കോഴിക്കോട്ട് വൃദ്ധയ്‌ക്കൊപ്പം കണ്ടെത്തിയ കുട്ടിയുടെ മാതാപിതാക്കള്‍ ഇടുക്കിയിലുണ്ടെന്ന് വിവരം

കോഴിക്കോട്: കോഴിക്കോട്ട് നാടോടി സംഘത്തിലെ വൃദ്ധയ്‌ക്കൊപ്പം കണ്ടെത്തിയ കുട്ടിയുടെ രക്ഷിതാക്കള്‍ ഇടുക്കി ജില്ലയിലെ ഉപ്പുതറയിലുണ്ടെന്ന് അന്വേഷണത്തില്‍ കണ്ടെത്തിയതായി വിവരം.   ഇത് സ്ഥിരീകരിക്കാന്‍ അന്വേഷണ സംഘം ഉടന്‍ തന്നെ ഇടുക്കിയിലേക്ക് പുറപ്പെടുമെന്ന് അന്വേഷണോദ്യോഗസ്ഥര്‍ പറഞ്ഞു. വൃദ്ധയോടൊപ്പം കണ്ടെത്തിയ കുട്ടിയുടെ ബന്ധുക്കളെ കണ്ടെത്താനുള്ള അന്വേഷണം  കോട്ടയം, പത്തനംതിട്ട, ആലപ്പുഴ ജില്ലകളിലാണ് നടക്കുന്നത്.

അതേസമയം കുട്ടി തന്റെ മകളുടെ കുട്ടിയാണെന്ന് ചോദ്യം ചെയ്യലില്‍ വെളിപ്പെടുത്തിയ വൃദ്ധ പിന്നീട് പരസ്പര വിരുദ്ധമായ മൊഴി നല്‍കിയത് അന്വേഷണത്തെ ദോഷകരമായി ബാധിച്ചിരുന്നു. കൂടുതല്‍ ചോദ്യം ചെയ്യലില്‍ കുട്ടിയെ കോട്ടയത്തെ സോമനാഥന്‍ എന്നയാളില്‍ നിന്നും 50,000 രൂപ നല്‍കി ഭര്‍ത്താവ് വാങ്ങിയതാണെന്നും അമ്പിളി എന്നു വിളിപ്പേരുള്ള ഷാജിത നല്‍കിയ മൊഴിയില്‍ പറയുന്നു. എന്നാല്‍ ഇത്രയും തുക നല്‍കി കുട്ടിയെ വാങ്ങാനുള്ള സാമ്പത്തിക സ്ഥിതി ഇവര്‍ക്കില്ല എന്നത് അന്വേഷണോദ്യോഗസ്ഥരെ ആശയക്കുഴപ്പത്തിലാക്കിയിരുന്നു.

ഇതിനിടയിലാണ് സോമനാഥനും കുടുംബവും ഇടുക്കിയിലുണ്ടെന്നുള്ള വിവരം ലഭിക്കുന്നത്. ഇയാളെ കണ്ടെത്തുന്നതോടെ കുട്ടിയെ കുറിച്ചുള്ള സംശയങ്ങള്‍ക്ക് പരിഹാരം കാണാനാകുമെന്ന പ്രതീക്ഷയിലാണ് പോലീസ്.

അന്വേഷണസംഘം സംസ്ഥാനത്തെ വിവിധ പോലീസ് സ്‌റ്റേഷനുകളില്‍ നല്‍കിയ വിവരത്തിന്റെ അടിസ്ഥാനത്തില്‍ നടത്തിയ അന്വേഷണത്തിലാണ് കുട്ടിയുടെ രക്ഷിതാവായ സോമനാഥന്‍ ഇടുക്കി ജില്ലയിലെ ഉപ്പുതറയിലുണ്ടെന്നുള്ള വിവരം ലഭിച്ചത്.

കുറ്റിക്കാട്ടൂരിലെ പൈങ്ങോട്ടുപുരം നഴ്‌സറി സ്‌കൂളിലും എല്‍പി സ്‌കൂളിലും
കുട്ടി മൂന്നാം ക്ലാസു വരെ പഠിച്ചിട്ടുള്ളതായി പോലീസിന്റെ അന്വേഷണത്തില്‍ കണ്ടെത്തിയിരുന്നു. കുട്ടിയെ പോലീസ് ഇപ്പോള്‍ കോഴിക്കോട് ചില്‍ഡ്രന്‍സ് ഹോമില്‍ പാര്‍പ്പിച്ചിരിക്കയാണ്.
അന്നത്തിനായി ഉരുക്കിനോടും തീയോടും മല്ലിട്ട് ഉത്തരേന്ത്യന്‍ കുടുംബങ്ങള്‍