Illegal Cables | വൈദ്യുതി പോസ്റ്റുകളിലൂടെ അനധികൃതമായി മറ്റ് കേബിളുകൾ വലിക്കുന്നത് വ്യാപകമായി; അപകടം വിളിപ്പാടകലെ

ഇടുക്കി ജില്ലയിലും സമാന രീതിയിൽ അപകടം വരുത്തിവയ്ക്കുന്ന വിധമാണ് കേബിളുകൾ വലിച്ചിരിക്കുന്നത്. ഒരു പോസ്റ്റിൽ അഞ്ചും ആറും കേബിളുകളാണ് ഒരേസമയം വലിച്ചിരിക്കുന്നത്. കേബിളുകൾ സ്ഥാപിക്കുന്നതിന് കെഎസ്ഇബി നൽകിയ മാർഗനിർദേശങ്ങൾ പാടെ അവഗണിച്ചാണ് സ്ഥാപിച്ചിരിക്കുന്നതെങ്കിലും നീക്കം ചെയ്യാൻ അധികാരികൾ തയ്യാറാകുന്നില്ല. അപകടകരമായ വിധത്തിൽ വലിച്ചിരിക്കുന്ന കേബിളുകൾ നീക്കണമെന്ന് ആവശ്യപ്പെട്ടുവെങ്കിലും മാറ്റാൻ ബന്ധപ്പെട്ടവർ തയ്യാറാവുന്നില്ലെന്നാണ് അധികൃതർ പറയുന്നത്.

വൈദ്യുതി ലൈനുകള്‍ കടന്നു പോകുന്നതിനായി നിയമപരമായി വേര്‍തിരിക്കപ്പെട്ട മേഖലയിലും റൈറ്റ് ഓഫ് വേയിലും വൈദ്യുതി തൂണുകള്‍ക്ക് സമീപവും മറ്റ് വാര്‍ത്താവിനിമയ സ്ഥാപനങ്ങളുടെ തൂണുകള്‍ സ്ഥാപിച്ചിരിക്കുന്നതും ജീവനക്കാരുടെ ജോലിക്ക് തടസം സൃഷ്ടിക്കുന്നുണ്ട്. ഇവ സുരക്ഷാ ഭീഷണി ഉയർത്തുന്നതായി ജീവനക്കാർ പറയുന്നു.

2003-ലെ ഇലക്ട്രിസിറ്റി ആക്ട് സെക്ഷന്‍ 68(5), സെന്‍‍‍‍ട്രല്‍ ഇലക്ട്രിസിറ്റി അതോറിറ്റിയുടെ വൈദ്യുതി വിതരണ സുരക്ഷാ ചട്ടത്തിലെ 60, 61, 63, 69 തുടങ്ങിയ വകുപ്പുകൾ പ്രകാരം അനധികൃത നിര്‍മ്മിതികള്‍ നിയമവിരുദ്ധമാണെങ്കിലും അധികൃതർ കണ്ടഭാവം നടിക്കുന്നില്ല. ഈ സാഹചര്യത്തില്‍ ഇത്തരം അനധികൃത കേബിളുകളും തൂണുകളും അടിയന്തിരമായി നീക്കം ചെയ്യാനുള്ള നടപടി കെ എസ് ഇ ബി സ്വീകരിക്കണമെന്ന ആവശ്യവും ശക്തമാണ്.