'ബ്രാൻഡിക്ക് പേരിടാൻ മത്സരമില്ല'; ഹൈക്കോടതിയിൽ ബെവ്കോയുടെ വിചിത്ര വാദം, പുതിയ മദ്യത്തിന്റെ പേരും ലോഗോയും പ്രഖ്യാപിക്കുന്നത് തടഞ്ഞു

കൊച്ചി: (KVARTHA) പുതിയ മദ്യ ബ്രാൻഡിന് പേരും ലോഗോയും നിർദേശിക്കുന്നവർക്ക് സമ്മാനം നൽകുമെന്ന പ്രഖ്യാപനം വിവാദമായതോടെ ഹൈക്കോടതിയിൽ മലക്കം മറിഞ്ഞ് ബെവ്കോ. തങ്ങൾ ഇങ്ങനെയൊരു പരസ്യം നൽകിയിട്ടില്ലെന്ന വിചിത്ര വാദമാണ് കോർപ്പറേഷൻ കോടതിയിൽ ഉയർത്തിയിരിക്കുന്നത്. അബ്കാരി ചട്ടങ്ങളുടെ ലംഘനമാണ് നടന്നതെന്ന് നിരീക്ഷിച്ച ഹൈക്കോടതി, പുതിയ ബ്രാൻഡിന്റെ പേരും ലോഗോയും പ്രഖ്യാപിക്കുന്നത് ഇടക്കാല ഉത്തരവിലൂടെ സ്റ്റേ ചെയ്തു.

ബെവ്കോയുടെ വിചിത്ര വാദം

സംസ്ഥാന സർക്കാരിന്റെ കീഴിലുള്ള പൊതുമേഖലാ സ്ഥാപനമായ ബെവ്കോയ്ക്ക് ഇത്തരമൊരു മത്സരത്തെക്കുറിച്ച് അറിവില്ലെന്നാണ് കോടതിയിൽ സമർപ്പിച്ച സത്യവാങ്മൂലത്തിൽ പറയുന്നത്. ‘ബ്രാൻഡിക്ക് പേര് നിർദ്ദേശിച്ച് മത്സരം നടത്തുന്നില്ല. 

ലോഗോയും പേരും നിർദ്ദേശിച്ച് മത്സരത്തിനുള്ള പത്രക്കുറിപ്പോ, വിജ്ഞാപനമോ ഇറക്കിയിട്ടില്ല. ബിവറേജ് കോർപ്പറേഷൻ പുതിയ മദ്യം നിർമ്മിക്കുന്നില്ല,’ ബെവ്കോ ഹൈക്കോടതിയെ അറിയിച്ചു. മദ്യ ഉല്പാദനത്തിൽ ബെവ്കോ നേരിട്ട് ഇടപെടുന്നില്ലെന്നും അതിനാൽ തങ്ങൾക്കെതിരെ കേസെടുക്കാൻ കഴിയില്ലെന്നുമാണ് അവർ വാദിച്ചത്.

എം.ഡിയുടെ വാർത്താക്കുറിപ്പ് എവിടെ?

പാലക്കാട് മലബാർ ഡിസ്റ്റിലറിയിൽ നിന്ന് പുറത്തിറക്കുന്ന പുതിയ ബ്രാണ്ടിക്ക് പേര് നിർദേശിക്കുന്നവർക്ക് 10,000 രൂപ സമ്മാനം നൽകുമെന്നായിരുന്നു ഡിസംബറിൽ വന്ന വാർത്താക്കുറിപ്പ്. ബെവ്കോ എം.ഡിയുടെ പേരിൽ പുറത്തിറങ്ങിയ ഈ വാർത്താക്കുറിപ്പും സോഷ്യൽ മീഡിയയിലെ വലിയ പ്രചാരണവും ചൂണ്ടിക്കാട്ടി കോടതി ബെവ്കോയുടെ ഇപ്പോഴത്തെ വാദത്തിൽ അതൃപ്തി പ്രകടിപ്പിച്ചു.

നിയമ ലംഘനം

മദ്യ ഉപഭോഗം പ്രോത്സാഹിപ്പിക്കുന്നത് നിയമവിരുദ്ധമാണെന്ന് ചൂണ്ടിക്കാട്ടി കൊല്ലത്തെ കോൺഗ്രസ്‌ നേതാവ് എം.എം. സഞ്ജീവ് കുമാർ നൽകിയ ഹർജിയിലാണ് കോടതിയുടെ ഇടപെടൽ. 

സർക്കാർ സ്ഥാപനം തന്നെ മദ്യപാനത്തെ പ്രോത്സാഹിപ്പിക്കുന്ന തരത്തിൽ മത്സരം സംഘടിപ്പിക്കുന്നത് അബ്കാരി ചട്ടങ്ങളുടെ ലംഘനമാണെന്ന് കോടതി വിലയിരുത്തി. ലഹരി വിരുദ്ധ സമിതികളും യൂത്ത് കോൺഗ്രസ് ഉൾപ്പെടെയുള്ള സംഘടനകളും ഇതിനെതിരെ ശക്തമായി രംഗത്തെത്തിയിരുന്നു.

പുതിയ വാർത്തകൾ സമയബന്ധിതമായി അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക. ഈ വാർത്ത ഷെയർ ചെയ്യൂ. അഭിപ്രായം കമന്റായി രേഖപ്പെടുത്താനും മറക്കരുത്.

Article Summary: Kerala High Court stays BEVCO's liquor naming contest after the corporation gave a bizarre affidavit.

#BEVCO #KeralaHigh Court #LiquorBan #MalabarDistillery #BrandyContest #KeralaNews #KVARTHA