ഭാമനാവത്ത് 

(KVARTHA) ശ്രീ നാരായണ ധർമ്മ പ്രചാരകനും ദാർശനികനുമായിരുന്ന ഗുരു നിത്യ ചൈതന്യ യതി ഈ ലോകത്തോട് വിടവാങ്ങിയിട്ട് ഇന്നേക്ക് (മെയ് 14) 29 വർഷം തികയുന്നു. ഒരു ജാതി ഒരു മതം ഒരു ദൈവം മനുഷ്യന് എന്ന ശ്രീനാരായണ ഗുരുവിന്റെ വചനങ്ങളെ ജീവിതത്തിന്റെ അടിസ്ഥാനമായി സ്വീകരിച്ച അദ്ദേഹം, ഹൈന്ദവ സന്യാസിയായിരുന്നിട്ടും മറ്റു മതവിഭാഗങ്ങൾക്കിടയിലും വലിയൊരു ആരാധകവൃന്ദത്തെ സൃഷ്ടിച്ചു. 

നടരാജ ഗുരുവിനെ ആത്മീയ ഗുരുവായി സ്വീകരിച്ച യതി, അദ്വൈത വേദാന്തം, തത്വ ശാസ്ത്രം, യോഗവിദ്യ, മീമാംസ, പുരാണങ്ങൾ, സാഹിത്യം, ഉപനിഷത്തുകൾ എന്നിവയിൽ അഗാധമായ പാണ്ഡിത്യം നേടിയിരുന്നു.

ജാതിമത ചിന്തകൾക്കതീതമായ ദർശനങ്ങളിലൂടെ പ്രശസ്തനായ ഗുരു നിത്യ ചൈതന്യ യതി, ആത്മീയതയെയും ശ്രീനാരായണ ദർശനങ്ങളെയും സമന്വയിപ്പിച്ച തത്വചിന്തകളിലൂടെ കേരളീയ മനസ്സിൽ ആഴത്തിൽ വേരൂന്നി. അദ്വൈത വേദാന്ത ദർശനങ്ങളിൽ ആചാര്യ സ്ഥാനം നേടിയ അദ്ദേഹം സംഗീതം, സാഹിത്യം, ചിത്രകല തുടങ്ങിയ വിവിധ മേഖലകളിൽ തൻ്റേതായ വ്യക്തിമുദ്ര പതിപ്പിച്ചു. 

ലോകമെമ്പാടുമുള്ള ആയിരക്കണക്കിന് ആളുകളുടെ ആത്മീയ ഗുരുവായിരുന്ന യതി, ഇന്ത്യയിലും വിദേശത്തുമുള്ള സർവ്വകലാശാലകളിലും കോളേജുകളിലും അദ്ധ്യാപകനായും സേവനമനുഷ്ഠിച്ചു. ഗാന്ധിജിയോടൊപ്പം ഹരിജൻ സേവാ സംഘത്തിലും ശ്രീനാരായണ ഗുരുവിനോടൊപ്പം ശിവഗിരിയിലും അദ്ദേഹം പ്രവർത്തിച്ചു.

1924 നവംബർ 2ന് പത്തനംതിട്ട ജില്ലയിലെ മുറിഞ്ഞ കല്ലിൽ കെ ആർ ജയചന്ദ്ര പണിക്കർ എന്ന പൂർവ്വാശ്രമ നാമത്തിൽ ജനിച്ച യതി, നടരാജ ഗുരുവിനു ശേഷമുള്ള ശ്രീനാരായണ ഗുരുവിൻ്റെ പ്രധാന ശിഷ്യന്മാരിൽ ഒരാളായിരുന്നു. മെട്രിക്കുലേഷന് ശേഷം ഭാരതം മുഴുവൻ സഞ്ചരിച്ച അദ്ദേഹം രമണ മഹർഷിയെ പരിചയപ്പെടുകയും അദ്ദേഹത്തിൽ നിന്ന് സന്യാസ ദീക്ഷ സ്വീകരിക്കുകയും ചെയ്തു. ശ്രീനാരായണ ഗുരുവിൻ്റെ ദർശനങ്ങൾ പ്രചരിപ്പിക്കാനായി സ്ഥാപിക്കപ്പെട്ട നാരായണ ഗുരുകുലത്തിൻ്റെ അധിപനായി നടരാജ ഗുരുവിൻ്റെ വിയോഗശേഷം അദ്ദേഹം ചുമതലയേറ്റു.

‘ഞാൻ അക്ഷരമാണ്. ഏതെങ്കിലും അച്ചടിയന്ത്രത്തിൽ കയറി അതിൽ കൂടി ഞെരുങ്ങിപ്പോകുന്ന കടലാസിൽ പറ്റിയിരുന്നു ഞാൻ നിങ്ങളുടെ വീട്ടിൽ എത്തും’ എന്ന് പറഞ്ഞ ഗുരു നിത്യ ചൈതന്യ യതി, ഇംഗ്ലീഷിലും മലയാളത്തിലുമായി നിരവധി ഗ്രന്ഥങ്ങളിലൂടെ ഓരോ വീട്ടിലും എത്തിച്ചേർന്നു. 'ലവ് ആൻഡ് ബ്ലെസ്സിംഗ്' എന്ന പേരിലുള്ള അദ്ദേഹത്തിൻ്റെ ആത്മകഥ പ്രസിദ്ധമാണ്. 75-ാം വയസ്സിൽ, 1999-ൽ ആത്മീയതയുടെ ഈ തേജസ്സ് ലോകത്തോട് വിടപറഞ്ഞു.

ഈ വാർത്തയെക്കുറിച്ച് നിങ്ങളുടെ അഭിപ്രായങ്ങൾ പങ്കുവെക്കുക! കൂടുതൽ പേരിലേക്ക് എത്തിക്കാൻ ഷെയർ ചെയ്യുക.

Article Summary: Today marks the 29th death anniversary of Guru Nitya Chaitanya Yati, a philosopher and propagator of Sree Narayana Dharma. A disciple of Nataraja Guru and a scholar in Advaita Vedanta, he had a wide following and authored many books.

#GuruNityaChaitanyaYati, #SreeNarayanaGuru, #Philosophy, #Spirituality, #Kerala, #DeathAnniversary