ്യനയം മാറ്റാന് ബാറുടമകളില് നിന്ന് കോടികള് സമാഹരിച്ചതും കരിമണല് കംപനിയില് നിന്നും കോടികള് കൈപ്പറ്റിയതും ഉള്പെടെയുള്ള ആരോപണങ്ങള് മുഖ്യമന്ത്രിയെ പ്രതിക്കൂട്ടിലാക്കിയവയാണ്. പുരയ്ക്കുമേലെ ചാഞ്ഞ മരം വെട്ടാന് സിപിഎം തീരുമാനിച്ചത് ഈ പശ്ചാത്തലത്തിലാണ്. പോരാളി ഷാജിയെ തള്ളിപ്പറഞ്ഞ് പിണറായിയെ സംരക്ഷിക്കാനാണ് സിപിഎമിന്റെ തീരുമാനമെന്നും സുധാകരന് പ്രസ്താവനയില് പറഞ്ഞു.
