Raid | പയ്യന്നൂരിൽ വൻ കുഴൽപ്പണ ഇടപാട്; 46 ലക്ഷം രൂപയുമായി രണ്ട് പേർ അറസ്റ്റിൽ
കണ്ണൂർ: (KVARTHA) പയ്യന്നൂരിൽ പൊലീസ് നടത്തിയ റെയ്ഡിൽ വൻ കുഴൽപ്പണ ഇടപാട് നടത്തുന്ന സംഘത്തിലെ രണ്ട് പേർ അറസ്റ്റിലായി. മഹാരാഷ്ട്ര സ്വദേശികളായ സത്യവാങ് ആദർശ്, ശിവജി എന്നിവരാണ് പിടിയിലായത്. ഇവരിൽ നിന്ന് രേഖകളില്ലാത്ത 46 ലക്ഷം രൂപ പിടിച്ചെടുത്തു.
ശനിയാഴ്ച രാവിലെയാണ് പൊലീസ് റെയ്ഡ് നടത്തിയത്. പയ്യന്നൂർ റെയിൽവേ സ്റ്റേഷൻ കേന്ദ്രീകരിച്ച് കുഴൽപ്പണ ഇടപാട് നടക്കുന്നുവെന്ന രഹസ്യ വിവരത്തെ തുടർന്നാണ് പൊലീസ് ഇത്തരത്തിലൊരു നടപടി സ്വീകരിച്ചത്. പയ്യന്നൂർ ഡി വൈ എസ് പി കെ.വിനോദ്കുമാറിന്റെ നിർദ്ദേശപ്രകാരം, പയ്യന്നൂർ പൊലീസ് സ്റ്റേഷനിലെ ഇൻസ്പെക്ടർ എ ബി രാജേഷിന്റെ നേതൃത്വത്തിലുള്ള ഒരു സംഘം റെയിൽവേ സ്റ്റേഷൻ പരിസരത്ത് സംശയാസ്പദമായി നിന്നിരുന്ന ഇരുവരെയും പരിശോധിച്ചപ്പോഴാണ് വൻ തുക പണം കണ്ടെത്തിയത്.
വലിയ ഒരു ബാഗിൽ നോട്ടുകൾ കെട്ടുകളായി സൂക്ഷിച്ചിരിക്കുകയായിരുന്നു. ഇവരെ കസ്റ്റഡിയിലെടുത്ത് ചോദ്യം ചെയ്തു. തുടർന്ന് പണം തൊണ്ടിമുതലായി കണ്ടുകെട്ടി.
