മലപ്പുറം: (KVARTHA) പത്തൊൻപതാം വയസിൽ വിമാനം പറത്തി നാടിനെ അമ്പരിപ്പിച്ച മറിയം ജുമാനയാണ് ഇപ്പോൾ ശ്രദ്ധേയമായിരിക്കുന്നത്. മലപ്പുറം പുൽപ്പറ്റ സ്വദേശിനിയായ ഈ മിടുക്കി, ഡൽഹിയിലെ ഫ്ലൈ ഓല ഏവിയേഷൻ അക്കാദമിയിലെ പഠനത്തിന്റെ ഭാഗമായാണ് ഏഴ് മണിക്കൂർ വിമാനം പറത്തി സ്വപ്ന സാക്ഷാത്കരത്തിന് തുടക്കമിട്ടത്.

നാട്ടിൻപുറത്തെ ഒരു സാധാരണ കുടുംബത്തിൽ നിന്നും ഉയർന്നുവന്ന മറിയം, പഠനത്തിലും കലയിലും ഒരുപോലെ മിടുക്കിയാണ്. പിതാവ് ഉമർ ഫൈസി ഉസ്താദും, മാതാവ് ഉമൈബാനു സാമൂഹിക പ്രവർത്തകയുമാണ്. മറിയത്തിന്റെ ഈ നേട്ടം കുടുംബത്തിനും നാടിനും വലിയ അഭിമാനമായി മാറിയിട്ടുണ്ട്. 

ചെറുപ്പം മുതലുള്ള സ്വപ്നം

ചെറുപ്പം മുതലേ വിമാനം പറത്തണമെന്ന സ്വപ്നം മനസിൽ സൂക്ഷിച്ചിരുന്ന ജുമാന, അത് സാക്ഷാത്കരിക്കാൻ കഠിനാധ്വാനം ചെയ്തു. പഠനത്തിനൊപ്പം സംഗീതവും അഭ്യസിക്കുന്ന ഈ മിടുക്കി, യൂട്യൂബിൽ സ്വന്തമായി പാട്ടുകൾ പാടാറുണ്ട്. ഇതിനോടകം സ്റ്റുഡന്റ്സ് പൈലറ്റ് ലൈസൻസ് നേടിയിട്ടുണ്ട്. കൊമേർഷ്യൽ പൈലറ്റാകുക എന്നതാണ് ലക്ഷ്യം. അതിനായി ഇനിയും 200 മണിക്കൂർ വിമാനം പറത്തണം. 

ആദ്യഘട്ടത്തിൽ സിംഗിൾ എൻജിനുള്ള വിമാനം എഴ് മണിക്കൂർ സമയം പറത്തിയാണ് മറിയം ജുമാന ആകാശം കീഴടക്കിയത്. ഒഴുകുർ ക്രസന്റ് ഹയർ സെകൻഡറി സ്കൂളിലായിരുന്നു പ്രാഥമിക വിദ്യാഭ്യാസം. കാവുങ്ങപ്പാറ ഉമറുൽ ഫാറൂഖ് മദ്രസയിൽ നിന്ന് പത്താംക്ലാസ് പൊതുപരീക്ഷയിൽ ഡിസ്റ്റിങ്ഷനോടെ പാസായിട്ടുണ്ട്.

പുൽപ്പറ്റയുടെ പൊന്നോമന

പുൽപ്പറ്റ പഞ്ചായതിലെ വാലഞ്ചേരികുന്ന് പുത്തൻപുര വീട്ടിൽ ഉമർ ഫൈസി - ഉമൈബാനു ദമ്പതികളുടെ  നാലാമത്തെ കുട്ടിയാണ് മറിയം ജുമാന. പിതാവ് കോഴിക്കോട് മാത്ര മസ്‌ജിദിൽ ഉസ്താദായി സേവനമനുഷ്ഠിക്കുന്നു. വനിതാ ലീഗ് നേതാവും മുൻ പഞ്ചായത് അംഗവുമാണ് ഉമൈബാനു. സഹോദരങ്ങൾ: മുഹമ്മദ് നൂറുൽ അമീൻ, അബ്ദു‌ൽ റഹീം, റാശിദ, ഫാത്വിമത് സാലിഹ.

പുതിയ തലമുറയ്ക്ക് പ്രചോദനം

മറിയം ജുമാനയുടെ ജീവിതം, പ്രത്യേകിച്ചും സ്ത്രീകൾക്ക്, വലിയൊരു പ്രചോദനമാണ്. നാട്ടിൻപുറത്തു നിന്നും വന്ന് ആകാശം കീഴടക്കിയ ഈ കൊച്ചുമിടുക്കി, എന്തും സാധ്യമാണെന്ന് തെളിയിച്ചു. മറിയം ജുമാനയുടെ ഈ നേട്ടം, കേരളത്തിലെ ഓരോ പെൺകുട്ടിക്കും ഒരു സ്വപ്നം നൽകുന്നു.

#MariyamJumana #Aviation #WomenEmpowerment #PilotDream #InspiringJourney #Kerala